Baloma 12 - Nouveau Testament en Ngombe 1961

Ekɔmɛli eBato baMasiya

¹ Baninga, mbi nangɔɔnɔkɔ no oko na monganji moNjambe bo opejaeni mikuku minu ai Njambe, epeeli yena edi mɔ na esɛnɔke a bosepeja Njambe. Bosakoa bua bobwani na nu oko bu.

² T’odaeni oko na ekɔmɛli ebato bangondo ye. Toma dani na milema miyene bo okindoeni elimo etongo; oko boa odini bojeba bolulea boNjambe na soti, bolulea bonde bopele, bobɔngɔke na bobwanake.

³ Mbi nalehaka no basusu na monganji mosɔ mbi, bo moto atasakumeja yo mɛnɛ. Adi bosa’ngɛ na bolɛ, na mwɛngi moejimeli mokabaka Njambe ai moto na moto.

⁴ Mokuku momoto modi na binama binɛnɛ. Ibi bisusu ko bidi na bilomu tongotongo.

⁵ Iso bodi koko boa. Nongo adi so banɛnɛ, bodi mokuku momɔci a tei eMasiya, na bokatani so basusu, moto na moto.

⁶ Bipeeli bisu biditi amɛci; bicingi oko na monganji moNjambe ai moto na moto. Yona odi na epeeli ebotɔndɔ mwako, abwani botɔndɔ mwako na mwɛngi monde moejimeli.

⁷ Isa edi epeeli ebokɔmeja, moto adi bokɔmeja; na mokoja adi bokɔ elomu ebokoja.

⁸ Molehi adi na elomu eboleha. Yona opaka bipeeli adi bopa na likabo limonganji. Yona odi na elomu a boso bobato, adi boda na bingi; na yona okɔmejaka bato na wa adi boda na sepi.

⁹ Yɛ epaeli enu edae epaeli esoti. Dani na maneene a mojɔ mobobe; dani ko na posa engando jipele.

¹⁰ Toma palanani na epaeli emoto ai mwangwa’nde; moto adi boduka ekumu emoto otongo, te ekumu ende mɛnɛ.

¹¹ T’okineni oko bo bingi enu embɛ; kɔmɛni Kumu na peye eMwembo.

¹² Kinani njingo enu esepejae no. Dani na lingbangba a tei emonɔngɔ. T’ongwaeni oko bo’nga.

¹³ Dani na likabo ai bato baDenga baya badi na taka; asɔni bakɛndɛli bopele.

¹⁴ Jongoani bato baya badingojaka no; bajongoani, pɛ bobasingani.

¹⁵ Sepani na bato baya badi na sepi; yeani na bato baya bayeaka.

¹⁶ Dani na molema momɔci. T’odaeni oko na jala a milema minu; katanani na bato baya badi na milema mititake. Pɛ bosakumejani na bowɛi bonu.

¹⁷ Moto akakɔ no bobe, t’osɔmbejaeni oko bobe ai yo. Lɛni oko mijɔ mipele pɛ a boso bobato basusu.

¹⁸ Isa njea edi, kɔni na milema minu misusu bo otadani na mijɔ na bato batongo.

¹⁹ Baninga, T’okundeni oko likundu. Kinani mijɔ misusu a kɛnjɔ eNjambe; mojɔ bo, mosɔnɔmɔ bo, Njamhe abala bo, Likundu lidi oko ai mbi. Mbi nadi bosea ndese.

²⁰ Soki ewɛ akada na nja, mopa dia. Akada na ekangola, monusa madiba. Okakɔ boa, odi bomokeja sɔni enɛnɛ mɛnɛ.

²¹ T’ogbokeni oko na bobe; Gbokejani bobe ko na bopele.