Malako 16 - Nouveau Testament en Ngombe 1961

Yesu Angɔ a Bogwa

¹ Iyana asia busa boSabata, Malia oMagadala, Malia nange eYakobo, na Salome, basomba malasi bo bakɛe a bomosuoa malasi.

² Bakɛ a esɛmɔ a busa boboso, oko ehuma mɛnɛ yana ahoa busa.

³ Bahɔjɔnɔ bo, Odi bohilingoja litai a mojɔ mosu nda, a bodipoa monɔkɔ moesɛmɔ? Mojɔ bo litai limina lidaka linɛnɛ mɛnɛ.

⁴ Yana ko anja bo, banɛ bo litai lima hilingojama.

⁵ Akwea bo a esɛmɔ, banɛ okina mwenga yona odaka na mobondo a dɔngɔ diebɔ ebami, na alwaka kasaka eyai epu. Ibo bagasima na bɔ.

⁶ Iyo ko abala na bu bo, Yɛni bobanga! Odukakani Yesu oNasaleta yona ogwabi a mole-mobokea. Iyo angɔi a bogwa. Aditi nongo ya. Anjani esika edaka yo asambi.

⁷ Kɛni ko; tɔndɔni bacingami bande na Pɛtɛlo bo yo akɛkɛ boso bonu a Galile. Odini bomonɛ oko oho, o abala yo na nu.

⁸ Bali bamana a esɛmɔ, na bacia, mojɔ bo badaka na bɔ na mongongoma. Baijebeja ko nongo moto, mojɔ bo badaka oko na bɔ.

Yesu Anɛnɛ na Bacingami

⁹ Yana amana Yesu a esɛmɔ a busa boboso, asaboloja boso mɛnɛ ai Malia oMagadala yona oma hela na nde a miembo mibe sambo.

¹⁰ Iyo akɛ a botɔndɔ bacingami bande yana ayeaka bo kɔndɔ.

¹¹ Ibo ko, yana aka ’bo bo Yesu adi mɔ, na bo yo amonɛ, baijima nongo.

¹² Ngɔngɔ jimina, asaboloja ai bakina babu babae na elimo etongo, yana adalaka bo a njea eesika.

¹³ Bahula a bojebeja bacingami batongo; ibo ko baijima nongo.

¹⁴ Suka mɛnɛ, asaboloja ai bacingami domi-na-omɔci yana adaka bo a mesa. Alemoa na bu cina ekitɛ ebu, na a mojɔ mobopipo bomilema mibu, mojɔ bo baijima bato baya bamonɛ yana angɔ yo a bogwa.

¹⁵ Abala na bu koko bo, Kɛni a ngondo esusu; tɔndɔni bato basusu boya Mwâko Mopele.

¹⁶ Yona ôjima na ôbatisama a kombe embi âhela. Yona odi pɛ bojima ko âdumbama.

¹⁷ Baya bâjima badi bokɔ bimbete bi; lɔâmeja miembo mibe a kombe embi. Bâbala na kɔpi jitongo.

¹⁸ Bâpea njɔ na tnɔmɔ, na baka’mwaka ekina eka yena ebwani bowa, batapeka nongo. Bâbakea mɔmɔ mabu ai bato babego, na badi bohela.

¹⁹ Oko boa, yana abala yo na bu, Kumu Yesu atombama oho Diko, na ada a ebɔ ebami eNjambe.

²⁰ Ibo ko bakɛ, na batɔndɔ Mwako Mopele a bisika bisusu. Kumu abakɔmeja a elomu, na angameja Ebaeli na bimbete bia bidaka bicingi na Ebaeli.