Baloma 6 - Nouveau Testament en Ngombe 1961

Bato baNjambe Baditi Babuli baBobe

¹ Oko boa bodi bobala bo? Bodi boyeyoa a bobe bo monganji moNjambe mohɛe ai so?

² Pɛpɛ nongo mweka. Iso bogwi a bobe; oko boa bobwaniti boda koko a tei ebobe.

³ Otajebakani bo so basusu baya babatisama a tei eMasiya Yesu, bobatisama a tei ebogwa bonde.

⁴ Yana abatisama so, bopuseama na nde a tei ebogwa, bo bodae na ekɔmɛli ebomɔ boyene o angɔjɔmɔ Masiya a bogwa na ekumu eSango.

⁵ Mojɔ bo, isa bokatani na nde a tei ebogwa bonde, bodi bokatana koko na nde a njea ebongɔ bonde a bogwa.

⁶ Bojebaka bo moto osu moyou abakeama na nde a mole-mo-bokea, bo mokuku mobobe mogwɛ, na a bocingoa so a libuli libobe.

⁷ Mojɔ bo, isa moto agwi, bobe boditi koko na kpaci ai yo.

⁸ Na isa bogwi na Masiya, bojimaka bo bodi bohela na nde.

⁹ Mojɔ bo bojebaka bo, angɔ Masiya a bogwa, ataya gwa. Bogwa boditi koko na kpaci ai yo.

¹⁰ Iyo agwa, na bogwa bonde bodaka oko ehole emɔci pɛ a mojɔ mobobe. Edɛye ko, adi mɔ; na bomɔ bonde bodi oko ai Njambe.

¹¹ Oko boa, toma jimani bo ino odini bagwake a bobe, na bo odini na bomɔ boNjambe a tei eMasiya Yesu.

¹² T’ojimeni oko bo bobe bodae na bokumu a mikuku minu mia midi bogwa. T’osumeni oko posa jimokuku.

¹³ T’opejaeni oko binama binu a bokɔ bobe. Odini bato baya badaka bagwake, na ohelani koko. Oko boa, sapejani ai Njambe; hɛngɛni binama binu ai Njambe a bokɔ ngando jipele.

¹⁴ Bobe botada koko moswa’nu, mojɔ bo oditini cina ciMibeko; odini oko cina emonganji moNjambe.

¹⁵ Oko boa, isa monganji moNjambe modi na kpaci ai so, na Mibeko pɛpɛ nongo kpaci, bobwani bokɔ bobe? Pɛpɛ nongo mweka!

¹⁶ Okasumani moto, okasapejani ai moto, otajebakani bo odini babuli bamoswa omina? Isa odini babuli babobe, suka edi oko bogwa; isa odini babuli balisuma, suka edi oko bodongo.

¹⁷ Mbi nasakoaka Njambe mojɔ bo osumakani edɛye bokoja bosɔ no boso na milema minu boya, oko no baya badaka boso babuli babobe.

¹⁸ Asikoama no a bobe, odini edɛye babuli babodongo.

¹⁹ Mbi nabalaka na monɔkɔ momoto, mojɔ bo odini na bwɛmbu a munu. Toma pejani binama binu o babuli babodongo na bosɛnɔ, o apeja no boso binama binu bo bidae babuli babosɔtɔ na bobe bua bonɔi.

²⁰ Yana adaka no babuli babobe, oidakani a libuli libodongo.

²¹ Edɛye ko, odini na sɔni a mojɔ mongando jimina. Ndese enu edaka bo? Mojɔ bo suka engando jimina edi bogwa.

²² Edɛye ko osikoamini a bobe, na odini babuli baNjambe. Mbuma jibotaka no jidi oko bosɛnɔ, na suka emina edi oko bomɔ bua bodi na bosusu.

²³ Mojɔ bo ndese ebobe edi bogwa. Epeeli ko epaka Njambe bopa edi bomɔ bua bodi na bosusu a tei eMasiya Yesu Kumu osu.