Baloma 5 - Nouveau Testament en Ngombe 1961

Lilonga a Mojɔ moEjimeli

¹ Oko boa, adi so na lilonga a mojɔ moejimeli, bodi na bowi a tei esu na Njambe, a mojɔ moKumu osu Yesu Masiya.

² Iso bodi bambilimake a monganji mu moNjambe; bonɛ njea ebokwea a monganji momina oko a mojɔ monde; na bodi na sepi a mojɔ monjingo esu ebosɔ ekumu eNjambe.

³ Mojɔ motongo koko, bosepaka a tei eminɔngɔ misu. Bojebaka bo monɔngɔ mobotaka lingbangba;

⁴ lingbangba libotaka ekɔmɛli esoti; ekɔmɛli esoti ebotaka njingo.

⁵ Njingo etakputoa nongo, mojɔ bo ngɛnjɔ eNjambe esopei a tei emilema misu, oko na Mwembo Mosɛnɔke mosɔ so.

⁶ Mojɔ bo, Masiya agwea baya baijeba Njambe a ehole yena ebwana, oko yana adaka so pɛpɛ ngulu.

⁷ Odi bogwea moto otongo nda, nongo akada moto obodongo? Isa okina adi bojima bo agwɛ a mojɔ momoto mopele.

⁸ Njambe ko anejaka ngɛnjɔ ende ai so oko na mojɔ mu;—Masiya agwea so yana adaka so oko bato babe.

⁹ Oko boa, bolongi edɛye a mojɔ momakia mande, na yo mɛnɛ adi boheleja so na soti a kɛlɛ eNjambe.

¹⁰ Isa bogwa boMwana ’Njambe bodaka mokongo mobosiili bosu na Njambe, yana adaka so na Njambe soki; esingaiti bomɔ bonde! Adi so na bosiili bomina, bomɔ bonde bodi boheleja so.

¹¹ Mojɔ motongo koko; sepi esu edi oko ai Njambe, a mojɔ moKumu osu Yesu Masiya yona okwea bosiili a mojɔ mosu.

¹² Oko boa, bobe bokwea a ngondo na moto omɔci, na bogwa bokwea a mojɔ mobobe. A mojɔ momina, bogwa bonangana ai bato basusu, mojɔ bo bato basusu bakɔ bobe.

¹³ Bobe bodaka a ngondo oko Mibeko mipetakini da. Isa Mibeko ko miditi, lindo jiditi koko.

¹⁴ Bogwa bodaka na kpaci a ngondo, donga oko a ehole eAdama oko a ehole eMose, kpaci ai bato baya baikɔ bobe o ama kɔ Adama, yona odaka elimo eyona odaka na sako ebodoa.

¹⁵ Bobe bodi tungu emɔci; epeeli emonganji ko edi tungu etongo. Mojɔ bo, isa bato banɛnɛ bagwa cina ebobe bomoto omɔci, monganji moNjambe, na epeeli emonganji emoto omɔci, oko Yesu Masiya, ehɛ a mojɔ mobato banɛnɛ.

¹⁶ Epeeli emonganji edi tungu emɔci; suka ebobe bomoto omɔci ko edi mojɔ motongo. Mojɔ bo bosambeja bobobe bomoto omɔci bosia na bodumba; epeeli emonganji ko yena elongejaka so, edi a mojɔ mojibe jinɛnɛ.

¹⁷ Isa bogwa bosɔ bokumu ai moto omɔci a mojɔ mobobe bonde, baya basɔkɔ monganji moNjambe oko na bonɛtɔ, na epeeli ebodongo, badi bosɔ bokumu bobomɔ a mojɔ momoto omɔci koko, oko Yesu Masiya.

¹⁸ Oko boa koko, suka ebobe bomoto omɔci edaka bodumba a mojɔ mobato basusu, na suka eelomu emɔci ebodongo emoto omɔci edi lilonga na bomɔ a mojɔ mobato basusu.

¹⁹ Mojɔ bo isa bato banɛnɛ badi na lindo a mojɔ molipanga limoto omɔci, iboa koko bato banɛnɛ badi bolonga a mojɔ molisuma limoto omɔci.

²⁰ Yana adoa Mibeko, lindo jihɛ oko bohɛ. Bohe bodaka bonɛnɛ soti; monganji moNjambe ko monɔ.

²¹ A mojɔ momina, o adaka bobe na bokumu bobogwa, monganji moNjambe modi boda na bokumu bobomɔ oko na bosusu, a mojɔ moYesu Masiya Kumu osu.