Boboloja 12 - Nouveau Testament en Ngombe 1961

Mwali na Dalakona

¹ Embete enɛnɛ emana oho Diko, oko mwali yona olwa modika-busa o bisenja. Songe adaka a cina jibibota binde, na adaka na likongo a molo monde, oko njɔtɔ domi-na-babae.

² Mwali omina adaka na demi, na abekoaka a mojɔ mobipeko na mwano mobobota.

³ Ekina embete etongo emana oho Diko, oko Dalakona monɛnɛ mokpetu. Iyo adaka na melo sambo na njeka domi, na makongo mabokumu sambo madaka a melo minde.

⁴ Mokɔmbɔ monde mogbula libondo limasato linjɔtɔ badiko, na abadumba nase a ngondo. Dalakona ama a boso bomwali yona opalaka bobota, bo mwali akabota, yo amee mwana oko bomea.

⁵ Mwali abota mwana-momi yona odi boda na kpaci a makota masusu, na tondo ende edi boda tondo eebende. Mwana’nde ko atombama ai Njambe na a ngɛndɛ ende.

⁶ Mwali acia a lisobe, a esika ema sɛlingoa Njambe a mojɔ monde, bo bamobɔkɔe oho masu koto emɔci mikama Mibae na masu macinda masato.

⁷ Bila emana oho Diko. Mikaele na babwɛnji bande bana na Dalakona. Dalakona na babwɛnji bande bana,

⁸ na bagboka; na baiboloja koko esika eboda oho Diko.

⁹ Dalakona monɛnɛ akwa, njɔ yona moyou yona odi na kombe Jabalo na Satana, mokosei ongondo esusu. Adumbama a ngondo, na babwɛnji bande badu-mbama na nde pongono.

¹⁰ Naka koko kɔpi epipo ekabale oho Diko bo, Edɛye, mohelo modoi, na ngulu, na Bokumu boNjambe, na kpaci eMasiya onde. Mojɔ bo yona odumbea baninga basu ebango adumbami nase, oko yona obadumbeaka a boso boNjambe osu na bulu na moi.

¹¹ Bamogbokejai a mojɔ momakia maMwana-Bata na a mojɔ moebaeli etati ebu, cina bo baijuma bopa mihelo Mibu, pɛ bobanga bogwa.

¹² Sepani na mojɔ momina, no baya badi oho Diko, na Diko esusu mɛnɛ. Monɔngɔ ko a ngondo, na a madiba-mamukwa, mojɔ bo Satana atiti ai no na kɛnjɔ enɛnɛ, na ajebaka bo ehole ende edikai mweka pɛ.

¹³ Yana anɛ Dalakona bo adumbama nase a ngondo, yo abengana mwali yona oma bota mwana-momi.

¹⁴ Mwali ko asɔ mapapulapu mabae mapopo monɛnɛ, a bocia a esika ende a lisobe, bo bamobɔkoe oho yanga emɔci, na bianga bibae, na ekenge eyanga emɔci, bo Njɔ atamonɛe.

¹⁵ Njɔ asopa dua emadiba a monɔkɔ monde ngɔngɔ jimwali, bo amocindojae na mopimbola.

¹⁶ Ngondo ko ekɔmeja mwali; ngondo edipoa monɔkɔ na emea dua ema sopa Dalakona a monɔkɔ monde.

¹⁷ Dalakona akɛnjɔ na mwali bou mɛnɛ, na akɛ a bona bila na bana bande batongo baya basumaka mibeko mi-Njambe, na baya batataka tati ai Yesu.

¹⁸ Na ama a mbongu emadiba-mamukwa.