Boboloja 21 - Nouveau Testament en Ngombe 1961

Diko Diyene na Ngondo Eyene

¹ Ngɔngɔ jimina, nanɛ Diko diyene na ngondo eyene, mojɔ bo Diko diboso dima dimoa, na ngondo eboso pongono, na madiba-mamukwa maditi koko.

² Na nanɛ ngando yena esɛnɔke, Yelusalema eyene, ekadonge oho Diko ai Njambe, na mosɛlingo momwali-obolongana yona olwa molilo monde a mojɔ momuma’nde.

³ Naka koko kɔpi epipo ekamane a ngɛndɛ bo, Anjani; etondo eNjambe edi a tei ebato. Iyo adi boda na bu. Ibo badi boda bato bande, na Njambe yo mɛnɛ adi boda na bu.

⁴ Iyo adi bohakoa mbisoli jisusu a miso mabu. Bogwa botada koko na ikina. Batayea koko kɔndɔ na ikina, pɛpɛ koko bio isa mwano, mojɔ bo ngando jiboso jisia oko bosia.

⁵ Iyona odaka a ngɛndɛ abala bo, Anjani; mbi nakɔkɔ leka losusu loyene. Abala koko bo, Sɔnɔ mojɔ mu, cina bo bikenge bimina bidi soti, bitakputoa nongo.

⁶ Na abala na mbi bo, Mojɔ mosii! Mbi nadi Alepa na Omega, libangake na suka. Isa moto adi na ekangola emadiba, mbi nadi bomonusa madiba mamolo momadiba mabomɔ; nadi bomopa oko bopa, pɛpɛ bongɛjɛ.

⁷ Moto akagbokeja, adi bosangoa likwa. Mbi nadi boda Njambe onde, na yo adi boda mwana’mbi.

⁸ A mojɔ mobimɛli ko, na baya bapeliti ejimeli, na bato babosambolu, na bawoi, na bato babɔɔli, na bato bademba, na basakoi babilimo, na bakosei basusu,—libondo libu lidi oko a libale limosa na supulu; bogwa bomina bodi bogwa bomabae.

Yelusalema Eyene

⁹ Okina obabwɛnji sambo baya badaka na kɔpɔ sambo jia jiluma na madingoa masuka Sambo, adoa na abala na mbi bo, Doa nanejae wɛ Mwali-obolongana, yona odi mwali oMwana-Bata.

¹⁰ Iyo atomba mbi a mwembo a diko dimono monɛnɛ, na anejani Yelusalema, ngando esɛnɔkɛ, ekadonge oho Diko ai Njambe na ekatite nase.

¹¹ Edaka na ekumu eNjambe. Langilangi engando edaka o litai liyumu, oko litai liyasepi, na bosangesange o talatala.

¹² Edaka na mongba, mongba monɛnɛnɛ moyai, mua modaka na midipe domi-na-Mibae. Babwɛnji-baDiko domi-na-babae badaka a midipe, na kombe jimakota domi-na-babae mabana baYisalaele jisɔnɔmɔ a midipe.

¹³ Midipe minɛi midaka a dɔngɔ diɛsɛta, midipe minɛi a dɔngɔ dinɔdɔ, midipe minɛi a dɔngɔ disudo, na midipe minɛi a dɔngɔ diwɛsɛta.

¹⁴ Mongba mongando modaka na eyoeli-ecina, mboba domi-na-jibae, na kombe jibabwɛnji domi-na-babae ba-Mwana-Bata jidaka a mboba jimina.

¹⁵ Obwɛnji yona obalaka na mbi adaka na mongendu-momwɛngi a bongɛ ngando, na midipe, na mongba.

¹⁶ Ngando edaka mɔngɔ masusu manɛi oko amɛci, boyai na sasa oko amɛci. Angɛ ngando na mongendu, na angɛ kilometa koto jibae na mikama minɛi, boyai na sasa na diko oko amɛci.

¹⁷ Angɛ mwɛngi momongba pongono, mako mokama momɔci na macinda mabae na mako manɛi na bongɛ bomoto na bongɛ boobwɛnji pongono.

¹⁸ Mongba moyoama na yasepi. Ngando mɛnɛ eyoama na wɔlɔ esoti, na edaka na bosangesange botalatala.

¹⁹ Eyoeli-ecina engando edaka na matai mayumu tungu jisusu. Mboba eboso eyoama na yasepi; yena ejibae sapili;

²⁰ yena ejisato kalekedona; yena ejinɛi emelaudi; yena ejitano saladonike; yena ejisamano saludi; yena esambo kulusoliti; yena ebomwambe beluli; yena elibwa topasi; yena edomi kulusopalo; yena edomi-na-emɔci yakinto; yena edomi-na-jibae ametusiti.

²¹ Midipe domi-na-Mibae midaka mayaka mayumu domi-na-mabae, tu modipe liyaka liyumu limɔci. Licilinga lingando lidaka licilinga liwɔlɔ esoti, na lidaka na bosa-ngesange botalatala.

²² Nainɛ nongo tempelo a ngando, mojɔ bo tempelo engando edi oko Kumu Njambe yona onɔi, na Mwana-Bata.

²³ Ngando ebwanaka, pɛpɛ nongo modika-busa isa songe a boboja ngando, mojɔ bo ekumu eNjambe edi bobu bongando, na paka engando edi Mwana-Bata.

²⁴ Bato bamakota masusu badi bodala a bohu bomina; bakumu bangondo badi bodoa na ngbemeani na ekumu ebu a ngando emina.

²⁵ Midipe mingando mitadipama nongo a ehole emose na bosusu, mojɔ bo bulu botada nongo oho.

²⁶ Badi bokwea ena na ekumu na lisuma limakota mangondo.

²⁷ Pɛpɛ nongo eka epita ko edi bokwea ena, pɛpɛ nongo moto yona okɔkɔ ngando jibosambolu isa bokosea. Badi bokwea ena oko baya basɔnɔmɔ kombe a mokanda mobomɔ moMwana-Bata.