Malako 12 - Nouveau Testament en Ngombe 1961

Mondɛ moBasali Babe

¹ Yesu abanga bobatɔndɔ koko mindɛ bo, Okina moto ana gbie evine. Aehika na mongba. Alonga mombɔndɔ a mojɔ moeboka. Apika ndako. Akina gbie a mɔmɔ mabasali, na akɛ mɔngɔ mobohali.

² Yana akpeta mbuma, yo aloma mokɔmɛli ai basali bo asɛ libondo limbuma jigbie.

³ Ibo ko bapea mokɔmɛli, bamotua, na bamoyaneja boa ngasa.

⁴ Abalomea koko okina mokɔmɛli otongo. Babeneja mokɔmɛli omina a molo, na bamosamboja.

⁵ Aloma koko okina otongo, na bamowa oko bowa. Aloma koko batongo banɛnɛ. Batua bakina babu, na bawa batongo.

⁶ Iyo adika na omɔci pɛ, oko mwana’nde mɛnɛ ongɛnjɔ. Suka mɛnɛ, abamolomea yo. Abala bo, Badi bosuma mwana’mbi.

⁷ Basali ko babalana bo, Sangoli yona! Kɔni bomowoe, nongo bosangoe so bɛnɛ.

⁸ Bamopea, bamowa, na bamodumba a sokolu egbie.

⁹ Iyo moswa ogbie âkɔ bo? Adi bodoa, âwa basali bamina, na âpa gbie ai batongo.

¹⁰ Ino olangakinini mojɔ mu a Misɔnɔ? Litai lidumbi bayoi Lidi edɛye litai limogbukusu.

¹¹ Njambe akɔi mojɔ mu, Na modi mojɔ mobokamoa a miso masu.

¹² Bakenga bomopea; badaka ko na bɔ a mojɔ mobato. Basipoa bo Yesu abala mondɛ momina oko na bu. Oko boa bamokina na bayana.

Lihɔjɔ liBaPalusi

¹³ Bamolomea bakina BaPalusi na baElode, bo bamogegeanejae na bibaeli binde.

¹⁴ Ibo badoa, na babala na nde bo, Mokoja, iso bojebaka bo wɛ odi moto osoti. Otabangaka nongo moto, mojɔ bo ekumu ebato edi eka engasa a miso tnawɛ, na okojaka njea eNjambe na soti mɛnɛ. Ebɔngi bo bopute Kaisala tako isa ebɔngiti?

¹⁵ Bobwani bopa isa botapa? Yesu ko anɛ poloso ebu, na abasɔmbeja bo, Odingeakani mbi mojɔ moye? Panini ekina flanka bo naenje.

¹⁶ Badoa na Banka, na yo abahɔjɔ bo, Elimo ye na mosɔnɔ mu monda? Ibo basɔmbeja bo, Oko moKaisala.

¹⁷ Na Yesu abala na bu bo, Kabani ai Kaisala libondo liKaisala, na libondo liNjambe oko ai Njambe. Oko boa abakamoja bou mɛnɛ.

Lihɔjɔ liBaSadoki

¹⁸ Bakina Basadoki badoa ai yo pongono. Ibo bajimaka bo bongɔ a bogwa boditi.

¹⁹ Bamobɔjɔ bo, Mokoja, Mose asɔnea so mobeko bo momi akagwa, na akakina mwali ngasa, pɛpɛ bana, mwananango adi bosɔ mwali bo abote na nde bana ai mwangwa’nde.

²⁰ Oko boa bananange jibato badaka sambo. Yona mosuku asɔ mwali, na agwa pɛ bobota nongo mwana.

²¹ Yona mbakeli onde asɔ mwali onde, na yo agwa pongono, pɛ ko bobota nongo mwana; yona obasato koko boa.

²² Ibo basusu sambo bamosɔ boa, na bagwa, pɛ ko bokina mwana. Suka mɛnɛ, mwali agwa pongono.

²³ Oko boa, bagwake baka’ngɔ, yo adi boda mwali onda? Mojɔ bo adaka mwali obu basusu sambo.

²⁴ Yesu abasɔmbeja bo, Ino otacingeakani Misɔnɔ na ngulu eNjambe. A mojɔ momina, odini na libunga.

