Matayo 28 - Nouveau Testament en Ngombe 1961

Yesu Angɔ a Bogwa

¹ Malia oMagadala na Malia yona otongo, bakɛ a bonja esɛmɔ a ehole emojukakeli a busa boboso, yana asia busa boSabata.

² Ngondo ejonga a ehole emina, bojonga bonɛnɛ; cina bo okina obwɛnji oKumu adonga oho Diko, atita ya nase, ahilingoja litai, na ada na mobondo a diko dilitai.

³ Elimo ende edaka o mokalimo, na bisenia binde bidaka bipu bopɛɛ o makambule.

⁴ Basoda baya basɛnjɛlɛkɛ baluluma na bɔ a mojɔ momina; badaka o bagwake mɛnɛ.

⁵ Obwɛnji ko abala na bali bo, Ino, yɛni bobanga! Najebaka bo odukakani Yesu yona okaalejamabi a mole-mobokea.

⁶ Aditi nongo ya, mojɔ bo angɔi o abala yo. Doani onjeni esika edaka yo asambi.

⁷ Na kɛni mbango a botɔndɔ bacingami bande bo angɔi a bogwa. Hokeani ko; iyo akɛkɛ boso bonu a Galile. Odini bomonɛ oko oho. Mojɔ mobali mbi mosi

⁸ Oko boa badonga a esɛmɔ bokpa, oko na bɔ na sepi enɛnɛ, na bapota mbango a bojebeja bacingami bande mojɔ momina.

⁹ Yesu ko asongana na bu, na abala bo, Niɛbɛ! Ibo babatama na nde, bamopea a bibota, na batita na magbunda a boso bonde.

¹⁰ Yesu abala na bu bo, Yɛni bobanga! Kɛni atɔndɔeni baninga bambi bo bakɛe a Galile. Badi botana mbi oko oho.

¹¹ Adaka bo a njea eboyana, bakina basoda pongono bakɛ a ngando, na batɔndɔ basuku banganga mijɔ mi misusu.

¹² Ibo babolea likita libasuku bangando a bobalana mojɔ momina. Bapa basoda likonja linɛnɛ.

¹³ Babala na bu bo, Balani bo bacingami bande badoi na bulu, na bamobi yana ahwɛki so hiɔ.

¹⁴ Gouverneur aka’ka mojɔ momina, iso bodi bokolea mojɔ na nde a boheleja no.

¹⁵ Oko boa basoda batomba likonja limina, na bakɔ o ama bo sɔ eleho. Mwako momina monangana a tei eBaYuda, na babalaka mojɔ momina oko busa bu.

Yesu Anɛnɛ Na Bacingami

¹⁶ Bacingami domi-na-omɔci bakɛ a Galile, a mokina mono, o ama bala Yesu na bu.

¹⁷ Yana ane bo Yesu, basumana ai yo, Bakina babu ko badaka na kitɛ.

¹⁸ Yesu abatama na bu, na abala na bu bo, Kpaci esusu epami ai mbi oho Diko na ya nase.

¹⁹ A mojɔ momina, kɛni, kɔni bacingami a makota masusu, na babatisani a kombe eSango na Mwana na Mwembo Mosɛnɔke.

²⁰ Bakojani bo bakɔe ngando jisusu iikoja mbi no, na mbi nâda na nu oko na bosusu.