Baloma 2 - Nouveau Testament en Ngombe 1961

Bosamba boNjambe

¹ Oko boa opeliti mokalo, wɛ moto yona osambejaka otongo. Mojɔ bo okasambeja moto otongo, osadumbaka wɛ mɛnɛ, cina bo, wɛ yona osambejaka okɔkɔ ngando jimina wɛ mɛnɛ.

² Iso bojebaka bo bato bakakɔ ngando jimina, Njambe abasambejaka na soti mɛnɛ.

³ Wɛ moto yona osambejaka bato baya bakɔkɔ ngando jimina, na okɔkɔ boa wɛ mɛnɛ, odingaka bo odi bocia esambi eNjambe?

⁴ Isa osɛtojaka monganji monde monɛnɛ, na lingbangba linde, na yongi ende? Otajebaka bo monganji moNjambe mobeaka wɛ a bohekoja molema?

⁵ Esambi eNjambe esoti êboloa a busa bokɛnjɔ, na wɛ ohɛjɛkɛ na ohɛngɛkɛ kɛnjɔ ai wɛ mɛnɛ a busa bomina, cina ebaso ewɛ, na molema mowɛ mua mopeliti nongo dosa.

⁶ Mojɔ bo yo adi bokaba ai moto na moto libondo lia libwani na bikɔmɛli binde;

⁷ adi bopa bomɔ bua bodi na bosusu ai bato baya badi na lingbangba a bikɔmɛli bipele, baya badukaka ekumu, na lisuma, na bomɔ bua bodi na bosusu.

⁸ Bato ko baya badi na miano, baya balonaka Soti na basumaka oko bobe, badi bonɛ kɛnjɔ na likundu.

⁹ Moto na moto yona okɔkɔ bobɛ adi bonɛ jɔɔlɔ na molɔbɔ, MoYuda boso na MoEla pongono.

¹⁰ Ekumu ko, na sepi, na bowi jihɛngɛmɛ ai moto na moto yona okɔkɔ bopele, MoYuda boso na MoEla pongono.

¹¹ Mojɔ bo bato basusu badi amɛci a boso boNjambe.

¹² Bato basusu baya bapeliti Mibeko na bakɔkɔ bobe, bâgwa koko boa, pɛpɛ Mibeko. Bato ko baya badi na Mibeko, na bakɔkɔ bobe, bâsamba oko na Mibeko.

¹³ Mojɔ bo balongaka a miso maNjambe, te nongo baya bakaka Mibeko, oko baya basumaka Mibeko.

¹⁴ Bapakano bapeliti Mibeko; endele ko bakɔkɔ ngando jibekeaka Mibeko na bolɛ bobu bɛnɛ; oko boa, nongo adi bo pɛ Mibeko, badi na Mibeko a tei ebu.

¹⁵ Mojɔ momina monejaka so bo ngando jibekeaka Mibeko iisɔnɔmɔ a milema mibu. Bolɛ bobu bodi koko motati; na malɛ mabu mabadumbaka isa mabalongejaka.

¹⁶ Mojɔ mu modabi bohu a busa bosambejabí Njambe mijɔ mibombamake mibato, oko na Masiya Yesu; mwako mombi modi oko boa.

Mijɔ miBaYuda

¹⁷ Wɛ yona obalaka bo odi MoYuda, ejimeli ewɛ edi oko a Mibeko, na osakumejaka a mojɔ moNjambe.

¹⁸ Ojebaka bolulea bonde, na obɔkɔ ngando jipele, mojɔ bo ohokea hokoja boMibeko.

¹⁹ Ojimaka na soti bo obwani boneja njea ai bato baya bagwa miso, na bo odi bohu ai baya badi a modidi,

²⁰ molehi ai balaboake, na mokoja obana, mojɔ bo obolojai mokuku moejebeli na Soti a tei eMibeko.

²¹ Oko boa, wɛ yona okojaka batongo, otasakoja wɛ mɛnɛ? Okatɔndɔ mwako, olembaka bato bo bata’ba; wɛ mɛnɛ ko oditi na liba?

²² Wɛ yona olembaka bato bo bata’ngɛ bɔɔli, ongɛkɛ bɔɔli wɛ mɛnɛ? Wɛ yona olonaka bilimo, opunjaka tempelo?

²³ Wɛ yona osakumejaka a mojɔ moMibeko, asopaka wɛ Mibeko, otasambojaka Njambe?

²⁴ Mojɔ bo mosɔnɔmɔ bo, Kombe eNjambe esamboi a tei ebapakano a mojɔ monu.

²⁵ Isa osumaka Mibeko, bolena boganda bodi na cina soti. Isa ko osopaka Mibeko, bolena bowɛ boganda bodi oko ngasa mɛnɛ.

²⁶ Oko boa isa Mwea asumaka bokoja boMibeko, yo atabwana na wɛ molenake, nongo adi yo oko Mwea?

²⁷ Oko boa baya bapeliti embete ebolena ganda a mikuku, na basumaka Mibeko, badi bodumba no baya badi na mokanda moMibeko, na bolena boganda, na basopaka Mibeko.

²⁸ Odi MoYuda, te yona odi na embete eMoYuda a mokuku; bolena boganda bosoti bocingiti na mokuku, na boditi mojɔ mosokolu.

²⁹ Moto adi MoYuda, isa adi MoYuda a tei; bolena boganda bosoti bodi mojɔ momolema na momwembo, te nongo momokuku; bodi a mojɔ moesako eNjambe te a mojɔ momoto.