Baɛpɛsɔ 6 - Nouveau Testament en Ngombe 1961

¹ Ino bana, toma sumani baboti banu a tei eKumu; mojɔ mu mobɔngi.

² Toma suma sangwao na ngwao, (imu modi mobeko moboso na njikano)

³ bo mijɔ miwɛ Mibɔnge, na oyeyoe ekoka a ngondo ye.

⁴ Ino basango, t’okejaeni oko bana banu kɛlɛ; babɔkɔni, na balehani na bokoja boKumu.

⁵ Ino bakɔmɛli, toma sumani baya badi baswa banu ya nase, oko na bɔ na mongongoma, na molema mosoti, o asumaka no Kumu.

⁶ Kɔni ngando jipalaka Njambe na milema minu, o bakɔmɛli baMasiya, te nongo a bosepeja bato baya banjaka no na miso pɛ.

⁷ Kɔni elomu enu na bingi, te nongo ai bato, oko ai Kumu yo mɛnɛ.

⁸ Jebani bo moto na moto adi bosɔ ndese ai Kumu a mojɔ mongando jisusu jipele jikɔkɔ yo, nongo akada mobuli isa mwana’sɔmi.

⁹ Ino baswa, toma kɔni koko boa na bakɔmɛli banu. Yɛni bogbilimwana kɛnjɔ. T’obosaeni oko bo Moswa’bu na onu adi oho Diko, na yo anjaka bato basusu amɛci.

Molilo moBila moBato baNjambe

¹⁰ Mojɔ mosuka,—sapingejani a tei eKumu na bopipo bondangasa ende.

¹¹ Lwani molilo mosusu mobila moNjambe bo ohɔneni ndungu jiSatana.

¹² Mojɔ bo, bila enaka so editi na mini na makia; edi oko na makumu, na kpaci, na bakumu bangondo ye emodidi, na mandundu mamiembo Mibe a bisika bidiko.

¹³ A mojɔ momina, toma tombani molilo mosusu mobila moNjambe, bo ohɔneni bila a busa bua bobe; na omaka gbokejani, osa ko odikaeni oko bambilimake.

¹⁴ Imani ngbi. Kandani njingo eSoti a moongo manu. Lwani bosɛnɔ o ebende a bupa.

¹⁵ Kinani mosɛlingo moMwako Mopele mobowi modae sapata a bibota binu.

¹⁶ Toma tombani nguba eejimeli a bokumba ndɛ jimosa jiyona Mobe; mojɔ mu modi monɛnɛ mɛnɛ.

¹⁷ Lwani egbala epipo eboheleja, na tombani abɛnɛ oMwembo yona odi Ebaeli eNjambe.

¹⁸ Ingakani bihole bisusu na Mwembo, tungu jisusu jibingeeli na mangɔɔnɔ; toma nganjamani na bopipo a mojɔ momina, na ingakani a mojɔ mobaMasiya basusu,

¹⁹ na a mojɔ mombi pongono, bo nadae na bɛtɛ ebobala a botɔndɔ na eci cina eMwako Mopele.

²⁰ Nadi ohwɛnji a minyɔlɔ oko a mojɔ momina. Ingakani bo nadae na eci yena ebwani na mbi a bobala.

²¹ Odini boka miako mimbi na Lukiko mwangwa’su, yona odi mokɔmɛli olingbangba oKumu; yo adi bojebeja no mijɔ misusu.

²² Mbi namolomi oho ai no oko a mojɔ momina, bo ojebeni mijɔ mimbi, na bo agɔmbejae milema minu.

²³ Yɛ bowi na ngɛnjɔ na ejimeli eNjambe Sango, na Kumu Yesu Masiya, edae ai baninga.

²⁴ Yɛ monganji moNjambe modae na bato basusu baya bapalaka Kumu osu Yesu Masiya na ngɛnjɔ yena etasia.