Malako 9 - Nouveau Testament en Ngombe 1961

¹ Abala na bu koko bo, Mbi natɔndɔkɔ no na soti bo bakina baya ba’mi yaya badi bonɛ bodoa boBokumu boNjambe na ndangasa oko bapetakini gwa.

Yesu Akindoa Elimo Etongo

² Yana anɔ masu masato, Yesu abea Pɛtɛlo na Yakobo na Yoane, bo akɛe na bu a mokina mono monɛnɛ, oko bo buki pɛ. Iyo akindoa elimo etongo a boso bobu.

³ Bisenja binde bipua bopɛɛ, oko na bolailai mɛnɛ; nongo nganga ebososa bisenja abwaniti bopueja bisenja boa.

⁴ Na lɔanɛ Elia na Mose baya badaka bakabale na Yesu.

⁵ Oko boa Pɛtɛlo abala na Yesu bo, Labi, mojɔ mopele mɛnɛ bo so bodae ya! Kina so bopike Inaako masato; dikina diwɛ, ditongo diMose, na ditongo koko diEha.

⁶ Aijeba na soti mojɔ mobobala, cina bo badaka na bɔ bonɛnɛ.

⁷ Eyembi ko etita na ebahua. Kɔpi emana a eyembi bo, Iyo adi mwana’mbi ongɛnjɔ; mohokeani.

⁸ Bundumo mɛnɛ, oko yana anjaka bo, bainɛ koko moto a esika emina; banɛ oko Yesu pɛ.

⁹ Yana atitaka bo a mono, yo abaleha bo batatɔndɔ nongo moto mojɔ monɛ bo, oko adi Mwana ’Moto pɛ bopeta ngɔ a bogwa.

¹⁰ Ibo babanea ekenge emina a milema mibu; bahojɔnɔ ko a tei ebu, a boduka cina ebongɔ a bogwa.

¹¹ Bahɔjɔ Yesu bo, Basɔni babalaka bo Elia adi bopeta doa mojɔ moye?

¹² Iyo abasɔmbeja bo, Eha adi bodoa soti a bobɔngeja ngando jisusu. Mosɔnɔ ko a mojɔ moMwana ’Moto modi bo? Modi oko bo adi bodingoa bou, na âlonama na bato.

¹³ Mbi ko natɔndɔkɔ no bo Elia adoa eyou, na bato bakɔ na nde o apalaka bo; mojɔ monde modi a Misɔnɔ boa.

Yesu Aheleja Mwamomi a Yogo

¹⁴ Yana amea bo ai bacingami, banɛ bo bato banɛnɛ babahikaka, na bo basɔni babomaka na bu kitɛ.

¹⁵ Emumu ebato ko, yana anɛ bo Yesu, bakamoa na bokamoa bonɛnɛ. Bapota ai yo a bomobɛjɛ njɛbɛ.

¹⁶ Yesu abahɔjɔ bo, Mijɔ mibalaka no midi bo?

¹⁷ Okina moto yona odaka a tei ebu amosɔmbeja bo, Mokoja, mbi nadoi na mwana’mbi momi ai wɛ, mojɔ bo adi na mwembo moengomba.

¹⁸ Mwembo mokamopea, momodumbaka bisekpe; mapuli mamanaka a monɔkɔ monde; asakokalaka mino, na ahɔngɔkɔ. Mbi nagɔɔnɔki bacingami bawɛ bo bamejae mwembo; ibo ko bahɔniti bomo-meja.

¹⁹ Yesu abala na bu bo, Elulu ye epɛndɔ! Mbi nadi boda na nu ekoka? Nadi bohɔnɔ no ekoka? Doani na mwana ai mbi.

²⁰ Oko boa badoa na mwana ai yo. Yana anɛ yo Yesu, mwembo mopea mwana na bopipo. Akwa gbu, asadumba mangbendele, na mapuli mamana a monɔkɔ monde.

²¹ Yesu ahɔjɔ sange ’mwana bo, Adi boa ekoka? Iyo asɔmbeja bo, Oko adaka yo mwana mokɛkɛlɛkɛ;

²² momodumbaka bihole binɛnɛ a mosa na a madiba bo momowoe. Wɛ ko, isa obwani bokɔ mokina mojɔ, ikea so wa; kɔmeja so.

²³ Yesu abala na nde bo, Isa obwani bokɔ! Isa moto ajimaka, ngando jisusu jibwani bokɔɔmɔ ai yo.

²⁴ Sange ’mwana abekoa bokpa bo, Mbi najimaka; bɔmeja mbi a mojɔ mokitɛ embi.

