Boboloja 8 - Nouveau Testament en Ngombe 1961

Embete Esambo

¹ Yana adipoa Mwana-Bata embete esambo, mijɔ misusu mi yɛyɔ bowi oho Diko, isa ekenge eheure emɔci.

² Na mbi nanɛ babwɛnji-baDiko sambo baya badi a boso bo-Njambe; na basɔ mindule sambo.

³ Okina obwɛnji-oDiko otongo adoa, na ama a dɔngɔ dilitumbu. Iyo apeaka saani ewɔlɔ a ebɔ, na asɔ leka lolitindi lonɛnɛ a boputoana na bingeeli bibasɛnɔke basusu a diko dilitumbu liwɔlɔ lia lidi a boso bongɛndɛ.

⁴ Modidi moleka lolitindi moputuoana na bingeeli bibasɛnɔke, mokina ebɔ eobwɛnji, na mowea a boso boNjambe.

⁵ Obwɛnji omina atomba saani, aelumeja na mosa molitumbu, na amosopa a ngondo. Ngɔngɔ jimina, jidaka oko bɛi, na daka enɛnɛ, na mikalimo, na bojonga bongondo.

⁶ Babwɛnji sambo, baya badaka na mindule sambo, basɛlingoa a bohuea.

⁷ Obwɛnji oboso ahuea mondule, na mbua akwa a ngondo, oko mbua omatai na mosa maya maputoana na makia. Ekenge ebisato engondo engoa mosa; ekenge ebisato emele engoa, na njienjie jigwa kanga jisusu mɛnɛ.

⁸ Obwɛnji obabae ahuea mondule, na ekina eka, o mono monɛnɛnɛ mongoake na mosa, edumbama a madiba-mamukwa, na ekenge ebisato emadiba ebongoa makia.

⁹ Tito bamadiba bagwa, libondo limasato; na masua magwa, libondo limasato.

¹⁰ Obwɛnji obasato ahuea mondule, na monjɔtɔ monɛnɛ o ekɔmɛli emotanda, adonga oho Diko na akwa nase; akwa a diko diekenge ebisato edua na njiba.

¹¹ Kombe emonjɔtɔ omina edi Abisiniti. Ekenge ebisato emadiba ebongoa abisiniti, na bato bagwa banɛnɛ a mojɔ momadiba mamina, mojɔ bo madaka na boyo.

¹² Obwɛnji obanɛi ahuea mondule, na ekenge ebisato emodika-busa ebeha, na ekenge ebisato esonge, na ekenge ebisato enjɔtɔ pongono. Ekenge ebisato ebohu bobu ehinda oko bohinda bo ekenge ebisato ebusa etahoa, na ekenge ebisato ebulu pongono.

¹³ Anja mbi koko, nanɛ popo akapimboe oho ta busa, na akabekoe na kɔpi epipo bo, Monɔngɔ, monɔngɔ, monɔngɔ, ai bato baya badi a ngondo, a mojɔ momindule mitongo Mibabwɛnji baya bakɛkɛ ahue.