Malako 10 - Nouveau Testament en Ngombe 1961

MoJɔ moBolongana

¹ Yesu adonga a esika emina, akaa Yoladene na akɛ a ngando jiYuda a dɔngɔ dia. Bato banɛnɛ mɛnɛ batitana ai yo, na abakoja o akɔkɔ yo bihole bisusu.

² BaPalusi badoa ai yo, na bamohɔjɔ na ndingea isa momi abwani boyaneja mwali onde.

³ Iyo abasɔmbeja bo, Mobeko modumbea Mose ai no modi bo?

⁴ Ibo babala bo, Mose ajima bo moto akapa mwali onde mokanda mobobɔtɔnɔ, abwani bomoyaneja.

⁵ Yesu abasɔmbeja bo, Mose asɔnea no mobeko momina cina ebopipo bomilema minu.

⁶ A libangake ko, yana ayoa Njambe ngondo, Abakɔ momi na mwali.

⁷ A mojɔ momina, momi adi bokina sangwa ’nde na ngwa ’nde a bokatana na mwali onde,

⁸ bo basusu babae badae oko munu momɔci. Oko boa baditi koko babae, badi oko omɔci pɛ.

⁹ Njambe akabakataneja, t’okine oko moto ababɔtejae.

¹⁰ Adaka bo a ndako tei bacingami bande bamohɔjɔ koko a mojɔ momina.

¹¹ Iyo abala na bu bo, Moto akayaneja mwali onde na akasɔ otongo, angɛkɛ na nde bɔɔli.

¹² Na mwali akadonga ai muma ’nde bo akɛe ai momi otongo, mwali omina angɛkɛ bɔɔli.

Yesu Apamboa Bana Bakɛkɛlɛkɛ

¹³ Bato badoa na bana bakɛkɛlɛkɛ ai yo bo ababakee mɔmɔ mande. Bacingami bande ko balemoa na bato baya batombaka bana.

¹⁴ Yana anɛ Yesu mojɔ momina akɛnjɔ oko bokɛnjɔ, na abala na bu bo, Kinani bana bakɛkɛlɛkɛ badoe ai mbi; yɛni bobasia, mojɔ bo Bokumu boNjambe bodi oko ai bato baya badi o bana baba.

¹⁵ Mbi natɔndɔkɔ no na soti bo moto amiti sɔ Bokumu boNjambe o eltɔmɛli emwana mokɛkɛlɛkɛ, atakwea nongo ena.

¹⁶ Oko boa abatomba a mɔmɔ mande, ababakea mambu na abapamboa.

Konji Ahɔjɔ Yesu Lihɔjɔ

¹⁷ Amana Yesu a bodala a njea, moto omɔci apota ai yo. Atita na magbunda a boso bonde na amohɔjɔ bo, Mokoja mopele, êkɔ mbi ndeni bo nasangoe bomɔ bua bodi na bosusu?

¹⁸ Yesu abala na nde bo, Obeaka mbi mopele mojɔ moye? Pɛpɛ nongo omɔci odi mopele, oko Njambe pɛ.

¹⁹ Ojebaka mibeko; T’ongɛe oko bɔɔli; t’owoe oko moto; t’obe oko; t’otate oko tati ebokosea; t’okosee oko mojɔ; toma da na lisuma ai sangwao na ngwao.

²⁰ Moto omina amosɔmbeja bo, Mokoja, mbi namisumaka misusu, donga oko a bwɛngɛ bombi.

²¹ Yesu amonja na amopala. Abala na nde bo, Mojɔ motakaka na wɛ oko momɔci pɛ; kɛ angɛje leka lowɛ losusu. Pa likonja limina ai bato baya badi na bokwali, na ôda na likonja linɛnɛ liyumu oho Diko. Osa ko odoe a bocingama na mbi.

²² Ama yo ka ekenge emina, ami yana oko na wa enɛnɛ, mojɔ bo adaka na makonja manɛnɛ.

²³ Yesu ahekoja miso a mɔngɔ masusu. Abala na bacingami bande bo, Baya badi na likonja linɛnɛ badi bokwea a Bokumu boNjambe oko na kpɔkɔsɔ.

²⁴ Bacingami bakamoa a mojɔ mobikenge bia binde. Iyo ko abala na bu koko bo, Bana, bato bakabakea milema mibu oko a likonja pɛ, badi bokwea a Bokumu boNjambe oko na kpɔkɔsɔ mɛnɛ.

²⁵ Kamela adi bonɔ a lipese litonga oko moto olikonja akweakini a Bokumu boNjambe.

²⁶ Ibo bakamoa bou mɛnɛ a mojɔ momina, na babalana bo, Ekada boa, odi bohela nda?

²⁷ Yesu abanja, na abala bo, Mojɔ mu modi bogbasoa na bato; motagbasoa ko na Njambe. Mojɔ bo Njambe abwani bokɔ ngando jisusu.

²⁸ Pɛtɛlo abanga bobala na nde bo, Hokea; iso bokina leka losusu a bocingama na wɛ.

