Baɛpɛsɔ 3 - Nouveau Testament en Ngombe 1961

¹ A mojɔ momina, mbi Paulo, nadi lisungu liYesu Masiya a mojɔ monu bapakano.

² Nadingaka bo o’kani mwako momonganji mokɔ Njambe ai mbi, bo nakɔe elomu ai no.

³ Njambe aboloja ai mbi cina emokano monde mua modaka mobombamake, o ami mbi sɔnɔ mweka.

⁴ Okalangani bikenge bimina odini bocingea ejebeli embi emojɔ mobombamake moMasiya.

⁵ Mojɔ momina moipaka boloa ai bato babilulu bitongo; moboloi ko e dɛye ai babwɛnji basɛnɔke, na ai batɔndɔi bande, oko na Mwembo.

⁶ Cina emina edi bo bapakano badi basangoli pongono; badi binama bimokuku momɔci, na basangoaka njikano yena edi a tei eYesu Masiya a mojɔ moMwako Mopele.

⁷ Mbi nahɔmɔ bo nadae mokɔmɛli oMwako Mopele, cina eepeeli emonganji moNjambe mua mosɔ mbi ai yo na ndangasa engulu ende.

⁸ Mbi nasɔ monganji mu, bo nabolojae ai bapakano mijɔ miyumu miMasiya mia midi na bonɛtɔ, oko mbi yona odi ngɔngɔ jibasɛnɔke basusu,

⁹ na bo nanejae bato basusu cina emojɔ mua modaka mobombamake oko a libangake mɛnɛ a tei eNjambe yona okɔ leka losusu.

¹⁰ Cina emina edi bo bakumu na bato basusu bakpaci oho Diko hacingee mojɔ mobowɛi bonɛnɛ boNjambe a mojɔ moDenga.

¹¹ Mokano mokana yo a libangake a tei eMasiya Yesu Kumu osu modaka boa.

¹² Na so bodi na njea bohu mɛnɛ a bodoa ai Njambe, pɛpɛ nongo mokakwano, cina eejimeli esu ai yo.

¹³ A mojɔ momina, mbi nangaka no bo otangwaeni cina eminɔngɔ misɔkɔ mbi a mojɔ monu; midi oko ekumu enu.

¹⁴ A mojɔ momina, mbi natitaka na magbunda a boso boSango (

¹⁵ menga masusu, isa oho Diko, isa ya nase, masɔkɔ kombe oko ai yo),

¹⁶ bo apɛ no bopingeja bongulu eMwembo monde a tei enu, moto namoto, oko nalikabo liekumu ende yena enɔi.

¹⁷ Nangɔɔnɔkɔ bo Masiya adihe esika eboda a milema minu cina eejimeli enu, na bo odaeni bambilimake na ngbi a epaeli;

¹⁸ bo odini bohɔnɔ a bocingea na basɛnɔke basusu, cina esasa, na boyai, na ndinda, na boka, bongɛnjɔ eMasiya,

¹⁹ na bo ojebeni ngɛnjɔ eMasiya yena enɔi ejebeli esusu, na bo olumeni botɔ na boluma boNjambe kanga boya mɛnɛ.

²⁰ E dɛye, ekumu ai yo yona obwani bokɔ ngando jisusu jia jinɔi mijɔ misusu mingaka so, na milɛkɛ so bou mɛnɛ, cina engulu yena ekɔkɔ a tei esu,

²¹ ekumu ai yo a tei eDenga, na a tei eMasiya Yesu a bilulu bisusu pɛ suka. Amen.