Yakobo 1 - Nouveau Testament en Ngombe 1961

¹ Njɛbɛ embi Yakobo, mokɔmɛli oNjambe na oKumu Yesu Masiya, ai makota domi-na-mabae maya manangana.

² Baninga, okanɛni bomeka tungu na tungu, dani na sepi a mojɔ momina.

³ Ojebakani bo ejimeli enu ekamekama, lingbangba linu lidi bohɛ.

⁴ Lingbangba ko libwani bokɔ elomu ebɔngɔke mɛnɛ bo odaeni bato babɔngɔke, pɛ botaka nongo mokina mojɔ.

⁵ Okina onu akataka bowɛi, yɛ ange Njambe, nongo asɛ; mojɔ bo yo adi na likabo linɛnɛ ai bato basusu, atajuma nongo mweka.

⁶ Adi bongako na ejimeli, pɛpɛ nongo kitɛ; mojɔ bo yona odi na kitɛ adi o mula momadiba mua molindoamaka na mopimboaka na pwea.

⁷ Moto omina abwaniti bolɛ bo adi bosɔ eka ai Kumu,

⁸ mojɔ bo adi moto omilema Mibae, na ekɔmɛli ende esusu edi na mokakwano.

⁹ Moto obokwali akasɔ ekina ekumu, yɛ adae na sepi a mojɔ momina;

¹⁰ na moto olikonja akasamboa, yɛ asepe pongono, mojɔ bo yo adi bogwa o agwaka malɛkɛ manjienjie.

¹¹ Busa bokahoa, na moi mokagbasoa, njienjie jiwɔsɔsɔkɔ oko bowɔsɔsɔ, malɛkɛ makwaka na esɛngɔ emina esusu esiaka. Moto olikonja adi bowɔsɔsɔ koko boa a tei ebilomu binde.

¹² Moto akahɔnɔ bomeka, moto omina adi na bojongoa; mojɔ bo, akapasama adi bosɔ likongo libomɔ lidikeja Njambe ai baya bamo-palaka.

¹³ Moto akamekama, abwaniti bobala bo, Njambe amekaka mbi; mojɔ bo Njambe atamekamaka na bobe, na atamekaka moto.

¹⁴ Moto ko amekamaka yana alaboaka yo na posa jinde mɛnɛ jia jimolɛngɛkɛ.

¹⁵ Posa ekalwa, ebotaka oko bobe, na bobe bokagbasoa bobotaka oko bogwa.

Ekɔmɛli eMoto oEjimeli

¹⁶ Pɛ bobungani, baninga baepaeli.

¹⁷ Bipeeli bisusu bipele, na toma jisusu jibɔngɔke, jihulaka oho diko ai Sango obohu bosusu. Iyo adi na bosusu oko tungu emɔci; esie ebohekoa bonde editi.

¹⁸ Iyo abota so na ebaeli esoti, oko a mojɔ mobolulea bonde mɛnɛ, bo bodae o mbuma jiboso jibato bande.

¹⁹ Baninga bambi baepaeli, jebani mojɔ mu. Yɛ moto na moto adae na njoki a bohokea, pɛ ko bobala bokpa-bokpa, na pɛ boka kɛlɛ bokpa.

²⁰ Mojɔ bo kɛlɛ emoto etasukeaka na bodongo boNjambe.

²¹ Oko boa, toma dumbani bosɔtɔ bosusu, na njani jinɛnɛ jibobe. Kinani Ebaeli ekwee o ngua a tei emilema minu mi yɛmbu, Ebaeli yena ebwani boheleja miembo minu.

²² Kɔni o akojaka Ebaeli. T’odaeni oko bato baya ba’kaka pɛ, baya basakoseaka bo bɛnɛ.

²³ Mojɔ bo yona o’kaka Ebaeli, pɛ ko bokɔ, adi o moto yona onjaka elimo eboso bonde a talatala.

²⁴ Anjaka elimo ende, na akadonga, abosaka bokpa elimo ende.

²⁵ Yona ko onjaka a tei eMobeko mosoti, Mobeko mobosɔmi, na akada na lingbangba, na akakɔ oko bokɔ, te nongo moto yona o’kaka na abo-saka, moto omina adi bosɔ bojongoa na bokɔ.

²⁶ Isa moto alɛkɛ bo adi na ejimeli ai Njambe, pɛ ko bogbokeja yemi ende, akoseaka molema monde mɛnɛ; ejimeli emoto omina edi eka engasa.

²⁷ Ejimeli esoti yena edi na bosɛnɔ a miso maNjambe Sangwa’su edi oko ye,—a bonja bana-bamalike na bali-babogwa a minɔngɔ Mibu, na a bosabanea, pɛpɛ nongo litɔnɔ lipita jingondo.