Baloma 10 - Nouveau Testament en Ngombe 1961

BaYuda Balona Ejimeli

¹ Baninga, posa emolema mombi, na bonga bombi ai Njambe bodi oko a mojɔ mobu, bo bahele.

² Najimaka bo badi na bingi ai Njambe; bingi emina ko editi na bocingea.

³ Baduka njea ebu bɛnɛ ebodongo, mojɔ bo baimbetea njea ebodongo boNjambe, na baijima bodongo bonde.

⁴ Mojɔ bo Masiya adi suka eMibeko, bo moto na moto yona ojimaka adae na bodongo.

⁵ Mose asɔnɔ bo moto yona okɔkɔ bilomu bibodongo bua bocingi na Mibeko, adi bohela a mojɔ momina.

⁶ Cina ebodongo bua bocingi na ejimeli edi bo, T’obale oko a molema mowɛ bo, Odi bowea oho Diko nda? (a botiteja Masiya nase);

⁷ isa, Odi botita a ebubondo nda? (a bohuleja Masiya a bogwa).

⁸ Pɛpɛ; bodongo boejimeli bobalaka bo, Ebaeli ebati na wɛ; edi oko a monɔkɔ mowɛ, na a tei emolema mowɛ. Ebaeli emina edi oko mwako moejimeli motɔndɔkɔ so.

⁹ Okatata na monɔkɔ mowɛ bo Yesu adi Kumu, na okajima a molema mowɛ bo Njambe amongɔjɔ a bogwa, ôhela.

¹⁰ Mojɔ bo moto ajimaka na molema, na alongaka boa; atataka na monɔkɔ na ahelaka boa.

¹¹ Misɔnɔ mibalaka bo, Pɛpɛ nongo moto yona omojineaka odi bosamboa.

¹² Mojɔ bo BaYuda na BaEla badi amɛci. Kumu omɔci adi Kumu obu basusu, na likabo linde iibwani na bato basusu baya bamongɔɔnɔkɔ.

¹³ Mojɔ bo moto na moto yona ongɔɔnɔkɔ a kombe eKumu âhela.

¹⁴ Isa bamojimeakini ko, badi bomongɔɔnɔ na ye? Isa bakakini mwako monde, badi bomojimea na ye? Isa motɔndɔi aditi, badi boka na ye?

¹⁵ Na bato bamiti lomama, badi botɔndɔ mwako na ye? Mosɔnɔmɔ bo, Baya batɔndɔkɔ Mwako Mopele—bibota bibu esɛngɔ!

¹⁶ Bato basusu ko baibokea Mwako Mopele. Mojɔ bo Yisaya abalaka bo, Kumu, ojimi mwako mosu nda?

¹⁷ Oko boa bato bamiti ka, batada na ejimeli, na badi boka oko na Mwako Mopele moMasiya.

¹⁸ Mbi ko nahɔjɔkɔ bo, Baika? Ee, baka soti. Ngondo esusu eka kɔpi ebu; Mwako mobu momea oko a suka engondo.

¹⁹ Nahɔjɔkɔ koko bo, BaYisalaele baicingea? Ehele mɛnɛ Mose abala bo, Mbi nadi bokeja no likaka a mojɔ molikota lia lidi ngasa; Nadi bokeja no kɛlɛ a mojɔ molikota lia lipeliti bocingea.

²⁰ Ngɔngɔ jinde, Yisaya abala na eci bo, Ibaya baiduka mbi babolojai mbi; Nasabolojai ai baya baihɔjɔkɔ mbi.

²¹ A mojɔ moYisalaele ko, abala bo, Mbi naninojai mɔmɔ mambi busa bosusu Ai bato balipanga baya bapeliti lisuma.