Baloma 9 - Nouveau Testament en Ngombe 1961

BaYuda na Sako eNjambe

¹ Mbi nabalaka mojɔ mosoti a tei eMasiya. Nitakoseaka. Molema mombi mojimaka na mbi a tei eMwembo Mosɛnɔke

² bo nadi na jɔɔlɔ enɛnɛ a molema mobi.

³ Mojɔ bo posa embi edi bo nalakejamembi mɛnɛ, na bo nabɔtɔne na Masiya, a mojɔ mobaninga bambi baya badi na mbi mbota emɔci.

⁴ Ibo badi BaYisalaele. Lisango libu lidi oko bosɔmi, na ekumu, na mikongo, na mibeko, na bosakoa, na sako.

⁵ Batata badi oko batata babu, na Masiya amana a mbota ebu. Bojongoa ai Njambe yona onɔi basusu, oko na bosusa. Amen.

⁶ Ebaeli eNjambe ko etakputoa. Mojɔ bo bato basusu baya babotama a Yisalaele baditi bana baYisalaele.

⁷ Na bato basusu baya badi bambota eAbalayama baditi bana bande. Mojɔ bo sako edi bo, Bana bawɛ bada bambota eIsaka.

⁸ Cina emina edi bo bana baNjambe baditi nongo baya babotama na bato; badi bana bande na soti oko sangoli jindikeja.

⁹ Bikenge bisako bidi oko bi, Mbi nâhula a edidi ye, na Sala âbota mwana momi.

¹⁰ Te yo pɛ; Lebeka alwa demi koko boa na tata osu Isaka.

¹¹ Na yana adaka bana pɛ bopeta botama, yana adaka bo pɛ bopeta kɔ bopele isa bobe, yo asɔ sako bo, Mosuku âda mokɔmɛli ombakɛli onde,

¹² bo ekɔmɛli eNjambe ebohɔ bato edi boyeyoa, te a mojɔ mobilomu bibu, oko a mojɔ mobobea bonde.

¹³ Mosɔnɔmɔ boa pongono bo, Napalaki Yakobo; nalonaki Esau.

¹⁴ Ekada boa, bodi bobala bo Njambe aditi bojo? Pɛpɛ nongo mweka.

¹⁵ Mojɔ bo Njambe abala na Mose bo, Nakajima bo nakee bato wa, nadi boba’kea wa. Nakajima bo nadae na molema moyɛmbu ai bato, nadi boda na molema moyɛmbu ai bo.

¹⁶ Oko boa mojɔ mosusu mocingi na monganji moNjambe, te nongo na bolulea bomoto, isa na bingi emoto.

¹⁷ Ekenge yena ebalama na Palo esɔnɔmɔ bo, Mbi nangɔjɔi wɛ bo nanejae ndangasa embi oko na wɛ, bo gala ekombe embi etunde a ngondo esusu.

¹⁸ Oko boa Njambe akeaka moto wa oko akajima bo amokee wa, na akapala bopingeja molema momoto akɔkɔ boa.

¹⁹ A mojɔ momina, odi bobala na mbi bo, Isa modi boa, abakeaka lindo ai so mojɔ moye? Odi bogbokeja bolulea bonde nda?

²⁰ Wɛ ko, wɛ moto, odi nda? Wɛ obwani boboma kitɛ na Njambe? Teni edi bobala na mobomi oteni bo, Okɔi mbi boa mojɔ moye?

²¹ Mobomi aditi moswa ’libali? Akapala, adi botomba ekenge elibali bo abome na ekina teni a mojɔ moelomu eekumu, na teni etongo a mojɔ moelomu engasa.

²² Bodi bobala bo, isa Njambe, nongo apalaka yo boneja kɛlɛ ende na bojebeja so bo adi na ndangasa, adi oko na lingbangba lmɛnɛ ai baya bamokejaka kɛlɛ, baya babwani oko na likundu linde?

²³ Isa apalaka boneja ekumu ende yena enɔi, ai baya bamokejaka wa? mojɔ bo abahɔ ehele a mojɔ moekumu, oko so;

²⁴ mojɔ bo abobei, te a tei eBaYuda pɛ, oko a tei ebapakano pongono.

²⁵ Abala boa a mokanda moOsea bo, Baidaka bato bambi; mbi ko nâbabea bato bambi. Nâda na epaeli ai yona osɔkini epaeli.

²⁶ Na bâsɔ kombe ebana baNjambe obomɔ, oko a esika eka bo ekenge bo, Ino oditini bato bambi.

²⁷ Yisaya pongono abala a mojɔ moYisalaele bo, Nongo etango ebana baYisalaele ekada o mbume jimadiba-mamukwa, Badi bohela oko eketa pɛ.

²⁸ Mojɔ bo Kumu ângameja ebaeli ende a ngondo Oko na bopipo na pɛlɛpɛlɛ.

²⁹ Na Yisaya abala koko bo, Eipeta da bo Kumu omandundu madiko akinea so bakina bana, Ka so na Sɔdɔmɔ bodi amɛci, Na bobwani oko na Gomola.

³⁰ Cina emina edi bo? Edi oko bo, bapakano baisusa njea ebodongo; ba’si ko bodongo, oko bodongo bua bocingi na ejimeli.

³¹ BaYisalaele ko baya baduka bodongo a njea eMibeko mibodongo, bakputoi, pɛ bobwana na Mibeko mimina.

³² Mojɔ moye? Mojɔ bo baduka bodongo a njea ebilomu bibu bɛnɛ, te nongo a njea eejimeli. Basaka libaku oko a litai lia lisakejaka bato.

³³ Mojɔ momina mosɔnɔmɔ bo, Anjani; mbi nasambeaka iitai a Siona a bosakeja bato, Litai linɛnɛnɛ a bobadumba. Endele ko, yona omojimeaka atasamboa nongo.