Luka 21 - Nouveau Testament en Ngombe 1961

Epeeli eMwali-oBogwa

¹ Yesu angɔjɔ miso na anɛ konji baya basaka bipeeli bibu a nguku ebipeeli.

² Anɛ koko okina mwali-obogwa, moto obopu mɛnɛ, na yo asa sentini jibae.

³ Na Yesu abala bo, Mbi natɔndɔkɔ no na soti bo, epeeli esi mwali-obogwa yo obopu enɔi bipeeli bibu basusu.

⁴ Mojɔ bo, ibo basusu batongo bapi oko libondo likɛkɛ lilikonja libu linɛnɛ; yo ko, nongo adi yo na bopu mɛnɛ, asi likonja linde kanga lisusu mɛnɛ.

Ngando Jisuka

⁵ Bakina bato babala a mojɔ motempelo, a mojɔ moeyoeli epele ematai na leka lopa bato a bobɔngeja tempelo.

⁶ Yesu ko abala na bu bo, Onjakani leka lomina edɛye; bokina busa ko bodi bodoa yana âdumbama matai ma masusu, na pɛpɛ nongo litai limɔci lîdika a diko dilitai litongo.

⁷ Ibo bamohɔjɔ bo, Mokoja, mojɔ momina môda a ehole eni? Mojɔ momina mokabenga bomea, embete êda bo?

⁸ Yesu asɔmbeja bo, Toma nganjamani bo bato basaka laboja no. Mojɔ bo bato banɛnɛ bâdoa a kombe embi na bâbala bo, Mbi nadi yo; na, Ehole eba’i mea. Pɛ bosusani bato bamina.

⁹ Oka’kani miako mibila na bijoki bibato, yɛni bobanga. Ngando ji jidi bopeta doa soti, suka ko etada bokpa.

¹⁰ Abala koko na bu bo, Likota lîna na likota; bokumu bôna na bokumu;

¹¹ Majonga mangondo mâda manɛnɛnɛ, na manjale, na bego bimoya a bisika na bisika. Beeto, na bimbete binɛnɛnɛ ta busa, bîda pongono.

¹² Oko ngando jia jidoakini ko, badi bopeta pea no, badingoja no, bâgbula no a smagoge na a blɔkɔ; bâkɛ na nu a boso bobakumu na bajuji a mojɔ mokombe embi.

¹³ Oko boa ôdani na njea a botɔndɔ mwako mosoti.

¹⁴ Sabekeani ko bo otadani na mokakwano a mojɔ mobikenge bibosɔmbeja.

¹⁵ Mojɔ bo mbi napa no bɛtɛ ebobala, na bowɛi a bogbokeja, na bodumba soki jinu jisusu.

¹⁶ Baboti banu bɛnɛ, na banangwao, na mela manu, na binao, badi bokaba no, na bweja bakina banu.

¹⁷ Bato basusu bâda na nu soki a mojɔ mokombe embi.

¹⁸ Endele ko, pɛpɛ nongo moswe momɔci momelo minu modi bobeha.

¹⁹ Okadani na lingbangba ôhelejani miembo minu.

²⁰ Omaka nɛni bo mandundu mabasoda bahiki Yelusalema, osa ko ojebeni bo etayeyoa a boda oko mopɔtu.

²¹ Baya badi a Yuda aehole emina babwani bocia oko a meno minɛnɛnɛ. Baya badi a ngando babwani bodonga, na bato bakada a esika, babwaniti bokwea a ngando.

²² Mojɔ bo, masu mamina mâda masu malikundu, na madi bongameja mijɔ misusu mia midi a Misɔnɔ.

²³ Bali ko baya badi na memi, na baya banungeaka, bâda na jɔɔlɔ a masu mamina. Mojɔ bo monɔngɔ monɛnɛ môda a ngondo; na likota di lînɛ kɛnjɔ.

²⁴ Badi bogwa bogwa boabɛnɛ. Bâbapea masungu, na bâkɛ na bu a makota masusu; na bapakano bâdɛhɛ Yelusalema oko a suka eehole ebapakano.

²⁵ Bimbete bîda a modika-busa, a songe, na a njɔtɔ. Makota masusu mangondo mâda na bɔ na maneene a mojɔ mokɛnjɔ emadiba-mamukwa, na a mojɔ momula.

²⁶ Bato bâsenjoa na bɔ, na maneene, a mojɔ mongando jia jîdoa a ngondo; mojɔ bo ngulu eDiko êdongosana.

²⁷ A ehole emina, bânɛ Mwana ’Moto akadoe a eyembi, na ndangasa na ekumu enɛnɛ.

²⁸ Omaka nɛni litanda lingando jimina, toma kahoani miso diko, na ninojani mɔli, mojɔ bo bosikoabonu bodi hulelu.

²⁹ Abala na bu mondɛ mu. Lɛni mojɔ molikɔkɔ na mele misusu.

³⁰ Mikameja kasa jiyene, ojinɛkɛ na ojebakani bo ehole engange edi hulelu.

³¹ Oko boa koko, okanɛni bo ngando jimina jidoi, odini bojeba bo Bokumu boNjambe bobengi bomea.

³² Mbi natɔndɔkɔ no na soti bo ngando ji jisusu jidi bongama oko elulu ye esiakini.

³³ Nongo Diko na Nase jikadimoa, bikenge bimbi bitadimoa.

³⁴ Toma nganjamani na nu bɛnɛ ko, bo milema minu misaka beha na magola, na malango, na mikakwano mingondo ye, bo osaka nɛni busa bomina mbalakaka;

³⁵ mojɔ bo bodi bodoa ai bato basusu baya badi a ngondo o abomeaka elambo.

³⁶ A mojɔ momina, toma sɛnjɛlɛni; mgakani bihole hisusu bo ngulu enu ebwane a mojɔ mobohela a ngando ji jisusu jia jidoaka, na a bo’Ina a boso boMwana ’Moto.

³⁷ Iyo adaka atempelo busa na busa a mojɔ mobokoja. Yana ko adipa busa, amana bo akahwɛe a mono mua modi na kombe Mono moOlive.

³⁸ Yana ahoa koko busa, bato basusu batitana ai yo a tempelo bo bamohokee.