Pilemona 1 - Nouveau Testament en Ngombe 1961

¹ Mbi Paulo, lisungu liMasiya Yesu, na Timoteo mwangwa’su ai Pilemona moninga osu a elomu,

² ai ngɛnɛ esu Apia, a Alukipo moninga osu a bila, na a Denga lia lidi a ndako ewɛ.

³ Yɛ monganji na bowi boNjambe Sangwa’su, na Kumu osu Yesu Masiya, bodae na wɛ.

⁴ Mbi nasakoaka Njambe bihole bisusu yana alangaka mbi kombe ewɛ a ma’nga mambi.

⁵ Mojɔ bo nakaka mwako moepaeli ewɛ, na ejimeli ewɛ, ai Kumu Yesu, na ai bato basusu baDenga.

⁶ Mbi nangaka Njambe bo bakakatana na wɛ a ejimeli, badi bohɛ na ejebeli ebopele bosusu bua bodi ai so a tei eMasiya.

⁷ Moninga, yana aka mbi mwako moepaeli ewɛ, mbi nasepa bou mɛnɛ, cina bo milema mibato baDenga misɔ ngulu a mojɔ mowɛ.

Mojɔ Momobuli Onesimo

⁸ A mojɔ momina, nongo adi mbi na kpaci a tei eMasiya a botɔndɔ wɛ ngando jia jibwani na wɛ a bokɔ,

⁹ napalaka bongɔɔnɔ wɛ a mojɔ moepaeli, oko mbi Paulo yona odi mosuku mɛnɛ, na lisungu liMasiya Yesu e dɛye.

¹⁰ Nangɔɔnɔkɔ wɛ a mojɔ momwana’mbi Onesimo. Mbi namobota adi mbi ya a minyɔlɔ.

¹¹ Iyo adaka na wɛ boso oko moto-ngasa. Edɛye ko abwani bokɔmeja so na wɛ.

¹² Mbi namosɔmbejaka ai wɛ, o molema mombi mɛnɛ.

¹³ Nadaki na posa bo adikae na mbi ya a bokɔmɛ mbi a kombe ewɛ, yana adi mbi ya a minyɔlɔ a mojɔ moMwako Mopele.

¹⁴ Napaliti ko bokɔ boa, adi wɛ pɛ bopeta jima mojɔ momina. Okakɔ mbi monganji, mobwani boda na bolulea bowɛ mɛnɛ, te a mojɔ mokpaci embi.

¹⁵ Isa abɔtɔi na wɛ ehole ye ekue bo omosɛ koko na bosusu,

¹⁶ te nongo o mobuli, oko moto yona onɔi mobuli, oko moninga oepaeli. Isa adi moninga ombi oepaeli, esingaiti ai wɛ, o moto mɛnɛ, na a tei eKumu pongono.

¹⁷ Oko boa, isa onjaka mbi o minao, mosɔ yo o mbi mɛnɛ.

¹⁸ Isa akɔ mokina mojɔ mobe ai wɛ, isa adi na nongo ai wɛ, langa mojɔ momina o nongo embi.

¹⁹ Mbi Paulo nasɔnɔkɔ mojɔ mu na ebɔ embi mɛnɛ—Nadi bosɔmbeja nongo emina. Nabwaniti bolɛjɛ wɛ bo odi na nongo ai mbi; nongo emina edi oko we mɛnɛ.

²⁰ Ee moninga, kɔ mbi monganji mu a kombe eKumu. Gɔmbeja molema mombi a tei eMasiya.

²¹ Nasɔnei wɛ mokanda mu mojɔ bo najimaka bo odi na lisuma. Najebaka bo otakputoa bokɔ mojɔ mopalaka mbi; ee, odi bonɔ mojɔ momina na monganji.

²² Mokina mojɔ motongo, —sɛlingoa ekina ekenge endako a mojɔ mombi; nadi na njingo bo osɛni mbi koko o epeeli, cina ebingeeli binu.

²³ Epapulo lisungu liMasiya Yesu yona odi na mbi ya, abɛjɛkɛ wɛ njɛbɛ.

²⁴ Malako, na Alisitaluko, na Dema, na Luka, bina’mbi a elomu, babɛjɛkɛ wɛ pongono.

²⁵ Yɛ monganji moKumu Yesu Masiya modae na mwembo mowɛ.