²⁵ Mojɔ bo, bato bakangɔ a bogwa, batasɔ nongo bali, na batahanga bali ta meki; badi boda o babwɛnji baDiko.

²⁶ A mojɔ mobo’ngɔ bobagwake, olangakinini mojɔ molipumba a mokanda moMose? Njambe abala na nde bo, Mbi nadi Njambe oAbalayama, Njambe oIsaka, Njambe oYakobo

²⁷ Iyo aditi Njambe obagwake; adi oko Njambe obaya badi mɔ. Ino odini na libunga linɛnɛ.

Lihɔjɔ liBasɔni

²⁸ Okina obasɔni ahokea mijɔ mibalanaka bo. Yana anɛ yo bo Yesu alonga na masɔmbeja mande, abatama na nde, na amohɔjɔ bo, Mobeko mua monɔi mibeko misusu mitongo modi bo?

²⁹ Yesu amosɔmbeja bo, Mobeko moboso modi oko mu; Hokea Yisalaele! Kumu, Njambe osu, Kumu adi oko yo omɔci pɛ.

³⁰ na Toma pala Kumu Njambe owɛ na molema mowɛ mosusu, na mwembo mowɛ mosusu, na bolɛ bowɛ bosusu, na ngulu ewɛ esusu.

³¹ Mobeko momibae modi oko mu; Toma pala motuteano mowɛ o asapalaka wɛ mɛnɛ. Mobeko mua monɔi mibeko mimina moditi.

³² Mosɔni abala na nde bo, Bopele mɛnɛ Mokoja. Olongi soti yana abali wɛ bo, Iyo adi oko omɔci, na pɛpɛ okina otongo odi, oko Iyo pɛ.

³³ Epaeli emolema mosusu, na bolɛ bosusu, na ngulu esusu, enɔi bipeeli na masiko masusu.

³⁴ Yana anɛ Yesu bo asɔmbeja na bowɛi, abala na nde bo, Wɛ oditi na Bokumu boNjambe bohali. Pɛpɛ nongo moto otongo ko okenga bomohɔjɔ mahɔjɔ a mojɔ mobɔ.

Lihɔjɔ liYesu

³⁵ Adaka Yesu akakojae a tempelo, abala bo, Basɔni babalaka bo Masiya adi Mwana oDawidi mojɔ moye?

³⁶ Mwembo Mosɛnɔke mobaleja Dawidi yo mɛnɛ, yana abala yo bo, Kumu abali na Kumu ombi bo, Da a ebɔ embi ebami, Oko a ehole êdumba mbi soki jiwɛ A cina jibibota biwɛ.

³⁷ Isa Dawidi yo Inɛnɛ amobeaka Kumu, adi boda mwana’nde na ye?

³⁸ Bato baemumu enɛnɛ bamohokea na sepi. Yana akojaka yo, Yesu abala bo, Toma dingani a mojɔ mobasɔni. Ibo bapalaka bolwa bisenja biyai-biyai a bongɛ bisika na bisika. Bapalaka bo bato bababɛjɛe njɛbɛ a jando;

³⁹ Bapalaka bidie biboso a sinagoge, na bisika bia binɔi na bopele a malɔonje.

⁴⁰ Bayakaka ndako jibali-babogwa, na bakoseaka mojɔ oko na bingeeli biyai-biyai. Ibo bâsamba na bopipo mɛnɛ.

Epeeli eMwali-Obogwa

⁴¹ Yesu adaka a edie a dɔngɔ diesei ebipeeli, na anjaka bato baya basaka likonja a esei ebipeeli. Bakina bato balikonja basa bipeeli binɛnɛnɛ.

⁴² Okina mwali-obogwa ko adoa, moto obokwali. Iyo asa bikenge bilikonja bibojio bibae bia bibwani na likota limɔci pɛ.

⁴³ Yesu abea bacingami bande, abala na bu bo, Mbi natɔndɔkɔ no na soti bo epeeli epi mwali-obogwa yona obokwali, enɔi bipeeli bibu basusu baya basi bipeeli a esei.

⁴⁴ Mojɔ bo, ibo basi oko libondo likɛkɛlɛkɛ pɛ lilikonja libu linɛnɛ. Iyo ko, nongo adi yo na taka, asi likonja linde kanga lisusu mɛnɛ, oko likonja lisusu lia lidaka na nde a mojɔ moboyaka.