Baloma 4 - Nouveau Testament en Ngombe 1961

Ejimeli eAbalayama

¹ Oko boa bodi bobala bo, a mojɔ moAbalayama yona odi tata osu a njea emokuku?

² Isa Abalayama alonga a mojɔ mobilomu, abwana bosakumeja na mojɔ momina, te a boso boNjambe ko.

³ Misɔnɔ ibalaka bo? Mibalaka bo Abalayama ajima Njambe, na ejimeli emina elangama ai yo o bodongo.

⁴ Moto akakɔ elomu, likonja lisɔkɔ yo liditi epeeli; abwani bosɔ likonja limina.

⁵ Endele ko, moto akada na ejimeli ai Njambe yona longejaka bato babe, alongaka a mojɔ moejimeli ende, te a mojɔ moelomu ekɔkɔ yo.

⁶ Dawidi pongono ajongoaka moto olongejaka Njambe, te nongo cina ebilomu.

⁷ Abala bo, Bojongoa ai bato baya basɔ boyɛ bojibe jibu, na mabunga mabu makundama.

⁸ Bojongoa ai moto,—Kumu akada pɛ bolanga koko bobe bonde o nongo.

⁹ Bojongoa bomina ko bodi oko ai bato babolena ganda pɛ, isa ai bato bamwea pongono? Mojɔ bo bobalaka bo ejimeli eAbalayama elangama ai yo o bodongo.

¹⁰ Edaka boa mojɔ moye? Edaka boa yana adaka yo pɛ bopeta lenama ganda isa ngɔngɔ? Te nongo ngɔngɔ, oko yana adaka yo pɛ bopeta lenama ganda.

¹¹ Iyo asɔ mojɔ mobolena ganda o embete, a boneja bo amaka da na bodongo yana adaka yo pɛ bopeta lenama ganda. A mojɔ momina yo adi tata obato basusu baya bajimaka, na badi na bodongo a miso maNjambe a njea emina, nongo adi bo pɛ bolenama ganda.

¹² Oko boa pongono, adi tata obato babolena ganda baya baditi na bolena boganda pɛ, mojɔ bo badalaka a njea eejimeli eAbalayama tata osu, yena esɔ yo yana adaka yo pɛ bopeta lenama ganda.

¹³ Abalayama aisɔ sako elisango lingondo ai yo mɛnɛ na bana bande a mojɔ moMibeko, oko a mojɔ mobodongo boejimeli.

¹⁴ Mojɔ bo isa basangoli badi oko baya bajimaka Mibeko, ejimeli edi eka engasa, na sako ebɔngiti.

¹⁵ Suka eMibeko edi kɛnjɔ; endele ko, isa Mibeko miditi, bosopa boMibeko boditi.

¹⁶ Mojɔ mosusu mocingi oko na ejimeli pɛ. Oko boa koko, sako emina edi mojɔ momonganji moNjambe, na edi ai bana basusu baAbalayama—te nongo ai baya bajimaka Mibeko pɛ, oko ai baya badi na ejimeli eAbalayama; mojɔ bo, yo adi tata osu basusu.

¹⁷ Mosɔnɔmɔ koko bo, Mbi nakɔi wɛ tata omakota manɛnɛ. Adi tata osu a miso maNjambe yona ojimea yo, oko Njambe yona opaka bomɔ ai bagwake, na abeaka leka lua loditi, bo lodae.

¹⁸ Abalayama, yana adaka yo pɛ njingo, ajima ko oko na njingo bo adi boda tata omakota manɛnɛ, o ama yo sɔ sako bo, Bana bawɛ badi boda boa.

¹⁹ Yana alɛ yo bo mokuku monde modi o mogo, (mojɔ bo adaka na bianga mokama na dea) na yana alɛ yo bo Sala adi motete, ejimeli ende eimbɛ nongo.

²⁰ Aidaka nongo na mokakwano a mojɔ mosako eNjambe; ejimeli ende emopa ngulu, na akumeja Njambe

²¹ mojɔ bo ajima na soti mɛnɛ bo Njambe adi bokɔ mojɔ mobala yo.

²² A mojɔ momina, ejimeli ende elangama ai yo o bodongo.

²³ Bikenge bimina ko,—Elangama ai yo—biisɔnɔmɔ a mojɔ moAbalayama pɛ.

²⁴ Bisɔnɔmɔ a mojɔ mosu pongono. Bodongo bolangama koko ai so baya bajimeaka yona ongɔjɔ Yesu Kumu osu a bogwa,

²⁵ oko Yesu yona ogwa a mojɔ mojibe jisu, na angɔ a bogwa a bolongeja so.