Matayo 15 - Nouveau Testament en Ngombe 1961

BaPalusi na Mijɔ miBatata

¹ Bakina BaPalusi na basɔni baYelusalema badoa ai Yesu a ehole emina, na bamohɔjɔ bo,

² Bacingami bawɛ batasumaka mijɔ mibatata cina eye? Te basosake nongo mɔmɔ mabu a mojɔ mobo yaka.

³ Iyo abasɔmbeja bo, Ino bɛnɛ osopakani Mobeko moNjambe a mojɔ mongando jibatata mojɔ moye?

⁴ Mojɔ bo Njambe adumba mobeko bo, Toma suma sangwao na ngwao; na moto akasinga sangwa’nde isa ngwa’nde, abwani oko na bogwa.

⁵ Moto ko akabala na sangwa’nde isa ngwa’nde bo, Mbi nabwani bopa no eka yeye, naedikejai ko ai Njambe; ino obalakani bo moto omina aditi koko na ekina nongo ai sangwa’nde isa ai ngwa’nde.

⁶ Oko boa osɛtojakani Ebaeli eNjambe cina engando jibatata.

⁷ Ino bakosei! Ekenge ebala Yisaya ebwani na nu soti. Iyo abala bo,

⁸ Bato ba basumaka mbi na monɔkɔ. Milema mibu ko midi na mbi bohali.

⁹ Basakoaka mbi oko esakoasakoa; Mijɔ mikojaka bo midi oko mibeko mibato pɛ.

¹⁰ Yesu abea bato banɛnɛ ai yo na abala na bu bo, Hokeani na cingeani mojɔ mu.

¹¹ Moto t’abehake a mojɔ moeka yena ekweaka ta monɔkɔ monde. Modi oko mojɔ mua momanaka a monɔkɔ momoto mua momobejaka.

¹² Bacingami bande badoa ai yo, na babala na nde bo, Ojebaka bo BaPalusi basuboaka a mojɔ mobikenge bimi wɛ bala?

¹³ Iyo abasɔmbeja bo, Mele misusu midi Sangwa’mbi pɛ bona, mîpikoama oko bopikoama.

¹⁴ Kinani badae. Bagwa miso, na banejaka bato njea baya bagwa koko miso. Moto yona ogwa miso akaneja moto njea yona ogwa koko miso, bo basusu babae badi bokwa a libɛngɛ.

¹⁵ Petɛlo amosɔmbeja bo, Cingea so monde momina.

¹⁶ Yesu abala bo, Ino omanakinini a libumi?

¹⁷ Otacingeakani bo eka ekakwea ta monɔkɔ, enɔkɔ a sɔpɔ na emanaka a njima.

¹⁸ Mojɔ mua momanaka a monɔkɔ ko modongaka a molema; mua mobejaka moto oko mu.

¹⁹ Bileli bibe bimanaka a molema, na bowa, na bɔɔli, na lisɔngi, na liba, na bokosea, na minango.

²⁰ Ngando jia jibejaka moto oko ji. Moto ko akayaka, pe bopeta sosa mɔmɔ, mojɔ momina motamobejaka nongo mweka.

Mwali oKanana

²¹ Yesu adonga ena na akɛ a makota maTula na Sidona.

²² Okina mwali oKanana yona odaka a esika emina, amana na abekoa bo, Kumu, Mwana ’Dawidi, ikeani wa! Mwana’mbi mwali adi na monɔngo monɛnɛ a mojɔ momwembo mobe.

²³ Yesu ko aisɔmbeja nongo ekenge. Bacingami bande badoa ai yo na bamongɔɔnɔ bo, Moyaneja, mojɔ bo asusaka so na abekoakadea.

²⁴ Iyo ko asɔmbeja bo, Mbi nalomami oko ai bata babungake badenga diYisalaele.

²⁵ Mwali ko adoa, asumana ai yo, abala bo, Kumu, kɔmejani!

²⁶ Yesu amosɔmbeja bo, Ebɔngiti bo batombe milembe raibana bakɛkɛ bo bamidumbe ai bana-mbwa.

²⁷ Mwali ko abala bo, Ee, Kumu; bana-mbwa ko bayakaka mbumbu jimolɛmbɛ jia jikwaka a mesa mamoswa’bu.

²⁸ Yesu amosɔmbeja bo, Mwali, ejimeli ewe edi enene. Yɛ modae na we o apalaka wɛ, Na mwana’nde ahela oko a ehole emina.

Yesu a Galile

²⁹ Yesu adonga ena, ahula koko a libale liGalile, na akɛ akadae a mokina mono.

³⁰ Bato badoa ai yo banɛnɛ mɛne. Ibo badoa koko na bato bamitɛngu, bato baya bagwa miso, na bimimi, na babiɛmɛ, na batongo koko banɛnɛ. Babasambea a boso bonde na abaheleja.

³¹ Bato baemumu bakamoa bou yana anɛ bo bimimi bakabale, bo babiɛmɛ bahela, bamitɛngu bakadale, bato baya bama gwa miso basɔ njɛnɛ, na bakumeja Njambe oYisalaele.

Yesu Ayakeja Bato Koto Jinɛi

³² Yesu abea bacingami bande na abala na bu bo, Mbi nadi na wa a mojɔ mobato ba banɛne. Bayeyoi na mbi edɛye masu masato, na bapeliti eka eboyaka. Nitapalaka bo nabayanejae boa na nja, basaka kwa limama a njea.

³³ Bacingami bamohɔjɔ bo, Adi so ya a esika, iso bodi boboloja milɛmbɛ iɔ, mia mibwani na bato ba banɛnɛ?

³⁴ Yesu abahɔjɔ bo, Odini na milɛmbɛ meka? Ibo bɛ bo, Sambo, na bakina swi babojio.

³⁵ Oko boa Yesu apa monɔkɔ bo bato badae na mbondo.

³⁶ Atomba milɛmbɛ sambo na swi. Ajongoa, abuka milɛmbɛ na swi, apa bacingami bande, na bacingami bapa milɛmbɛ na swi ai bato baemumu.

³⁷ Ibo basusu bayaka na bagola. Bandoa koko bikenge bia bidika, na balumeja sanga sambo.

³⁸ Baya bayaka badaka bato bami koto iinɛi, pɛ bolanga bali na bɛngɛ pongono.

³⁹ Ngɔngɔ iimina, Yesu ayaneja bato, atamba a bwato, na akɛ a dɔngɔ diMagadala.