Boboloja 16 - Nouveau Testament en Ngombe 1961

¹ Nakakokokɔpi epipo ekamane a tempelo, ekabale nababwɛnji sambo bo, Kɛni asope kɔpɔ sambo jilikundu liNjambe a ngondo.

² Obwɛnji oboso akɛ na asopa kɔpɔ ende a ngondo. Na bato baya badaka na embete eTito, na baya basakoaka elimo ende badingoa na pola jibe jisaya.

³ Obwɛnji obabae asopa kɔpɔ ende a madiba-mamukwa, na madiba makindoa makia, o makia manjemba emoto. Na leka losusu lua lodaka mɔ a madiba logwa oko bogwa.

⁴ Obwɛnji obasato asopa kɔpɔ ende a dua na njiba, na jikindoa makia.

⁵ Na naka obwɛnji omadiba akabale bo, Ee, wɛ Mosɛnɔke yona odi, na yona odaka, Wɛ olongi na bisambi biwɛ;

⁶ Mojɔ bo bato basopa makia mabasɛnɔke na mabatɔndɔi, Na wɛ obanusi makia. Mokindo mobu mobwani.

⁷ Naka koko litumbu likabale bo, Ee, Kumu Njambe obonɔ, Bisambi biwɛ bibɔngi, bidi bongbebongbe.

⁸ Obwɛnji obanɛi asopa kɔpɔ ende a modika-busa, na modika-busa mosɔ kpaci a bonɔngeja bato na mosa.

⁹ Bato bakɛloa na moi mopipo, na basinga kombe eNjambe yona odaka na kpaci a minɔngɔ mimina, na baibekoja nongo milema Mibu bo bakumejae Njambe.

¹⁰ Obwɛnji obatano asopa kɔpɔ ende a ngɛndɛ eTito. Bokumu boTito bohinda na modidi. Bato bakokala biemi bibu a mojɔ momwano,

¹¹ na basinga Njambe a mojɔ momwano mobu na pola jibu, na baihekoja nongo milema Mibu a bokina bikɔmɛli bibu.

¹² Obwɛnji obasamano asopa kɔpɔ ende a Pelata, dua yena enɛnɛ. Madiba madua emina makoka oko bokoka, a bosɛlingoa njea ebakumu baɛsɛta.

¹³ Nanɛ koko miembo Mibe misato mia midaka o magbɔsɔ, mikamane a monɔkɔ moDalakona, na a monɔkɔ moTito, na a monɔkɔ moMotɔndɔi obokosea.

¹⁴ Miembo mimina midi miembo Mibajabolo; mikɔkɔ mindumba, na mikɛkɛ ai bakumu bangondo esusu bo Mibabolee a mojɔ mobila a busa bua bonɛnɛ boNjambe obonɔ.

¹⁵ (Hokeani; mbi nadoaka na mbɛmbɛ emobi. Bojongoa ai moto yona odi mosu, yona obaneaka bisenja binde bo atamana mbundu na sɔni a boso bobato.)

¹⁶ Na Mibabolea a esika yena edi na kombe Alamagedo a kɔpi eBaEbele.

¹⁷ Obwɛnji osambo asopa kɔpɔ ende a pwea. Kɔpi epipo emana a tempelo; kɔpi emina edonga a ngɛndɛ na ebala bo, Mojɔ mosii!

¹⁸ Mikalimo mimana na daka enɛnɛ, na bɛi, na bojonga bongondo bonɛnɛ. Bojonga bomina bodaka bonɛnɛ mɛnɛ; ehole edi bato a ngondo, baipaka nɛ bojonga bongondo bonɛnɛ boa.

¹⁹ Ngando yena enɛnɛ ekabama, mabondo masato, na ngando jimakota jigwa. Njambe aibosa Babilo, ngando yena enɛnɛ; amonusa kɔpɔ elikundu linde ligbasoake.

²⁰ Sanga jisusu jicia bohali, na meno miiboloa koko.

²¹ Mbua monɛnɛ omatai adonga Diko, na makwa a diko dibato. Matai mamina madaka na manji, kilo domi-itano, kilo domi-itano, na bato basinga Njambe a mojɔ momogweli momatai cina bo mogweli momina modaka mojɔ monɛnɛ mɛnɛ.