²⁹ Yesu amosɔmbeja bo, Mbi natɔndɔkɔ no na soti bo, Moto na moto yona okina ndako, isa bananango, isa ngɛnɛ, isa sango, isa nango, isa mwali, isa bana, isa gbie, a mojɔ mombi, na a mojɔ moMwako Mopele,

³⁰ atadimboa bosɔ likabo lia linɔi; a ngondo yeye, oko ndako, na bananango, na ngɛnɛ, na banango, na bana, na gbie, ee na minɔngɔ pongono; na bomɔ bua bodi na bosusu a ngondo ebodoa.

³¹ Banɛnɛ ko baya badi boso edɛye badabi oko ngɔngɔ, na banɛnɛ baya badi ngɔngɔ edɛye badabi oko boso.

Mojɔ moBogwa boYesu

³² Adaka bo a njea a bokɛ a Yelusalema, Yesu adaka akadale a boso bobu. Bato baya badaka bacingi na nde ngɔngɔ badaka na mokakwano na bɔ. A mojɔ momina, yo ababea koko, oko Domi-na-babae, na abajebeja ngando jia jidi bokwa na nde.

³³ Abala bo, Hokeani; iso bokɛkɛ a Yelusalema, na Mwana ’Moto âkabama ai basuku banganga na ai basɔni. Ibo bâjima bo agwɛ, na bâmopa a mɔmɔ mabapakano

³⁴ baya bâmopɔmbeja, bâmotuea masɔi, bâmotua, na bâmowa. Iyo ko ângɔ koko a busa bomasato.

Bonga boYakobo na Yoane

³⁵ Yakobo na Yoane, bana baSebede, badoa ai Yesu. Babala na nde bo, Mokoja, iso boka’nga wɛ mokina mojɔ, bopaka bo okɔe mojɔ momina ai so.

³⁶ Iyo abahɔjɔ bo, Mojɔ mopalaka no bo nakɔe ai no modi bo?

³⁷ Ibo bamosɔmbeja bo, Jima bo so bodae, okina a ebɔ ewɛ ebami, na otongo a ebɔ ewɛ ebali a ekumu ewɛ.

³⁸ Yesu ko abala na bu bo, Otacingeakani mojɔ mongaka no. Ino obwanini bomwaka kɔpɔ emwakaka mbi? Obwanini bobatisama na batisimo embi?

³⁹ Ibo bamosɔmbeja bo, Bobwani. Yesu ko abala na bu bo, Ômwakani soti kɔpɔ emwakaka mbi, na ôbatisamani na batisimo embi.

⁴⁰ Endele ko, moditi mojɔ mombi a bopa edie a ebɔ embi ebami, isa a ebɔ embi ebali. Bihɛngɛmɛ oko ai bato baya bahɔmɔ a mojɔ momina.

⁴¹ Yana aka bacingami batongo domi mojɔ mu, bakɛnjɔ na Yakobo na Yoane.

⁴² Yesu ko ababea, abala na bu bo, Ino ojebakani bo bakumu bamakota basakumejaka a boso bobu, na basuku babu badi na kpaci ai bato.

⁴³ Ino ko oditini nongo boa. Yona opalaka adae mosuku onu, yɛ adae mokɔmɛli onu.

⁴⁴ Na isa okina onu apalaka boda boso bonu, yɛ adae mobuli obasusu.

⁴⁵ Mojɔ bo Mwana ’Moto yo mɛnɛ adoi, te bo bamokɔmɛe, oko bo akɔmɛe bato, na apɛ mohelo monde lisiko libato banɛnɛ.

Balatimai

⁴⁶ Bamea a Yeliko. Adonga yo a Yeliko na bacingami bande na bato batongo banɛnɛ, Balatimai, mwana ’Timai, moto omiso mago, adaka a dɔngɔ dinjea a bo’nga linga.

⁴⁷ Yana aka yo bo edi Yesu oNasaleta, abanga bobekoa bo, Yesu, Mwana ’Dawidi, ikeani wa!

⁴⁸ Bakina balemoa na nde bo adae bogo; yo ko ahɛjɛ hingi, na ahekoa na bopipo bo, Wɛ Mwana ’Dawidi, ikeani wa!

⁴⁹ Yesu ama oko bo’ma, na abala bo, Mobeani adoe. Babea moto omiso mago, bajɔ na nde bo, Titeja molema, angɔ, abeaka wɛ.

⁵⁰ Iyo adumba kasaka ende eyai, angɔ bokpa, na adoa ai Yesu.

⁵¹ Yesu abala na nde lɔo, Opalaka bo nakɔe ndeni a mojɔ mowɛ? Moto omiso mago amosɔmbeja bo, Moswa’mbi, yɛ nasɛ njɛnɛ embi.

⁵² Yesu abala na nde bo, Yana; ejimeli ewɛ ehelejai wɛ. Oko boa asɔ njɛnɛ ende lɔokpa, na acingama na Yesu a njea.