Baɛpɛsɔ 1 - Nouveau Testament en Ngombe 1961

¹ Njɛbɛ embi Paulo, obwɛnji oMasiya Yesu a mojɔ mobolulea boNjambe, ai baMasiya baya badi oho Ɛpɛsɔ, na baya badi na lisuma ai Masiya Yesu.

² Yɛ monganji na bowi boSangwa’su Njambe na Kumu osu Yesu Masiya hodae na nu.

Bojongoa boNjambe a tei eMasiya

³ Yɛni bosakoe Njambe Sange eKumu osu Yesu Masiya, yona ojongoa so a tei eMasiya na majongoa masusu mamwembo na ma-Diko.

⁴ Iyo ahɔ so a tei ende oko ngondo ye epetakini yoama, ho bodae basɛnɔke, pɛpɛ nongo litɔnɔ a boso bonde.

⁵ Ahɛngɛ so na ngɛnjɔ ende bo bodae bana bande mɛnɛ balisango cina eYesu Masiya. Mokano monde modaka boa na sepi,

⁶ bo angamejae ekumu emonganji monde, na akɔ so monganji momina a tei eMwana’nde ongɛnjɔ.

⁷ Lisiko lisu lidi oko a tei ende a mojɔ momakia mande, na bo yɛ bojibe jisu a mojɔ momonganji monde mua monɔi.

⁸ Iyo anɛngeja monganji monde ai so boa cina ebowɛi na bocingea bonde.

⁹ Ajima bo ajebejae so cina ebolulea bonde, na aneja so bo cina emokano monde edi bo

¹⁰ atitanejae ngando jisusu a tei eMasiya, ngando jiDiko, na ngando jinase, oko etango emasu emaka bwana.

¹¹ Lisango lisu lidi a tei ende, lia lihɛngɛmɛ na mokano monde yona okɔkɔ ngando jisusu na bowɛi na bolulea bonde mɛnɛ.

¹² Cina emina edi bo gala eekumu ende ehɛe a mojɔ mosu baya bajima Masiya boso.

¹³ Ino pongono, ama no ka Ebaeli eSoti, oko Mwako Mopele moboheleja bonu, omi jimani oko yo, na o’sɔni embete eMwembo Mosɛnɔkɛ monjikano,

¹⁴ mua modi ndanga elisango lisu, oko a ehole ebosɔ lisango limina, a mojɔ mobosakoa ekumu ende.

¹⁵ Mbi naka mwako moejimeli enu ai Kumu Yesu, na ngɛnjɔ enu ai bato bande basusu.

¹⁶ A mojɔ momina, nasakoaka Njambe bihole bisusu a mojɔ monu, yana alangaka mbi kombe jinu a ma’nga mambi.

¹⁷ Nangaka koko bo Njambe oKumu osu Yesu Masiya, Sango yona odi na ekumu esusu, apɛ no mwembo mobowɛi na bocingea, a bojebeana na nde soti,

¹⁸ na bo ahojae miso mamilema minu, bo ocingeeni njingo ebobea bonde, na ekumu enɛnɛ mɛnɛ elisango linde a tei ebasɛnɔke,

¹⁹ na ndangasa ende pɛ njɛngi ai so baya bajimaka; mwɛngi momina modi oko elomu ekɔ yo na bopipo bongulu ende

²⁰ a tei eMasiya yana amongɔjɔ a bogwa, na amo-bakea oho Diko a ebɔ ende ebami

²¹ bo anɔe bakumu basusu bou mɛnɛ, na kpaci jisusu, na ngulu jisusu, na makumu masusu, na kombe jisusu boya jia jidi a ehole ye, na a ehole ebodoa.

²² Na adeja ngando jisusu cina jibibota binde, na amobakea bo adae Kumu oDenga a mojɔ mongando jisusu,

²³ mojɔ bo Denga didi mokuku monde, na yo alumejaka mokuku momina o alumejaka yo leka losusu mɛnɛ.