Boboloja 11 - Nouveau Testament en Ngombe 1961

¹ Mbi nasɔ mokɔmbɛ o pango; na okina abala na mbi bo, Angɔ; angɛ mwɛngi motempelo eNjambe, na litumbu, na baya basakoaka ena.

² Pɛ bongɛ ko libanda lia lidi a sokolu etempelo. Kina libanda, mojɔ bo lihɛngɛmi ai makota, na badi bodɛhɛ ngando esɛnɔke na bihota bibu songe domi-inɛi na babae.

³ Mbi nadi bopa batati bambi babae kpaci a bopa biseko masu koto emɔci mikama Mibae na masu domi-inɛi na badi bolwa oko minyuku pɛ.

⁴ Ibo badi mele mibae miolive na paka jibae, na badi mema a boso boKumu ongondo.

⁵ Okina moto akapala bobanɔngeja, mosa momanaka a minɔkɔ mibu a bowa soki jibu. Moto akapala boba-nɔngeja, adi bogwa boa.

⁶ Ibo badi na kpaci a bokanda busa bo mbua atakwa a masu mabiseko bibu. Na badi na kpaci a bokindoja madiba makia, na a boloma bego bisusu a ngondo yana apalaka bo.

⁷ Bakasieja tati ebu, tito yona omanaka a mombɔndɔ monase adi bona na bu bila, abagbokejabí na abawabí.

⁸ Njemba jibu jidikabí a licilinga lingando yena enɛnɛ; kombe engando emina edi oko mondɛ, edi Sɔdɔmɔ na Ejipito, esika egwa Kumu a mole-mobokea.

⁹ Bato banjabí njemba jibu masu masato na ekenge, bato bamakota mangondo, na maboti, na kɔpi na tungu jisusu. Na batajimabí bo moto apusee njemba jibu.

¹⁰ Bato bangondo basepabí na enanga enɛnɛ, na bapanabí leka a mojɔ momina, cina bo batɔndɔi ba babae bama nɔngeja bato bangondo.

¹¹ Ama nɔ masu masato na ekenge ko, mohuli mobomɔ mo’mi donga oko ai Njambe, na mokwea a tei ebu, na bama mema. Na bato baya babanɛ baluluma na bɔ.

¹² Ibo babae baka kɔpi epipo ekahule oho Diko, ekabale na bu bo, Doani jɔno diko! Na bawea a Diko na eyembi, ena ko soki jibu jibanjaka.

¹³ Ngondo ejonga na bojonga bonɛnɛ a ehole emina, na ekenge edomi engondo egwa oko bogwa. Bato bagwa a mojɔ mobojonga bomina, bato koto sambo. Baya badika badaka na bɔ bonɛnɛ, na basakoa Njambe oDiko.

¹⁴ Monɔngɔ moMibae mosii; mua momisato mokɛkɛ adoe.

Mondule Mosambo

¹⁵ Obwɛnji osambo ahuea mondule, na kɔpi jibekoa a Diko bo, Bokumu bongondo bodi e dɛye bokumu boKumu osu na Masiya onde. Iyo adi boda Kumu oko na bosusu.

¹⁶ Na basuku domi-ibae na banɛi baya badaka a mingbelɛngɔ Mibu a boso boNjambe basadumba nase, oko a maso mabu,

¹⁷ na basakoa Njambe bo, Bosakoaka wɛ Kumu Njambe obonɔ, yona odi na yona odaka, Mojɔ bo opei ngulu ewɛ enɛnɛ, na okondi a bokumu bowɛ.

¹⁸ Makota madaka na kɛlɛ; likundu liwɛ ko lidoi. Ehole ebosambeja bagwake emei, A bokɔ monganji ai batɔndɔi na ai basɛnɔke, bakɔmɛli bawɛ, Na bato baya basumaka kombe ewɛ, na banɛnɛnɛ na bakɛkɛlɛkɛ, Ehole ehowa likinda haya bahejaka ngondo.

¹⁹ Tempelo eNjambe oho Diko edipoama, na edejai emokongo monde edaka a bohu a tei etempelo ende. Mikalimo mimana a ehole emina, na daka enɛnɛ, na bɛi, na bojonga bongondo, na mbua monɛnɛ omatai akwa.