Bakɔlɔsai 1 - Nouveau Testament en Ngombe 1961

¹ Paulo, obwɛnji oMasiya Yesu oko na bolulea boNjambe, na Timoteo mwangwa’su,

² ai bato baDenga, na ai baninga basusu balisuma ai Masiya a Kɔlɔsai. Yɛ monganji na bowi boNjambe Sangwa’su bodae na nu.

³ Iso bosakoaka Njambe, Sange ’Kumu osu Yesu Masiya a mojɔ monu, na bongaka a mojɔ monu bihole bisusu,

⁴ cina bo boka mwako moejimeli enu ai Masiya Yesu, na epaeli enu ai bato basusu baejimeli,

⁵ a mojɔ monjingo yena ehɛngɛmɛ oho Diko a mojɔ monu. O’kani mojɔ monjingo emina boso oko na bikenge bisoti, bikenge biMwako Mopele.

⁶ Mwako momina momea ai no, mojɔ bo monanganaka a ngondo esusu. Mobotaka mbuma na mokɛkɛ bohɛ; modi oko boa a tei enu pongono, banga na busa boka no, na bojeba no, cina emonganji moNjambe na soti.

⁷ Okoani mojɔ momina na Epapala, moninga osu oepaeli a elomu. Iyo adi mokɔmɛli osoti oMasiya a mojɔ monu,

⁸ na ajebeja so mojɔ moepaeli enu a tei eMwembo.

Bonga boPaulo

⁹ Iso bobanga bonga Njambe a mojɔ monu a busa boka so mojɔ momina, na botakinaka bonga. Bongaka bo olumeni na ejebeli ebolulea boNjambe, oko na bowɛi na bocingea bosusu boMwembo,

¹⁰ bo odaeni na mida mia midi bokumeja kombe eKumu, mia midi bomosepeja na soti, na bo oboteni mbuma a tei ebilomu bisusu bipele, na bo ohɛeni na ejebeli eNjambe.

¹¹ Yɛ ngulu ende yena enɔi, epingejae no na ngulu esusu, bo ohɔneni mijɔ misusu na lingbangba, na eci, na sepi pongono.

¹² Sakoani Sango yona obɔngejai so bo bosangoe libondo lihsango libasɛnɔke a bohu.

¹³ Iyo ahelejai so a ngulu emodidi, na akwejai so a Bokumu boMwana’nde ongɛnjɔ.

¹⁴ A tei ende, iso bodi na lisiko, bo yɛ bojibe.

Ekumu eYesu

¹⁵ Iyo adi elimo eNjambe yona odi so pɛ bonɛ na miso; adi Sɔmi obato basusu baya bayoama.

¹⁶ Leka losusu loyoama na nde, oho Diko na ya nase; leka lonɛkɛ so na miso, na leka lodi so pɛ bonɛ na miso, na bakumu na makumu, kpaci na ngulu—ngando jisusu jiyoama na nde, na a mojɔ monde.

¹⁷ Iyo adi boso bongando jisusu, na ngando jisusu jicingi na nde.

¹⁸ Denga didi mokuku monde, na yo adi molo. Iyo adi libangake. Iyo abotama boso a tei ebagwake bo adae boso bongando jisusu.

¹⁹ Mojɔ bo Njambe ajima na bolulea bonde bopele bo bonjambe bonde bosusu bodae a tei ende,

²⁰ bo yo adae mosili, na abakea mokongo mobosiili na makia mande a mole-mobokea, a bohuleja ngando jisusu ai yo mɛnɛ, isa oho Diko isa ya nase.

²¹ Ino odakani na lipɔlɛ ai yo; odakani na nde soki a milema minu, bato babikɔmɛli bibe.

²² Iyo ko akwea bosiili, na akataneja no koko a njea ebogwa bomokuku monde, bo amejae no a boso bonde na bosɛnɔ, pɛpɛ nongo litɔnɔ, pɛpɛ nongo mojɔ,

²³ okayeyoani bambilimake na ngbi a ejimeli, pɛ nongo bodonga a njingo eMwako Mopele moka no. Mwako momina motɔndɔmɔ ai bato basusu ya nase, na mbi Paulo nahɛngɛmɛ ho nadae mokɔmɛli omwako momina.

Elomu ePaulo ai Bapakano

²⁴ Mhi nasepaka e dɛye a mojɔ mominɔngɔ minɛkɛ mbi a kombe enu. Masiya adingoaka a mini mimbi a mojɔ momokuku monde, oko Denga dinde; na mbi napalaka bo nabwanejae libondo limadingoa mamina.

²⁵ Mojɔ bo nadi mokɔmɛli oDenga cina ekpaci esɔ mbi ai Njambe a mojɔ monu, bo natɔndɔe Mwako moNjambe kanga mosusu mɛnɛ,

²⁶ oko mojɔ mua modaka mobombamake ekoka enɛnɛ mɛnɛ ai bilulu binɛnɛ; moboloi ko e dɛye ai baejimeli baNjambe.

²⁷ Mojɔ bo Njambe ajima bo abanejae bo mojɔ mu mobo-mbamake modi mojɔ moekumu enɛnɛ mɛnɛ a tei ebapakano,—cina emina edi Masiya a tei enu, njingo eekumu.

²⁸ Iso botɔndɔkɔ mwako monde; bolehaka bato basusu, na bokojaka bato basusu na bowɛi bosusu, bo bokwejae a boso boNjambe moto na moto mobɔngɔke a tei eMasiya.

²⁹ Elomu ekɔkɔ mbi edi oko a mo jɔ momina; naekɔkɔ na molema mombi mosusu, oko na ngulu ende yena elindaka mbi na bopipo.