Baloma 7 - Nouveau Testament en Ngombe 1961

Mibeko miMose na Bobe baBata

¹ Baninga, otajebakani bo Mibeko midi na kpaci ai moto oko yana adi yo mɔ. (Nabalaka na bato baya bajebaka Mibeko.)

² Oko boa, mwali akalongana na momi, akatani na muma’nde a mojɔ moMibeko, oko a bogwa bomuma’nde. Muma’nde ko akagwa, mobeko mobolongana na muma’nde moditi koko na kpaci ai yo.

³ Mwali omina ko akakɛ ai momi otongo oko muma’nde mɛnɛ agwakini, adi mwali obɔɔli. Muma’nde ko akagwa, mobeko mobolongana bomina moditi koko na kpaci ai yo; na akalongana na momi otongo aditi nongo moto obɔɔli.

⁴ Baninga, mojɔ monu modi koko boa; Mibeko miditi na kpaci ai no, mojɔ bo ogwani na mokuku moMasiya, bo okataneni na okina otongo, oko na yona ongɔjɔmɔ a bogwa, bo so bobote mbuma a mojɔ moNjambe.

⁵ Adaka so cina jikpaci jimunu, Mibeko misisoja posa jisu jibe jia jidaka na ngulu a tei ebinama bisu; na mbuma jibota so jidaka a mojɔ mobogwa.

⁶ Edɛye ko, Mibeko miditi koko na kpaci ai so; bodaka a mbɔci jiMibeko, na bogwa bo bokɔe elomu esu na bomɔ boyene boMwembo, te a njea eMibeko miyou mimokanda.

⁷ Cina emina edi bo? Mibeko midi mibe? Pɛpɛ nongo mweka. Endele ko, mbi najeba bobe oko a mojɔ moMibeko. Eipeta da bo Mibeko mibala bo, T’odae oko na mbengea, ka naijeba nongo bo mbengea edi.

⁸ Oko boa bobe boboloja njea a mojɔ moMibeko, na bosisoja posa jisusu jibe a tei embi. Bobe oko ngasa, pɛpɛ Mibeko, bodi oko bogwake.

⁹ Yana adaka mbi, pɛpɛ nongo Mibeko, nadaka mɔ; yana ko adoa Mibeko, bobe bosɔ ngulu, na mbi nagwa.

¹⁰ Mibeko mia midaka na sako ebomɔ miwa mbi oko bowa.

¹¹ Mojɔ bo bobe boboloja njea a mojɔ moMibeko, bokosea mbi na mowa mbi oko na Mibeko.

¹² Oko boa Mibeko midi misɛnɔke; na eleho edi esɛnɔke na bojo na epele.

¹³ Mojɔ mua mopele modaka ai mbi oko bogwa? Pɛpɛ nongo mweka. Bobe ko botomba mojɔ mopele a boweja mbi. Oko boa ekɔmɛli ebobe eboloa na soti, na bobe bogbasoa a mojɔ moMibeko.

¹⁴ Bojebaka bo Mibeko micingi na Mwembo; mbi ko nadi moto omunu a mbɔci jibobe.

¹⁵ Te nacingeake ekɔmɛli embi mɛnɛ. Nakapala bokɔ mokina mojɔ, nitakɔkɔ mojɔ momina; na nakalona mokina mojɔ, nakɔkɔ mojɔ momina.

¹⁶ Oko boa, nakalona mokina mojɔ, na nakakɔ mojɔ momina, najimaka bo Mobeko modi mopele.

¹⁷ A mojɔ momina, ekɔmɛli embi ecingiti na mbi mɛnɛ; ecingi oko na bobe bua bodi a tei embi.

¹⁸ Mojɔ bo, najebaka bo pɛpɛ nongo mojɔ mopele modi a tei embi, oko a tei emunu mombi. Nadi na bolulea bo nakɔe bopele, pɛ ko bohɔnɔ bokɔ boa.

¹⁹ Te nakɔke bopele bopalaka mbi bokɔ, na nakɔkɔ bobe bolonaka mbi.

²⁰ Nakakɔ mua molonaka mbi, editi mbi mɛnɛ yona okɔkɔ boa, oko bobe bua bodi a tei embi.

²¹ Oko boa, mojɔ monɛkɛ mbi moMobeko modi oko mu;—nakapala bokɔ bopele, bobe bodi na mbi.

²² Mbi nasepaka na Mibeko miNjambe a tei emolema mombi;

²³ endele ko, nanɛkɛ bo mobeko motongo modi a tei ebinama bimbi, mua monaka na bolɛ bomolema mombi, na mopeaka mbi njango a libuli limobeko mobobe bua bodi a tei ebinama bimbi.

²⁴ Mbi moto ojɔɔlɔ soti! Odi boheleja mbi a mokuku mu mobogwa nda?

²⁵ Oko Njambe; a mojɔ moYesu Masiya Kumu osu; bosakoa ai yo! Oko boa mbi mɛnɛ nasumaka Mibeko miNjambe na molema mombi; nasumaka ko mobeko mobobe na munu mombi.