Malako 5 - Nouveau Testament en Ngombe 1961

Moto Akela a Mwembo Mobe

¹ Bamea a dɔngɔ ditongo dilibale, a ngunda eBaGelasa.

² Ama yo duboa a bwato, okina momi ami songana oko na nde. Iyo amana a bisɛmɔ, na adaka na mwembo mobe.

³ Moto omina ahwɛkɛ oko a bisɛmɔ pɛ. Baihɔnɔ bomodeja bogo, nongo na minyɔlɔ.

⁴ Bamosa mikɛsɛ, na bamokanda na minyɔlɔ bihole hinɛnɛ. Iyo ko atwa minyɔlɔ, na abuka mikɛsɛ. Pɛpɛ nongo moto ohɔnɔ bomogbokeja.

⁵ Iyo abekoaka na asakwɛlɛkɛ na matai na bulu na moi, a bisɛmɔ na a meno.

⁶ Yana anɛ yo Yesu bohali, apota ebango, na asumana a boso bonde.

⁷ Abekoa na bopipo bo, Yesu, Mwana oNjambe oBonɔ, mojɔ mosu na wɛ modi bo? Mbi nangɔɔnɔkɔ wɛ a kombe eNjambe bo otadingoja mbi.

⁸ Gina bo, Yesu ama bala na nde bo, Wɛ mwembo mobe, imana ai moto omina.

⁹ Yesu amohɔjɔ bo, Kombe ewɛ nda? Iyo asɔmbeja bo, Kombe embi Lindundu, mojɔ bo, bodi banɛnɛ.

¹⁰ Angɔɔnɔ Yesu na bopipo bo atayaneja miembo a ngunda emina.

¹¹ Bwela bonɛnɛ bongulube bodaka a boyaka, a dɔngɔ dimono.

¹² Oko boa, miembo mingɔɔnɔ Yesu bo, Loma so ai ngulube bo bokwee a tei ebu.

¹³ Iyo ajima bo bakɔe boa. Miembo mibe mimana, mikwea a tei engulube, na babikoa mbango a mono, basadumba a madiba na bagwa a madiba. Ngulube badaka koto jibae na dea a bwela bomina.

¹⁴ Banjeli bangulube bacia, batɔndɔ mojɔ momina a ngando na a likota dia lisusu. Oko boa, bato badoa a bokokeleja mojɔ.

¹⁵ Yana amea bo ai Yesu, banɛ moto omiembo mibe na mobondo a esika emina. Adaka na bisenja; adaka koko na yongi epele, oko yona odaka boso na lindundu limiembo. A mojɔ momina, badaka na bɔ.

¹⁶ Bato baya banɛ mojɔ babatɔndɔ mojɔ mosusu momoto omiembo tnibe, na ngulube.

¹⁷ Oko boa babanga bongɔɔnɔ Yesu bo adonge a ngunda ebu.

¹⁸ Atambaka yo a bwato, moto yona omaka da na miembo mine ami ’ngɔɔnɔ oko Yesu njea a bokɛ na nde.

¹⁹ Iyo ko aijima. Abala na nde bo, Kɛ a ngando ewɛ, ai bato bawɛ mɛnɛ. Batɔndɔ mojɔ mosusu mokɔi Kumu ai wɛ, na bo aokei wa.

²⁰ Oko boa ayana na abanga botɔndɔ a Dekapoli mojɔ monɛnɛ mokɔ Yesu ai yo. Bato basusu bakamoa bou a mojɔ momina.

Mwamwali oYailo

²¹ Yesu alekela koko na bwato, na amea a ngunda etongo. Bato batitana ai yo banɛnɛ mɛnɛ yana adaka yo a mbongu.

²² Okina mosuku osinagoge adoa koko, kombe ende Yailo. Yana anɛ yo Yesu, atita na magbunda a boso bonde.

²³ Amongɔɔnɔ bo, Mwamwali ombi mokɛkɛ atimbaka oko botimba. Doa omobakee mɔmɔ a boseja yogo ende bo ahele.

²⁴ Yesu akɛ na nde; bato batongo banɛnɛ badaka bacingi na nde engbanga, na bamombambamejaka.

²⁵ Okina mwali omɔci apekaka na ekia bianga domi-na-bibae.

²⁶ Iyo adingoa bou a mɔmɔ manganga basengo, na amaja likonja linde lisusu; yogo ende ko eisɔkɔtɔnɔ nongo; ehɛ oko bohɛ.

²⁷ Iyo aka mojɔ moYesu, na adoa ngɔngɔ jinde a tei eemumu ebato. Abɛnjɛ kasaka ende na ebɔ,

²⁸ mojɔ bo ama bala bo, Nakabɛnjɛ oko bisenja binde na ebɔ, nadi bohela a yogo embi.

²⁹ Oko boa ekia ende ekoka bokpa mɛnɛ, na aka a mokuku monde bo yogo ende esia.

³⁰ Yesu ko asipoa bo ngulu emana ai yo. Ahekoa bokpa a tei ebato, na ahɔjɔ bo, Obɛnjɛi bisenja bimbi nda?

³¹ Bacingami bande bajɔ na nde bo, Onɛkɛ bo bato bambambejaka wɛ boa na ohɔjɔkɔ bo, Obɛnjɛi bisenja bimbi nda?

³² Iyo ko anja isa adi lɔonɛ moto yona omobɛnjɛ.

³³ Mwali omina ko ajeba bo mojɔ momina mokwa oko ai yo. Oko boa amana na bɔ na mongongoma. Asadumba a boso bonde na amotɔndɔ mojɔ mosusu.

³⁴ Yesu ko abala na nde bo, Mwana’mbi, ejimeli ewɛ ehelejai wɛ. Yana na bowi. Hela a monɔngɔ mowɛ.

³⁵ Yana abalaka yo, bato bandako emosuku osinagoge bamea na mwako bo, Mwana’wɛ agwi. Yɛ bonɔngeja Mokoja.

³⁶ Yesu ko, aka yo mojɔ momina, abala na mosuku osinagoge bo, Yɛ bobanga; jima oko bojima.

³⁷ Yesu ajima bo Pɛtɛlo na Yakobo na Yoane mwanange eYakobo bakɛe na nde, pɛpɛ moto otongo.

³⁸ Yana amea bo a ndako emosuku osinagoge, Yesu anɛ oko wokowoko pɛ, na bato banɛnɛ baya bayeaka na balɛbɛkɛ.

³⁹ Akwea yo a tei, abahɔjɔ bo, Mojɔ modi bo? Oyeakani mojɔ moye? Mwamwali agwiti, ahwɛkɛ oko hiɔ pɛ.

⁴⁰ Ibo ko bamosɛkɛ oko bosɛkɛ. Oko boa abameja basusu sokolu. Abea sango na nango, na baya badaka na nde mɛnɛ, na akwea a ekenge endako edaka mwana.

⁴¹ Amopea ebɔ, na abala na nde bo, Talita kumi. Gina emina edi, Mwamwali, mbi nabalaka na wɛ; angɔ.

⁴² Mwamwali angɔ bokpa mɛnɛ, na adala, mojɔ bo adaka na bianga domi-na-bibae. Ibo bakamoa na bokamoa bonɛnɛ.

⁴³ Iyo ko abaleha na bopipo bo batajebeja bato mojɔ momina. Apa koko monɔkɔ bo bapɛ mwamwali dia diboyaka.