Baloma 13 - Nouveau Testament en Ngombe 1961Lisuma ai Bakumu 1 Moto na moto abwani bosuma bakumu bakpaci, mojɔ bo edi Njambe yona opaka kpaci esusu. Makumu maya madi, masɔ kpaci ai yo. 2 Oko boa, moto akakotoa kpaci emina, adi soki emokano moNjambe, na soki jimina jisamboa. 3 Moto akakɔ bopele, atabanga nongo bajuji; moto ko akakɔ bohe, adi bohanga bajuji. Oko boa isa opalaka boda pɛ nongo bɔ a mojɔ mokumu, toma da na ekɔmɛli epele, na yo adi bosepa na wɛ. 4 Mojɔ bo yo adi mokɔmɛli oNjambe a bokɔmeja wɛ. Okakɔ bobe ko, obwani bobanga, mojɔ bo juji aditi na kpaci ebowa boangasa; adi mokɔmɛli oNjambe, a bodumba moto yona okɔkɔ bobe. 5 Oko boa, moto abwani boda na lisuma, te cina ebɔ bomokindo, oko a mojɔ momojimo momolema monde. 6 Oputakani koko tako a mojɔ momina. Bakumu badi bakɔmɛli baNjambe, na ehole ehu esusu edi oko a elomu ebu. 7 A mojɔ momina, kabani ai bato basusu leka lua lobwani na bu; tako ai yona osɔkɔ tako, nongo ai yona osɔkɔ nongo; lisuma ai yona obwani bosɔ lisuma, na ekumu ai yona obwani bosɔ ekumu. Epaeli na Bosɛnɔ 8 Pɛ bodani na nongo ai moto, oko nongo eepaeli pɛ, bo opalaneni, moto na mina’nde moto. Mojɔ bo yona opalaka moto otongo asumaka Mibeko. 9 T’ongɛ oko bɔɔli. T’owoe oko. T’obe oko. T’omboe oko. Mibeko mk na mibeko mitongo isa midi, midi a tei eekenge ye, Toma pala motuteano mowɛ o asapalaka wɛ mɛnɛ. 10 Epaeli t’ekɔke bobe ai motuteano. Oko boa epaeli ebɔngejaka Mibeko. 11 Mojɔ motongo; ojebakani bo ehole emei, ehole ebosisoa ta hiɔ. Mojɔ bo, bokangɛ ehole ebanga so bojima na ehole ye, bohela bosu bobatami edɛye. 12 Bulu bobengi bosia, na busa bobengi bohoa. Yɛni so bobulɛe ngando jimodidi bo bolwae molilo mobohu. 13 Yɛni bodae na ekɔmɛli epele ebato baya badalaka a bohu, te na ebueli na bolangoa, isa na ndukeli na lisɔngi, isa na miano na likaka. 14 Lwani oko Yesu Masiya o elwaeli enu; t’okineni oko pokiso a mojɔ momunu, a bogoleja posa jimunu. |
Alliance Biblique de la R. D. Congo
Bible Society of the Democratic Republic of Congo