Matayo 17 - Nouveau Testament en Ngombe 1961

Yesu Akindoa Elimo Etongo

¹ Yana ano masu masamano, Yesu abea Petɛlo, na Yakobo, na Yoane mwanange eYakobo. Akɛ na bu a diko dimono monɛne, oko bo buki pɛ.

² Iyo akindoa elimo etongo a boso bobu. Boso bonde bodaka na bolailai bomodika-busa. Bisenja binde bipua kanga bopɛɛ mɛnɛ.

³ Mose na Elia basaboloja a boso bobu, na basola na Yesu.

⁴ Pɛtɛlo abala na Yesu bo, Kumu, modi mojɔ mopele bo so bodae ya. Okapala, kina napike maako masato; dikina diwɛ, ditongo diMose, na ditongo koko diElia.

⁵ Yana abalaka yo boa, eyembi ebolailai ebahua oko bohua. Na kɔpi emana a eyembi bo, Iyo adi Mwana ’mbi ongɛnjɔ; nadi na nde sepi. Mohokeani.

⁶ Aka bo kɔpi emina, bacingami bakwa nase, maso mabu a kpɔtɔ, na baluluma na bɔ.

⁷ Yesu ko adoa, ababanda, na abala na bu bo, Angɔni; t’odaeni oko na bɔ.

⁸ Yana adipoa bo miso, banɛ oko Yesu yo buki pɛ, pɛpɛ okina otongo.

⁹ Yana atitaka bo a mono, Yesu ababekea bo, Yɛni botɔndɔ moto mojɔ mo’mi no nɛ, oko adi Mwana ’Moto pɛ bopeta ngɔ a bogwa.

¹⁰ Bacingami bamohɔjɔ bo, Basɔni babalaka bo Elia adi bopeta doa mojɔ moye?

¹¹ Yesu abasɔmbeja bo, Elia abwani bodoa soti a bobɔngeja ngando jisusu.

¹² Mbi ko natɔndɔkɔ no bo Elia adoa ehele, bato ko baimombetea, na bakɔ ai yo o apalaka bo. Bâdingoja Mwana ’Moto koko boa.

¹³ Oko boa bacingami bacingea bo abalaka na bu a mojɔ moYoane Mobatisi.

Yesu Aheleja Mwama-Momi

¹⁴ Amea bo a esika edaka emumu ebato, okina momi adoa ai Yesu, atita na magbunda a boso bonde na abala bo,

¹⁵ Kumu, ikea mwamomi ombi wa. Apekaka na lisiesie, na adi na jɔɔlɔ enɛnɛ, Akwaka ta mosa na madiba mandɛli-mandɛli.

¹⁶ Mbi nadoi na nde ai bacingami bawɛ, ibo ko pɛ bobwana bomoheleja a yogo.

¹⁷ Yesu amosɔmbeja bo, Elulu ye epeliti ejimeli, na edi elaboake. Mbi nadi boyeyoa na nu ekoka? Nadi bohɔnɔ mijɔ minu ekoka? Doani na mwana ai mbi.

¹⁸ Yesu alemoa na mwembo mobe, na momana ai yo; na mwamomi ahela oko bohela.

¹⁹ Yana adaka Yesu yo buki, bacingami bande badoa ai yo na bamohɔjɔ bo, Iso bobwaniti bomeja mwembo mobe cina eye?

²⁰ Yesu abala na bu bo, Cina bo ejimeli enu ehɛliti. Mbi nabalaka na no bo, Akɔki no da na ejimeli o adi mongua mosinape, ka obwanini bobala na mono mu bo modonge ya a bokɛ a esika etongo, na modi bodonga; na odini bohɔnɔ ngando jisusu.

²¹ Elimo ye emwembo ko edi bomana oko a mojɔ mobo’nga na ekia edia.

Mojɔ moBogwa na Bo’ngɔ BoYesu

²² Iyana adalaka bo a Galile, Yesu abala na bu bo, Badi bokaba Mwana ’Moto a mɔmɔ mabato babe.

²³ Badi bomowa, iyo ko ângɔ a busa bomasato, Ibo badaka na wa enɛnɛ a mojɔ momina.

Yesu Na Tako eTempelo

²⁴ Amea bo a Kapalanauma, baputeja batako etempelo badoa ai Pɛtɛlo na bamohɔjɔ bo, Mokoja onu aputaka tako etempelo?

²⁵ Iyo ajima, Ee. Yana akwea yo a ndako, Yesu ajeba mojɔ mua modaka a molema monde, na abala bo, Simona, wɛ olɛkɛ bo? Bakumu bangondo ye baputejaka bana babu bɛnɛ tako, isa midoa?

²⁶ Pɛtɛlo amosɔmbeja bo, Oko midoa. Yesu abala na nde bo, Isa edi boa, bana bataputa.

²⁷ Pe mojɔ, botapalaka bo bobakejae kɛlɛ. Kɛ adumbe bobɔ a madiba, osa ko owoe swi omɔci. Okamohwa a madiba, dipoa monɔkɔ monde na ônɛ ekenge elikonja ena. Tomba du na ôbapa a mojɔ mosu na wɛ.