²⁵ Yana anɛ Yesu bo bato bambambaka, abala na mwembo mobe bo, Wɛ, mwembo moengomba na bohoka, imana ai yo; t’okwee oko a tei ende na ikina.

²⁶ Mwembo mogama, momodumba mangbendele, na momana ai yo boa. Mwana ko adika o mogo, na bato banɛnɛ babala bo, Agwi!

²⁷ Yesu ko amopea ebɔ, amongɔjɔ, na ama mema.

²⁸ Yana akwea bo koko a ndako, bacingami bamohɔjɔ bo, Iso bohɔniti bomomeja mojɔ moye?

²⁹ Iyo abala na bu bo, Tungu emina edi bomana oko a mojɔ mobo’nga pɛ.

Mojɔ moBogwa boYesu

³⁰ Badonga a esika emina, na lɔalena njea eGalile. Yesu ko aipala bo bato bajebe mojɔ momina.

³¹ Mojɔ bo akojaka bacingami bande, na abala na bu bo, Mwana ’Moto adi bokwa a mɔmɔ mabato babe, na badi bomowa; iyo ko adi bongɔ na masu masato.

³² Ibo ko baicingea ekenge emina, na baimohɔjɔ a mojɔ mobɔ.

Mosoo moBacingami

³³ Bamea a Kapalanauma, na yana adaka bo a ndako tei, Yesu abahɔjɔ bo, Mijɔ mibalanaki no a njea midaki bo?

³⁴ Ibo badaka oko bogɔ, cina bo bama bomana kitɛ a mojɔ mobosuku.

³⁵ Iyo adana mobondo, abea bacingatni domi-na-babae, na abala na bu bo, Isa okina apalaka bo adae boso, yɛ adae oko suka, na mokɔmɛli obasusu batongo.

³⁶ Atomba koko mwana mokɛkɛlɛkɛ, amodeja a ndanda ebu, amodinga na mɔmɔ mande, na abala na bu bo,

³⁷ Moto na moto yona osɔkɔ bopele okina mwana mokɛkɛlɛkɛ o boa, asɔkɔ mbi; na yona osɔkɔ mbi, asɔkɔ yona olomani, te mbi.

³⁸ Yoane abala na nde bo, Mokoja, iso bo’ni okina moto akamejae miembo mibe a kombe ewɛ, na bolemoi na nde, mojɔ bo atacingamaka na su.

³⁹ Yesu ko abasɔmbeja bo, T’omolembeni oko; mojɔ bo, moto akakɔ mondumba a kombe embi, ebaeli ende a mojɔ mombi etada nongo ebalabala.

⁴⁰ Yona oditi na su soki adi a dɔngɔ disu.

⁴¹ Mbi natɔndɔko no na soti bo moto akapa no kɔpɔ emadiba mabomwa cina bo odini bato baMasiya, atataka bosɔ ndese ende.

⁴² Moto ko akasakeja okina obana ba bakɛkɛlɛkɛ baya bajimeaka mbi, enɔi na bopele bo bakande litai linɛnɛnɛ a dɔli dinde bo bamodumbe a madiba.

⁴³ Okakɔ bobe cina eebɔ ewɛ, tɛndɔ ebɔ emina. Na bokwea a bomɔ na eyɛmɛ, na bokwea a Gehena na mɔmɔ mabae, oko a mosa mua modi na bosusu, enɔi na bopele bo moto akwee a bomɔ na eyɛmɛ.

⁴⁴ Okakɔ bobe cina eebota ewɛ, tɛndɔ ebota emina.

⁴⁵ Na bokwea a bomɔ na motɛngu, na bokwea a Gehena na bibota bibae,

⁴⁶ enɔi na lɔopele bo okwee a bomɔ oko na motɛngu.

⁴⁷ Okakɔ bobe cina ediso diwɛ, ihwa diso dimina. Na bokwea a Bokumu boNjambe na diso dimɔci, na bodumbama a Gehena na miso mabae, bokwea a Bokumu boNjambe na diso dimɔci lɔonɔi na bopele,

⁴⁸ mojɔ bo ngusu babu batagwa a Gehena, na mosa motadimea oho.

⁴⁹ Bahengaka masiko malitumbu na mukwa, na bahengaka moto na moto oko na mosa.

⁵⁰ Mukwa modi eka epele; mokabeha ko, modi bobɔngɔ koko na ye? Dani na mukwa a tei enu bɛnɛ, na dani na bowi, moto na mina ’nde moto.