Boboloja 14 - Nouveau Testament en Ngombe 1961

Mwana-Bata na Basikoami Bande a Mono moSiona

¹ Nanja koko, na nanɛ Mwana-Bata ami a Mono moSiona. Bato badaka na nde koto mokama domi-inɛi-na-inɛi, na badaka na kombe ende, na kombe eSangwa’nde, a maso mabu.

² Naka kɔpi ekahule Diko; edaka na molunju moepeela enɛnɛ, o ekɔmɛli ebɛi; kɔpi eka mbi ebwana na doi libato babibumba baya babomaka bibumba bibu.

³ Ba’mba yembo eyene a boso bongɛndɛ, na a boso bobasuku, na a boso bobato babomɔ banɛi. Pɛpɛ nongo okina otongo obwana bokoa yembo emina, oko bato bamina, bato koto mokama domi-inɛi-na-inɛi baya bama sikoama a ngondo.

⁴ Ibo badi oko baya baisabeja na bali, mojɔ bo batajebaka mojɔ momwali. Bacingamaka na Mwana-Bata bisika bisusu bikɛkɛ yo. Basikoama a tei ebato bo badae mbuma jiboso ai Njambe, na ai Mwana-Bata.

⁵ Bokosea boditi nongo a minɔkɔ mibu, mojɔ bo bapeliti nongo litɔnɔ.

Babwɛnji Basato Badoa na Bwɛnji

⁶ Nanɛ koko okina obwɛnji otongo akapimboe a tei ebusa. Iyo adaka na Mwako Mopele mua modi na bosusu, bo atɔndɔe bato bangondo, makota na makota, tungu na tungu, kɔpi na kɔpi, maboti na maboti.

⁷ Abala na kɔpi epipo bo, Bangani Njambe; mokumejani yo, mojɔ bo ehole ende ebosambeja emei. Mosakoani yo, yona oyoa Diko na nase, na madiba-mamukwa, na njiba.

⁸ Okina otongo, obwɛnji obabae adoa, na abala bo, Ekwi! Babilo ekwi, ngando yena enɛnɛ! mwali yona okɔ bo makota masusu malangoe na vino eposa elisɔngi linde.

⁹ Okina otongo, obwɛnji obasato adoa, na abekoa bo, Moto akasakoa Tito na elimo ende, na akasɔ embete ende a licinga limbanda, isa a ebɔ,

¹⁰ moto omina adi bomwaka vino elikundu li-Njambeyena esɛlingoamaa kɔpɔ ekɛlɛ ende, pɛpɛ nongo bombɛjɛ; na adi bodingoa na mosa na supulu a boso bobabwɛnji basɛnɔke, na a boso boMwana-Bata.

¹¹ Modidi momosa mobodingoa bobu moweaka diko oko na bosusu; baditi nongo na bowi, isa na bulu isa na moi, basakoi bamina baTito na elimo ende, na baya basɔ embete ekombe ende.

¹² A mojɔ momina, baya basumaka Mibeko mi-Njambe na ejimeli eYesu, babwani boda na lingbangba.

¹³ Naka koko kɔpi ekabale oho Diko bo, Sɔnɔ mojɔ mu; Bagwake baya bagwaka a tei eKumu badi na bojongoa, e dɛye, oko na bosusu. Mwembo mobalaka bo, Ee badi na bojongoa, bo baheme a minɔngɔ Mibu, mojɔ bo bilomu bibu bibasusaka.

Ejueli Engondo

¹⁴ Anja mbi koko, nanɛ eyembi epu. Okina adaka abaki a eyembi o moto. Adaka na likongo liwɔlɔ a molo monde, na mombimbi mopɔlu a ebɔ ende.

¹⁵ Okwa obwɛnji otongo amana a tempelo, na abekoa na bopipo ai yona odaka abaki a eyembi bo, Tomba mombimbi mowɛ na kɛsɛ, mojɔ bo ehole ebojua emei. Bojua bongondo bobwani oko bobwana.

¹⁶ Oko boa, yona odaka abaki a eyembi ameja mombimbi monde a diko dingondo, na ajua ngondo oko bojua.

¹⁷ Okina obwɛnji otongo amana a tempelo oho Diko, na yo adaka na mombimbi mopɔlu pongono.

¹⁸ Na okina obwɛnji otongo koko amana a litumbu. Iyo adaka na kpaci a mojɔ momosa, na abekoa na bopipo ai yona odaka na mombimbi mopɔlu; abekoa bo, Imeja mombimbi mowɛ mopɔlu; kɛsɛ bililo bimbuma jivine engondo, mojɔ bo mbuma jingondo jikpeti.

¹⁹ Obwɛnji omina ameja mombimbi monde a diko dingondo, akɛsɛ mbuma jivine engondo, na adumba jisusu a eboka enɛnɛ ekɛnjɔ eNjambe.

²⁰ Eboka emina edaka a sokolu engando. Yana asieja bo bo’nda mbuma, makia mamana a eboka, na makɛlɛ bohali, oko a kilometa mikama misato na domi-isamano; na madaka na ndinda oko a kamba emolo mo-punda.