Boboloja 19 - Nouveau Testament en Ngombe 1961

¹ Yana asia ngando jimina, naka doi linɛnɛ lia lidaka o kɔpi elindundu libato banɛnɛ oho Diko haya babekoa bo, Aleluya! Boheleja, na ekumu, na ngulu, jidi ai Njambe osu;

² Mojɔ bo yo asambejaka na soti na bongbebongbe. Asambejai mwali obɔɔli yona monɛnɛ, yona obeja ngondo na bɔɔli bonde. Njambe akundi likundu limakia mabakɔmɛli bande.

³ Babekoa koko bo, Aleluya! Modidi mobotumba bonde moweaka diko na bosusu.

⁴ Basuku domi-ibae na banɛi, na bato babomɔ banɛi, basumana a bosakoa Njambe yona odi a ngɛndɛ. Babala bo, Amen. Aleluya!

⁵ Ekina kɔpi emana a ngɛndɛ bo, Sakoani Njambe osu, ino bakɔmɛli bande basusu, Ino baya bamosumaka, banɛnɛnɛ na bakɛkɛlɛkɛ.

⁶ Naka koko doi likɔpi elindundu libato banɛnɛ. Edaka o molunjo moepeela enɛnɛ na ebwana na bɛi mɛnɛ. Babala bo, Aleluya! Mojɔ bo Kumu Njambe osu yona onɔi, akumaka.

⁷ Kinani bosepe na enanga enɛnɛ, na bomokumejae, Mojɔ bo ehole ebolongana boMwana-Bata emei, Na mwali onde obolongana alwai molilo monde,

⁸ Mojɔ bo asi kpaci bo alwae bisenja bibotɛlɛtɛlɛ bipu bopɛɛ. Bisenja bimina bibotɛlɛtɛlɛ bidi oko bikɔmɛli bibodongo bibasɛnɔke.

⁹ Obwɛnji abala koko na mbi bo, Sɔnɔ mojɔ mu; Bojongoa ai bato baya babeami a libonje libolongana boMwana-Bata. Na abala na mbi bo, Bikenge bimina bidi bikenge biNjambe na soti mɛnɛ.

¹⁰ Mbi nasadumba a bibota binde bo namosakoe. Iyo ko abala na mbi bo, yɛ bokɔ boa! Mbi nadi oko mokɔmɛli pɛ, o adi wɛ mɛnɛ, na baninga bawɛ baya babaneaka tati eYesu. Sakoa oko Njambe. Mojɔ bo tati eYesu edi mwembo moeseko.

Tito na Motɔndɔi Obokosea Bagboka

¹¹ Nanɛ bo Diko didi bwase, na nanɛ punda mopu. Okina adaka abaki a punda yona odi na kombe ji, Yona oejimeli, Yona osoti. Iyo asambejaka, na anaka bila oko na bodongo.

¹² Miso mande madaka o mosa mɛnɛ. Adaka na makongo manɛnɛ mabokumu a molo monde. Adaka na kombe yena esɔnɔmɔ; pɛpɛ nongo moto ko ojebaka kombe emina, oko yo mɛnɛ pɛ.

¹³ Aiwaka kasaka eyai yena edaka na matɔnɔ mamakia, na kombe ende edi Ebaeli eNjambe.

¹⁴ Mandundu mabasoda baDiko mamosusaka, madaka mabaki a punda bapu, na malwaka bisenja bibobuno bipu bopɛɛ.

¹⁵ Abɛnɛ monɛnɛ amanaka a monɔkɔ monde a bokwɛlɛ makota mangondo. Tondo ende ebokumu edi tondo eebende a mojɔ mobu. Iyo adi bonda eboka evino ekɛlɛ egbasoake eNjambe obonɔ.

¹⁶ Adaka koko na kombe a kasaka ende na a ebɛ ende bo, Koi obaroi, na Kumu obakumu.

¹⁷ Nanɛ koko okina obwɛnji yona odaka ami a modika-busa. Iyo abea mbulu basusu baya bahombaka diko na kɔpi epipo bo, Doani; titanani a mojɔ molibonje linɛnɛ liNjambe,

¹⁸ a boyaka mini Mibakmuu, na mini Mibakapitɛni, na mini Mibato banɛnɛnɛ, na mini mipunda, na mini mibasoda bapunda, na mini Mibato basusu mɛnɛ, basɔmi na babuli, banɛnɛnɛ na bakɛkɛ.

¹⁹ Nanɛ Tito, na bakumu bangondo, na mandundu mabasoda babu, baya bama titana a bona bila, na yona odaka abaki a punda, na lindundu libasoda bande.

²⁰ Bapea Tito na motɔndɔi obokosea yona okɔkɔ mindumba, oko yona okosea bato na mindumba mimina, bato baya bama sɔ embete eTito, na baya bama sakoa elimo ende. Ibo basusu babae badumbama yana adaka bo mɔ, a libale limosa mosupulu.

²¹ Yona odaka abaki a punda awa basusu batongo na abɛnɛ onde, oko abɛnɛ yona omanaka a monɔkɔ monde. Na mbulu basusu bagola na mini mibu.