Tito 1 - Nouveau Testament en Ngombe 1961

¹ Mbi Paulo, mobuli oNjambe, na obwɛnji oYesu Masiya a mojɔ moejimeli ebahɔmɔke baNjambe, na ejebeli engando jisoti yena ebwani na ekɔmɛli ebato baNjambe,

² bo badae na njingo ebomɔ bua bodi na bosusu, bomɔ bodikeja Njambe a libangake mɛnɛ; na yo Pakputojake nongo sako.

³ Na angameja ebaeli ende a ehole ebwanake, oko na bwɛnji bosɔ mbi na mobeko moNjambe Mobeleja osu:

⁴ Ai Tito, mwana’mbi osoti a tei eejimeli esu na wɛ. Yɛ monganji na bowi boNjambe Sango na Yesu Masiya Moheleja osu bodae na wɛ.

Eleko a Mojɔ moDenga diKulete

⁵ Mbi nakina wɛ a Kulete bo okolee mijɔ mia midika a bokolea, na a bohɔ basuku baDenga a ngando na ngando, o ama mbi tɔndɔ wɛ.

⁶ Mosuku oDenga abwani boda na ekɔmɛli esɛnɔke mɛnɛ, oko momi yona odi na mwali omɔci pɛ, na bana bande bato baejimeli baya baditi na lipanga, na baya baditi na gala ebe.

⁷ Mojɔ bo monjeli oDenga abwani boda na ekɔmɛli esɛnɔke yena ebwani na mokɔmɛli oNjambe, te nongo moto oegbo na kɛlɛ, isa moto obolangoa, isa moto odane, isa moto yona odi na posa elikonja.

⁸ Abwani boda na monganji ai bakɛndɛli, moto yona opalaka ngando jipele, moto obowi, moto oyongi, mosɛnɔke, moto obodongo;

⁹ moto yona oPeaka Ebaeli esoti oko boku, oko Ebaeli esɔ yo na bokoja, bo abwane bokoja ngando jisoti na bogbokeja bato bakitɛ.

¹⁰ Mojɔ bo bato balipanga badi banɛnɛ, bato babibalabala na babokosea, gbo oko bato baejimeli eBaYuda.

¹¹ Bato bamina babwani bogboka mojɔ bo babejaka milema mimenga manɛnɛ, na bakojaka ngando jia jibɔngiti nongo mweka, oko na njingo elikonja pɛ.

¹² Okina obu, mowɛi obu bɛnɛ, abala bo, BaKulete badi bakosei bihole bisusu, tito babe, bato bayenga na baekusu.

¹³ Ekenge emina edi soti mɛnɛ. A mojɔ momina toma baleha na bopipo bo badae bato banjilake a Ejimeli,

¹⁴ na bo batahokea masɔ maBaYuda, na Mibeko Mibato baya baloni njea esoti.

¹⁵ Ngando jisusu jidi jisɛnɔke ai bato basɛnɔke. Pɛ nongo mojɔ momɔci ko modi mosɛnɔke ai bapɔke na ai bato baya badi pɛ bojima, mojɔ bo milema Mibu, na bilɛli bibu, bidi bipɔke.

¹⁶ Batɔndɔkɔ na monɔkɔ bo bajebaka Njambe; bamonganaka ko na bikɔmɛli bibu. Badi bato babosambolu, bato balipanga; babɔngiti nongo na ekwa ekɔmɛli epele.