Boboloja 17 - Nouveau Testament en Ngombe 1961

Bokwa boBabilo

¹ Okina obabwɛnji sambo baya badaka na kɔpɔ sambo, adoa na abala na mbi bo, Doa bo nanejae wɛ esambi emwali obɔɔli yona monɛnɛ, yona odi na edie ende a diko didua jinɛnɛ.

² Bakumu bangondo bangɛkɛ na nde bɔɔli, na bato bangondo balangoi na vino elisɔngi linde.

³ Obwɛnji omina atomba mbi a mwembo a lisobe, na nanɛ okwa mwali oho. Adaka abaki a Tito mokpetu bosɔɔ yona odaka na kombe jinɛnɛ jibosambolu a mokuku monde, na adaka na melo sambo, na njeka domi.

⁴ Mwali omina alwaka bisenja bikpetu na bikpetu bosɔɔ; mohlo monde modaka molilo mowɔlɔ, na matai mayumu, na mayaka mayumu enɛnɛ. Adaka na kɔpɔ a ebɔ ende, kɔpɔ ewɔlɔ, yena eluma botɔ na ngando jinde jibosambolu, na lisɔngi linde, na ndukeli jinde.

⁵ Ekina kombe esɔnɔmɔ a licinga limbanda, na cina ekombe emina edi mojɔ mobombamake; BABILO MONƐNƐ, NANGE ’BATO BABƆƆLI NA NGANDO JIBOSAMBOLU JINGONDO.

⁶ Mbi nanɛ mwali omina yona oma langoa na makia mabasɛnɔke, na makia mabatati baYesu. Yana anɛ mbi mwali omina, nakamoa na bokamoa bonɛnɛ.

⁷ Obwɛnji ko abala na mbi bo, Okamoaka mojɔ moye? Mbi nadi boboloja ai wɛ mojɔ mobombamake momwali omina, na Tito yona omotombaka, yona odi na melo sambo na njeka domi.

⁸ Tito onɛki wɛ adaka, na aditi. Adi bomana ko a mombɔndɔ monase, na adi bonɔ oko a bodimoa. Na bato bangondo, oko baya badi pɛ bosɔnɔmɔ kombe a mokanda mobomɔ a bobanga bongondo, badi bokamoa yana anɛkɛ bo Tito yona odaka, yona oditi, na yona odi bodoa koko.

⁹ Mojɔ mu mobwani na bocingea bomoto obowɛi. Melo sambo midi meno sambo, na edie emwali edi a meno mimina.

¹⁰ Melo mimina midi koko bakumu sambo. Batano babu bakwi; okina adi oko; yona otongo adoakini; na yo akadoa, atayeyoa nongo ekoka.

¹¹ Tito yona odaka, na aditi e dɛye, adi kumu obomwambe; acingi na bakumu sambo, na akɛkɛ a bodimoa.

¹² Njeka domi jinɛki wɛ jidi bakumu domi baya basɔkini bokumu; badi bosɔ kpaci ebakumu, na Tito pongono, heure emɔci.

¹³ Ibo basusu badi na mokano momɔci, na bapaka ngulu ebu na kpaci ebu a Tito.

¹⁴ Badi bona bila na Mwana-Bata, na Mwana-Bata adi bobagbokeja, mojɔ bo yo adi Kumu obakumu, na Koi obaroi; na baya bacingi na nde babeama, babɔmɔ, na badi bato baejimeli.

¹⁵ Abala na mbi koko bo, Dua jinɛki wɛ, oho adi mwali obɔɔli na mobondo, jidi oko makota, na makumu, na bato, na kɔpi.

¹⁶ Njeka domi jinɛki wɛ, njeka jimina na Tito pongono,—ibo badi boda na mwali obɔɔli oko soki; bamobejabi, bamokinabi mbundu, bayakabí mimi minde na bamotumbabi na mosa.

¹⁷ Mojɔ bo Njambe asi mojɔ momina a milema Mibu bo bakɔe mokano monde na molema momɔci, na bo bapɛ Tito kpaci ebu ebakumu oko adi bibaeli bi-Njambe pɛ bopeta ngama.

¹⁸ Na mwali onɛki wɛ adi oko ngando enɛnɛnɛ, yena edi na kpaci ai bakumu bangondo.