Baloma 8 - Nouveau Testament en Ngombe 1961

Lilonga liBato baMasiya

¹ Bodumba boditi koko edɛye a mojɔ mobato baya badi a tei eMasiya Yesu.

² Mojɔ bo mobeko moMwembo mosikoa mbi a mobeko mobobe na mobogwa.

³ Mojɔ bo Njambe aloma Mwana’nde mɛnɛ a mojɔ mobobe, o ekua emunu mobobe, a bodumba bobe a munu. Mibeko miibwana bokɔ boa a mojɔ moboyɛmbu bomunu.

⁴ Akɔ boa bo bocingoame a Mibeko, oko so baya badalaka a njea eMwembo, te nongo njea emunu.

⁵ Mojɔ bo baya badalaka a njea emunu balɛkɛ oko ngando jimunu; ibo ko baya badalaka a njea eMwembo balɛkɛ oko ngando jiMwembo.

⁶ Molema momoto mokasusa njea emunu, suka edi oko bogwa; molema ko mokasusa njea eMwembo, njea emina edi njea ebomɔ na bowi.

⁷ Mojɔ bo molema mua mosusaka njea emunu modi na Njambe soki; motasumaka Mibeko miNjambe mojɔ bo moditi na ngulu a bokɔ boa.

⁸ Na baya basusaka njea emunu batahɔnɔkɔ bosepeja Njambe.

⁹ Ino ko oditini bato bamunu; odini oko bato baMwembo, isa Mwembo moNjambe modi a tei enu soti. Moto amiti da na Mwembo moMasiya a tei ende, aditi moto onde.

¹⁰ Masiya ko akada a tei enu, miembo minu midi mɔ a mojɔ mobodongo, nongo adi mokuku eka ego a mojɔ mobobe.

¹¹ Isa Mwembo monde yona ongɔjɔ Yesu a bogwa modi a tei enu, yona ongɔjɔ Masiya Yesu a bogwa adi bopa no bomɔ a mikuku minu mibogwa, oko na Mwembo monde mua modi a tei enu.

¹² Oko boa baninga, boditi na nongo a munu bo bosuse njea emunu.

¹³ Mojɔ bo okasusani njea emunu odini bogwa. Okawejani ko bikɔmɛli bimokuku na ngulu eMwembo, ôdani na bomɔ.

¹⁴ Mojɔ bo bana baNjambe badi oko baya basusaka njea eMwembo moNjambe.

¹⁵ Ino ositini mwembo molibuli bo osumeni a mojɔ mobɔ; osini oko mwembo molisango; na bosembaka, Aba! Sesa! oko na mwembo momina.

¹⁶ Na Mwembo mɛnɛ motataka na miembo misu bo bodi bana baNjambe.

¹⁷ Isa bodi bana, bodi koko sangoli, sangoli jiNjambe, na bosangoanaka na Masiya. Bokadingoa na nde, bodi bokuma na nde pongono.

¹⁸ Mbi najimaka bo minɔngɔ miehole ye, na ekumu yena êboloa ai so ngɔngɔ, misangiti nongo mweka.

¹⁹ Mojɔ bo ngondo esusu embaka na tɛndɛ bo bana baNjambe baboloe.

²⁰ Ngondo edaka a libuli lingando jingasangasa, te na bolulea bonde mɛnɛ, oko na bolulea bonde yona oekina boa,

²¹ na njingo bo leka losusu lokɔ Njambe locingoame a libuli libopɔ, a bosangoa ekumu ebosɔmi bobana baNjambe.

²² Bojebaka bo ngondo esusu ebemaka na bipeko bilibota oko edɛye.

²³ Te leka lokɔ Njambe pɛ, oko so bɛnɛ baya bajui mbuma jiboso jiMwembo, bobemaka a tei esu yana ambaka so lisiko limikuku misu, oko bosɔmi bosu.

²⁴ Iso bobela oko na njingo emina. Bokada na njingo eeka, na bokanɛ eka etnina, njingo editi koko. Moto ambaka na njingo eka epeli yo?

²⁵ Bokada na njingo ko a mojɔ moeka edi so pɛ bonɛ, bombaka eka emina na lingbangba.

Njingo eBato baEjimeli

²⁶ Oko boa pongono, Mwembo mokɔmejaka so yana adi so na bwɛmbu; te bojebake bo’nga bua bobwani na su; Mwembo ko mongɔɔnɔkɔ a mojɔ mosu na mibemo mia miditi a kɔpi emoto.

²⁷ Iyona osisoaka milema mibato ajebaka mokano moMwembo, mojɔ bo Mwembo mongɔɔnɔkɔ a mojɔ mobasɛnɔke oko na bolulea boNjambe.

²⁸ Bato bakapala Njambe, bakabeama na mokano monde, ngando jisusu jikɔkɔ yo jidi a mojɔ mobopele bobu.

²⁹ Mojɔ bo ajeba bosoboso baya badi boda bato bande. Akolea eyou bo badae na elimo eMwana’nde, bo yo adae Mwana-sɔmi a tei ebananango banɛnɛ.

³⁰ Abahɛngɛ oko a mojɔ momina, na ahabea. Ababea na abalongeja. Abalongeja na abakumeja.

³¹ Cina emina edi bo? Edi oko bo, Isa Njambe adi na su, odi bolona so nda?

³² Iyo aijuma Mwana’nde mɛnɛ; amopa a mojɔ mosu basusu. Oko boa, atabakea a epeeli ende, epeeli eleka losusu? Njambe akahɔ bato, odi bolanga bobe bobu nda? Njambe alongejaka.

³⁴ Odi bodumba nda? Oko Masiya yona ogwa, yona ongɔ a bogwa, na adi edɛye a ebɔ ebami eNjambe, na angɔɔnɔkɔ amojɔ mosu.

³⁵ Odi bobɔteja so na ngɛnjɔ eMasiya nda? Isa bodingoa, isa jɔɔlɔ, isa monɔngɔ, isa nja, isa mbundu, isa njupi, isa likɔngɔ?

³⁶ Mojɔ bo mosɔnɔmɔ bo, Bodi a bogwa busa bosusu a mojɔ mowɛ; Banjaka so o bata baya bahɛngɛmɛ a bogwa.

³⁷ Pɛpɛ. Iso bogbokejaka a tei engando ji jisusu na bopipo mɛnɛ, oko na yo yona opalaka so.

³⁸ Mbi najebaka na soti bo pɛpɛ nongo eka emɔci ekɔ Njambe edi na ngulu a bobɔteja so na ngɛnjɔ eNjambe yena edi a tei eMasiya Yesu Kumu osu,

³⁹ isa bogwa, isa bomɔ, isa babwɛnji baDiko, isa makumu, isa ngando jia jidi edɛye, isa ngando jia jikɛkɛ adoe, isa ngulu oho Diko isa ya nase, isa ekina eka etongo.