Boboloja 20 - Nouveau Testament en Ngombe 1961

Satana a Mbɔci

¹ Nanɛ okwa obwɛnji akahule oho Diko. Iyo apeaka sabe emombɔndɔ monase na mokina monyɔlɔ monɛnɛ a ebɔ ende.

² Apea Dalakona, oko njɔ yona moyou, yona odi Jabalo na Satana, na amo’sa ta mbɔci bo adae ena bianga koto emɔci.

³ Amodumba a mombɔndɔ monase, adipa modipe, na abakea embete a modipe bo atakosea koko makota mangondo, oko a suka ebianga koto emɔci. Ehole emina ekasia adi bocingoama mweka.

Ekumu eBato baMasiya

⁴ Nanɛ koko mingbɛlɛngɔ, na baya badaka a mingbɛlɛngɔ mimina basɔ kpaci a bosambeja. Nanɛ koko miembo Mibato baya bama tɛndɔmɔ melo a mojɔ motati ebu ai Yesu, na a mojɔ moEbaeli eNjambe, na miembo Mibato baya balona bosakoa Tito na elimo ende, na baisɔ embete ende a maso mabu, isa a mɔmɔ mabu. Ibo basɔ koko bomɔ, na bakuma na Yesu bianga koto emɔci.

⁵ Bagwake batongo basɔ koko bomɔ, oko a suka ebianga koto emɔci; bongɔ boboso a bogwa oko bu.

⁶ Yona odi a libondo libato baya badi bongɔ a bogwa a bongɔ boboso, adi na bojongoa na bosɛnɔ. Bogwa bomabae boditi nongo na kpaci ai bo; badi boda nganga baNjambe na nganga baMasiya, na badi bokatana na nde a bokumu bonde bianga koto emɔci.

Satana Acingoama na Agboka na Bosusu

⁷ Bianga koto emɔci bikasia, Satana adi bocingoama a blɔkɔ ende.

⁸ Adi bomana a bokosea makota mangondo, oko a suka engondo mɛnɛ, oko Gogo na Magogo, bo ababolee a mojɔ mobila. Etango ebu edi o mbume jimbongu.

⁹ Badonga a bisika bisusu bingondo na bahika ngando ebasɛnɔke na ngando eepaeli. Mosa ko modonga oho Diko ai Njambe, na mobatumba kanga basusu mɛnɛ.

¹⁰ Satana, mokosei obu, adumbama a libale lomosa na lisupulu, esika edi Tito na motɔndɔi obokosea, na badi bodingoa oho mabulu na mei oko na bosusu mɛnɛ.

Esambi Esuka

¹¹ Nanɛ ngɛndɛ enɛnɛ epu, na yona odaka a ngɛndɛ. Ngondo na busa bacia boso bonde, na baibo loa koko.

¹² Nanɛ koko bagwake, banɛnɛnɛ na bakɛkɛlɛkɛ; badaka ba’mi a boso bongɛndɛ. Mikanda midipoama. Na mokina mokanda motongo modipoama, oko mokanda mobomɔ. Na bagwake basamba a mojɔ mobikɔmɛli bibu bia bisɔnɔmɔ a mikanda.

¹³ Madiba-mamukwa mahuleja bagwake baya badaka ena. Bogwa na Seolo bahuleja koko bagwake baya badaka ena, na basusu basamba a mojɔ mongando jima bo kɔ.

¹⁴ Ngɔngɔ jimina, Bogwa na Seolo badumbama a libale limosa; bogwa bomabae oko bu, bua bolibale limosa.

¹⁵ Isa kombe emoto eiboloa, pɛ bosɔnɔmɔ a mokanda mobomɔ, moto omina adumbama a libale limosa.