Baloma 14 - Nouveau Testament en Ngombe 1961

Bileho a Mojɔ moWa na Epaeli

¹ Isa moto aditi mombilimake a ejimeli ende, mosɔni bopele; pɛ bomodumbani a mojɔ mongando jijimaka yo.

² Okina moto ajimaka bo abwani boyaka leka losusu; moto ko yona odi na bwɛmbu ayakaka oko njua pɛ.

³ Moto yona oyakaka eka, abwaniti bosɛtoja moto yona odi na bikia. Na yona odi na bikia abwaniti bodumba moto yona oyakaka, mojɔ bo Njambe amojimaka.

⁴ Wɛ nda? Wɛ obwani bosambeja mokɔmɛli omoto otongo? Moswa’nde mɛnɛ ajebaka isa amai mema isa akwi. Adi bo’ma mema ko, mojɔ bo Kumu adi na ngulu bo amombilimejae.

⁵ Moto omɔci alɛkɛ bo busa bomɔci na busa botongo masangiti; moto otongo ko alɛkɛ bo masu masusumadi amɛci. Moto na moto abwani bojima na sotia molema monde.

⁶ Moto yona olɛkɛ bo bokina busa bodi bonɛnɛ, akɔkɔ boa na lisuma ai Kumu; yona opeliti bikia, ayakaka koko na lisuma ai Kumu, na asakoaka Njambe; yona odi na bikia, akiaka koko na lisuma ai Kumu, na asakoaka Njambe pongono.

⁷ Mojɔ bo moto t’ahelake a mojɔ monde mɛnɛ pɛ, na moto t’agwake a mojɔ monde mɛnɛ pɛ.

⁸ Adi so mɔ, hodi oko ai Kumu; na bokagwa, bodi oko ai Kumu. Oko boa, isa bodi mɔ, isa bokagwa, bodi oko ai Kumu.

⁹ Yesu agwa na ahela koko oko a mojɔ momina, bo adae Kumu obagwake, na Kumu obato baya badi mɔ.

¹⁰ Wɛ ko, osambejaka mwangwao mojɔ moye? Osɛtojaka mwangwao mojɔ moye? Iso basusu bodi bo’ma a boso bomongbɛlɛngɔ moesambi eNjambe.

¹¹ Mojɔ bo mosɔnɔmɔ bo, Kumu abalaka bo, Mbi nadi mɔ; Bato kanga basusu mɛnɛ badi botita na magbunda a boso bombi. Bato kanga basusu mɛnɛ badi bosakoa Njambe na minɔkɔ mibu.

¹² Oko boa so basusu bodi bosɔmbeja Njambe, moto na moto a mojɔ monde mɛnɛ.

¹³ Oko boa bobwaniti bosambejana koko; jimani oko bo obwanitini hokɔ mokina mojɔ mua mobwani boda libaku isa elambo anjea emwangwao.

¹⁴ Mbi najebaka; najebaka na soti, oko na Kumu Yesu, bo ekia eeka ecingiti na eka mɛnɛ, oko na moto yona okiaka eka emina. Akajima bo eka emina edi na ekia, edi boa oko ai yo.

¹⁵ Wɛ ko okayaka ekina eka, na mwangwao akada na wa a mojɔ momina, otasusaka koko njea eepaeli. Yesu agwea moto omina, na wɛ obwaniti bomobeja a mojɔ moeyakeli ewɛ.

¹⁶ Isa mokina mojɔ mua modi mopele a miso mawɛ, modi mobe a miso mabato batongo, pɛ bokɔ mojɔ momina.

¹⁷ Mojɔ bo, Bokumu BoNjambe bocingiti na boyaka na bomwaka; bodi mojɔ mobodongo, na bowi, na sepi, a tei eMwembo Mosɛnɔke.

¹⁸ Moto yona okɔmɛkɛ Masiya a njea jimina, adi na esako epele a tei ebato, na Njambe amojimaka pongono.

¹⁹ Oko boa, kinani milema misu midae oko na posa a ngando jibowi, ho bokɔmejane moto na moto.

²⁰ T’obejae oko elomu eNjambe a mojɔ moeka eboyaka. Leka losusu lobwani na boyaka soti; endele ko, moto akasakeja bato batongo na leka loyakaka yo, akɔkɔ bobe.

²¹ Okakia tito, isa okalona bomwaka vino, isa okalona mokina mojɔ motongo mua mobwani bosakeja mwangwao, okɔkɔ bopele.

²² Odi na ejimeli; banea ejimeli emina a tei enu na Njambe. Isa moto aditi na mokakwano a mojɔ mongando jijimaka yo, moto omina adi na sepi.

²³ Isa moto ko adi na mokakwano a mojɔ moekina eka, na akayaka eka emina, asadumbaka yo mɛnɛ; mojɔ bo atajimaka na soti mua mokɔkɔ yo. Mojɔ bo, isa mokina mojɔ mocingiti na ejimeli, modi oko mobe.