Baloma 1 - Nouveau Testament en Ngombe 1961

¹ Mbi Paulo nadi mobuli oYesu Masiya. Nabeama bo nadae obwɛnji; nahɛngɛmɛ a mojɔ moMwako Mopele moNjambe

² mua modikaneja yo eyou na hatɔndɔi bande a Misɔnɔ Misɛnɔke,

³ oko mwako moMwana’nde yona odaka mwana ’Dawidi a njeamokuku.

⁴ Iyo ko akuma o Mwana ’Njambe na ndangasa a njea eMwembo mobosɛnɔ, yana angɔ yo a tei ebagwake.

⁵ Iso bosɔ monganji na elomu ebabwɛnji oko ai yo, bo bohekojae makota masusu a lisuma hejimeli a mojɔ mokombe ende.

⁶ Ino koko obeamani bo odaeni bato baYesu Masiya.

⁷ Njɛbɛ ai no basusu oho Loma baya basɔ epaeli eNjambe, na babeama bo badae basɛnɔke. Yɛ monganji na bowi boNjambe Sangwa’su na Kumu Yesu Masiya bodae ai no.

Njingo ePaulo

⁸ Mojɔ moboso; nasakoaka Njambe ombi na Yesu Masiya a mojɔ monu basusu, cina bo gala eejimeli enu etundaka a ngondo esusu.

⁹ Mbi nakɔmɛkɛ Njambe na mwembo mombi a elomu eMwako Mopele moMwana’nde, na yo adi motati ombi bo nalangaka kombe jinu a ma’nga mambi bihole bisusu.

¹⁰ Nangɔɔnɔkɔ Njambe bo nabolojae njea ekina ehole epele a bodoa ai no, isa bolulea bonde bodi boa.

¹¹ Mojɔ bo nadi na posa a bo’nɛnɛ na nu, bo napɛ no ekina epeeli emwembo a bombilimeja no.

¹² Nakada a tei enu bodi bopingejana, mbi a mojɔ moejimeli enu, ino a mojɔ moejimeli embi.

¹³ Baninga, napalaka najebejae no bo nadaka na mokano mobodoa oho ai no bihole binɛnɛ, bo nadae na likina lituna a tei enu o adi mbi na lituna a makota matongo; nanɛkini ko njea.

¹⁴ Nadi na nongo ai BaEla na ai bapakano pongono, ai bato babowɛi na ai bato balibumi pongono.

¹⁵ A mojɔ momina, nadi na posa bo natɔndɔe Mwako Mopele ai no pongono baya badi a Loma.

¹⁶ Mbi naditi nongo na sɔni a mojɔ moMwako Mopele, mojɔ bo modi ngulu eNjambe a boheleja moto na moto yona ojimaka, MoYuda boso, na MoEla pongono.

¹⁷ Bodongo boNjambe boboloi a tei eMwako Mopele, banga oko na ejimeli, suka oko na ejimeli, o adi mosɔnɔ bo, Moto obodongo ahela oko a mojɔ moejimeli.

Kɛle eNjambe a Mojɔ moBobe boNgondo

¹⁸ Njambe aneja kɛlɛ ende, na edonga oho Diko a mojɔ mobosɛtɔ na bobe bobato, mojɔ bo bobe bobu bobindanejaka Soti.

¹⁹ Mojɔ bo ejebeli eNjambe edi bohu a miso mabu; Njambe yo mɛnɛ abaneja.

²⁰ Leka lokɔ yo oko a bobanga bongondo lobolojaka ai so mijɔ minde mibombamake, na ngulu ende yena etasia, na bonjambe bonde. Oko boa bapeliti nongo mokalo.

²¹ Ibo ko, yana ajeba bo Njambe, baimokumeja o Njambe, na baimosakoa. Bahekoa a ngando jingasangasa, na milema mibu miyebe mihinda oko bohinda.

²² Basakumeja na bowɛi bobu, na bakindoa oko bigegele.

²³ Basɔmbɔtɔnɔ ekumu eNjambe yona oditi nongo na bogwa, na bilimo bimoto obogwa, na mbulu, na tito, na mboa babolanda.

²⁴ A mojɔ momina, Njambe abakinea a bosɛtɔ bomilema mibu bɛnɛ, bo basambojae mikuku mibu a tei ebu bɛnɛ.

²⁵ Mojɔ bo, balona Soti eNjambe a bojima mojɔ mobokosea; basakoa na bakɔmɛ leka lokɔ Moyoeli, te nongo yo mɛnɛ, yona odi na bojongoa oko na bosusu. Amen.

²⁶ A mojɔ momina Njambe abakinea a posa jibosambolu. Bali babu bakina elomu yena ebwana na mikuku mibu a mojɔ mongando jia jibɔngiti na mokuku.

²⁷ Bami koko boa—bakina mojɔ momomi na mwali, na bangoa na posa oko ai bami; na bakɔ mijɔ mibosambolu, bami na bami, na basɔ mokindo mua mobwana na bobe bobu a mikuku mibu bɛnɛ.

²⁸ Balɛ bo babwani bosɛtoja Njambe; oko boa Njambe abakina o babuli bamilema mibu mibokosea, bo badae na bikɔmɛli bia bibɔngiti.

²⁹ Baluma na bobe tungu jisusu, na bosɛtɔ, na mbengea, na libwano; likaka oko botɔ, na bowa, na miano, na epulu, na lisoki, na malɔngi.

³⁰ Bato baminɔkɔ mibe, baloni baNjambe, bato babiloli, bato bajala na egbo; balɛkɛ oko mijɔ mibe pɛ, na bapeliti lisuma ai baboti babu,

³¹ pɛpɛ bocingea, pɛpɛ lisuma a mibeko, pɛ epaeli, pɛ nongo wa.

³² Bajebaka mobeko moNjambe bo baya badi na bikɔmɛli bimina babwani oko na bogwa; endele ko, bakɔkɔ ngando jimina bo bɛnɛ, na basepanaka na bato baya badi na bikɔmɛli bimina.