Boboloja 2 - Nouveau Testament en Ngombe 1961

Mokanda a Epɛsɔ

¹ Sɔnea obwɛnji oDenga diƐpɛsɔ bo, Iyona opeaka njɔtɔ sambo a ebɔ ende ebami, yona odalaka a ndanda epaka jiwɔlɔ sambo, abalaka mijɔ mimi.

² Mbi najebaka bikɔmɛli biwɛ, na elomu ewɛ, na lingbangba liwɛ. Najebaka bo bato babe bakɔkɔ wɛ maneene, bo osisoi baya basabeaka babwɛnji na baditi nongo babwɛnji, na onini bo badi bakosei.

³ Najebaka bo odi na lingbangba a mojɔ mokombe embi; ohɔnɔkɔ muna momina na otangwaka.

⁴ Mbi ko nadi na wɛ mojɔ mu; okini epaeli ewɛ eboso.

⁵ Toma lɛ esika ekwi wɛ; hekoja molema mowɛ; kɔ bilomu biboso. Omiti kɔ boa, omiti hekoja molema mowɛ, mbi nadi bodoa ai wɛ, na nâdongeja paka ewɛ.

⁶ Endele ko, odi na mojɔ mu mopele; olonaka bikɔmɛli biBaNikolaito, o alonaka mbi bikɔmɛli bibu.

⁷ Isa moto adi na matoi, yɛ ahokee mojɔ mobalaka Mwembo na Menga maMasiya. Moto akagbokeja, mbi nâmopa mbuma jimole-mobomɔ mua modi a Paladiso eNjambe bo ayake.

Denga diSemuluna

⁸ Sɔnea obwɛnji oDenga diSemuluna bo, Iyona oboso, yona osuka, yona ogwa na ohela koko, abalaka mijɔ mimi.

⁹ Mbi najebaka monɔngɔ mowɛ, na bokwali bowɛ (nongo adi wɛ na likonja). Najebaka mojɔ momasingi mabato baya baba-laka bo badi BaYuda, na baditi BaYuda; badi oko sinagoge eSatana.

¹⁰ Boditigoa bokɛkɛ adoe ai wɛ. Yɛ bobanga ko. Hokeani; Satana akɛkɛ adumbe bakina banu a blɔkɔ a bomeka no, na ôdani na monɔngɔ masu domi. Da ko na lingbangba oko a bogwa, na mbi nâpa wɛ likongo libomɔ.

¹¹ Yona odi na matoi, yɛ ahokee mojɔ mobalaka Mwembo na Menga maMasiya. Yona ogbokejaka atadingoa na bogwa bomabae.

Denga diPeligamona

¹² Sɔnea obwɛnji oDenga diPelugamona bo, Iyona odi na abɛnɛ onjɛngɔ jibae jipɔlu abalaka mijɔ mimi.

¹³ Mbi najebaka esika edi ndako ewɛ; edi oko a esika edi ngɛndɛ eSatana. Opeaka kombe embi boku. Oingana nongo ejimeli embi a masu mawa bo Antipa, motati ombi oejimeli a tei enu, oko a esika eSatana.

¹⁴ Endele ko, nadi na wɛ mikina mijɔ. Odi na bakwa bato oho baya bajimaka bokoja boBalama, yona okoja Balaka bo asakejae bana baYisalaele libaku, bo bayake masiko maya mapama ai banjambe babokosea, na bo bakɔe mijɔ Mibosambolu.

¹⁵ Odi koko na bakina baya badi bacinami baBaNikolaito.

¹⁶ Hekoja molema mowɛ. Omiti hekoja molema, nadi bodoa ai wɛ bokpa, a bona na bato bamina na abɛnɛ omonɔkɔ mombi.

¹⁷ Yona odi na matoi, yɛ ahokee mojɔ mobalaka Mwembo na Menga maMasiya. Mbi nâpa yona ogbokejaka manna mabombamake. Nâmopa koko litai lipu; kombe eyene edi bosɔnɔmɔ a litai limina, na pɛpɛ nongo moto oje-baka kombe emina, oko yona oesɔkɔ.

Denga diTwatida

¹⁸ Sɔnea obwɛnji oDenga diTwatila bo, Mwana ’Njambe abalaka mijɔ mimi, oko yona odi na miso mamosa mongoake, na bibota binde o mboa jipele jibolailai.

¹⁹ Mbi najebaka bikɔmɛli biwɛ, epaeli ewɛ, ejimeli ewɛ, elomu ewɛ na lingbangba liwɛ. Na bikɔmɛli biwɛ e dɛye na bikɔmɛli biwɛ biboso, mbi najebaka bo bikɔmɛli biwɛ e dɛye binɔi bikɔmɛli biwɛ biboso.

²⁰ Endele ko, nadi na wɛ mojɔ mu; ojimaka bo Yesabela, mwali yona obalaka bo adi motɔndɔi, akojae na alabojae bakɔmɛli bambi a bokɔ ngando jibosambolu, na a boyaka masiko maya mapama ai banjambe babokosea.

²¹ Namopi ehole bo ahekojae molema monde; yo ko t’apalake bohekoja molema na bokwa ngando jinde jibosambolu.

²² Hokea; mbi nâmodumba a gbagba eyogo; na baya bangɛkɛ na nde bɔɔli bamiti hekoja milema Mibu a bikɔmɛli binde, mbi nâbalomea bodingoa bonɛnɛ.

²³ Nâweja bana bande oko bowa. Na Menga masusu maMasiya madi bojeba bo mbi nadi yona osisoaka bolɛ na molema. Nâpa moto na moto a tei enu ndese yena ebwani na bikɔmɛli binde.

²⁴ Ino batongo ko baTwatila baya batajimaka bokoja bomina, na baya baidinda a ngando jibombamake jiSatana, (ebaeli ebu edi boa) nabalaka na nu bo nitabakea mokina muna motongo ai no.

²⁵ Mojɔ momɔci ko; peani boku mua mope-lini no, oko a bodoa bombi.

²⁶ Iyona ogbokejaka, yona osumaka ngando jimbi oko a suka mɛnɛ, mbi nâmopa kpaci emakota.

²⁷ Iyo âkuma makota na tondo eebende, na âmabɛ o abɛkɛ moto teni, mojɔ bo mbi nasi kpaci ai Sangwa’mbi.

²⁸ Nâmopa koko monjɔtɔ moelɔngɔ.

²⁹ Moto yona odi na matoi, yɛ ahokee mojɔ mobalaka Mwembo na Menga maMasiya.