Boboloja 22 - Nouveau Testament en Ngombe 1961

¹ Anejani koko dua emadiba mabomɔ ekamane a ngɛndɛ eNjambe na eMwana-Bata; madaka na bosangesange bota-latala, na makɛlɛkɛ a ndanda elicilinga lingando.

² Mole mobomɔ modaka a mɔngɔ masusu mabae madua, mua mobotaka mbuma, tungu domi-na-jibae, tu songe ekina tungu. Na kasa jimole jidaka a mojɔ mosengo emakota mangondo.

³ Ndakeja etaya da. Ngɛndɛ eNjambe na eMwana-Bata edabi ena, na bakɔmɛli bandɛ bamo-kɔmɛbí.

⁴ Ibo banɛbí boso bonde, na kombe ende edabí a maso mabu.

⁵ Na bulu botaya dabí; paka editi koko na elomu oho, isa modika-busa, mojɔ bo Kumu Njambe abapabi bohu, na bakumabi oko na bosusu.

Bileho Bisuka

⁶ Abala na mbi bo, Bikenge bimina bidi soti, bitakputoa nongo. Na Kumu, Njambe omiembo na obatɔndɔi, alomi obwɛnji onde bo anejae bakɔmɛli bande ngando jia jidi bodoa ngɔngɔ mweka.

⁷ Hokea; mbi nâdoa bokpa. Bojongoa ai moto yona osumaka bikenge bieseko emokanda mu.

⁸ Mbi Yoane naka, na nanɛ ngando jimina. Yana aka mbi, na yana anɛ mbi ngando jimina, nasadumba nase a bibota biobwɛnji yona ojinejani bo namosakoe.

⁹ Iyo ko abala na mbi bo, yɛ bokɔ boa! Mbi nadi oko mokɔmɛli pɛ, o adi wɛ mɛnɛ, na batɔndɔi baninga bawɛ, na bato basusu baya basumaka bikenge bimokanda mu. Sakoa oko Njambe.

¹⁰ Abala na mbi koko bo, T’obombe oko bikenge bieseko emo-kanda mu, mojɔ bo ehole eba’i mea.

¹¹ Yona odi mobe, yɛ akɔe oko bobe; yona odi na mbindo, yɛ adae oko na mbindo; yona odi na bodongo, yɛ akɔe oko ngando jibodongo; yona odi mosɛnɔkɛ, yɛ adae oko mosɛnɔkɛ.

¹² Hokea; mbi nadi bodoa bokpa. Nadi bodoa na ndese embi, bo napɛ moto na moto ndese yena ebwani na bikɔmɛli binde.

¹³ Mbi nadi Alepa na Omega, yona oboso na yona osuka, libangake na suka.

¹⁴ Bojongoa ai bato baya basosaka bisenja bibu, bo badae na njea ebodoa a mole mobomɔ, na njea ebokwea a midipe mingando.

¹⁵ Sokolu ko, oko mbwa, na bato bademba, na bato babɔɔli, na bawoi, na basakoi babilimo, na basusu baya bapalaka na bakɔkɔ bokosea.

¹⁶ Mbi Yesu nalomi obwɛnji ombi bo ajebejae no ngando jiji a mojɔ moMenga. Mbi nadi monjeli oDawidi na ombota ende; nadi monjɔtɔ yona odi na eyoeli enɛnɛ a elɔngɔ.

¹⁷ Mwembo, na Mwali obolongana babalaka bo, Doa. Isa moto a’kaka, yɛ abale bo, Doa. Yona odi na ekangola, yɛ adoe; yɛ moto na moto yona opalaka, aloke madiba mabomɔ oko boloka, pɛpɛ nongo bosomba.

¹⁸ Mbi nalehaka bato basusu baya ba’kaka bikenge bieseko emokanda mu. Moto akaputana bikenge bitongo a bikenge bimina, Njambe adi bobakea ai yo madingoa maya masɔnɔmi a mokanda mu.

¹⁹ Na moto akakatoa bikenge bimokanda moeseko ye, Njambe adi bokatoa libondo linde a mole mobomɔ, na a ngando esɛnɔkɛ, o adi misɔnɔ mimokanda mu.

²⁰ Yona odi motati ongando jimina abalaka bo, Soti, mbi nadoaka bokpa. Amen. Kumu Yesu, doa.

²¹ Yɛ monganji moKumu Yeslu modae na basɛnɔkɛ basusu. Amen.