Boboloja 15 - Nouveau Testament en Ngombe 1961

Babwɛnji Sambo; Kɔpɔ Sambo

¹ Nanɛ koko ekina embete etongo oho Diko, embete enɛnɛ ebokamoa, oko babwɛnji sambo baya bapeli minɔngɔ sambo, minɔngɔ misuka, mojɔ bo kɛnjɔ eNjambe edi bosia na minɔngɔ mimina.

² Nanɛ koko ekina eka yena edaka o libale litalatala lia liputoana na mosa. Baya bama gbokeja Tito, na elimo ende, na embete ekombe ende, badaka ba’mi a mbongu elibale litalatala, na badaka na bibumba biNjambe a mɔmɔ mabu.

³ Ibo ba’mbaka yembo eMose mokɔmɛli oNjambe, na yembo eMwana-Bata bo, Ee, Kumu Njambe obonɔ! Bilomu biwɛ bidi binɛnɛnɛ, bidi na bokamoa. Ee, Kumu omakota! Njea jiwɛ jidi jitangboake, njea jisoti.

⁴ Ee Kumu; odi pɛ bosuma, pɛ bokumeja kombe ewɛ nda? Mojɔ bo, odi mosɛnɔke oko wɛ pɛ. Makota masusu madi bodoa a bosakoa wɛ, Mojɔ bo masambeja mawɛ maboloi a bohu.

⁵ Ngɔngɔ jimina, nanja koko, na tempelo eEtondo ebotata oho Diko edipoama.

⁶ Babwɛnji sambo baya badaka na minɔngɔ sambo bamana a tempelo. Badaka na bisenja bipu bopɛ, na kamba jiwɔlɔ jidaka a mupa mabu.

⁷ Okina obato babomɔ apa babwɛnji sambo kɔpɔ jiwɔlɔ sambo jia jiluma na likundu liNjambe yona odi na bosusu.

⁸ Na tempelo eluma na ekumu, na ngulu eNjambe, o ekɔmɛli emodidi momosa. Pɛpɛ nongo moto obwani bokwea a tempelo oko adi minɔngɔ sambo Mibabwɛnji sambo pɛ bopeta sia.