Bagalata 6 - Nouveau Testament en Ngombe 1961

¹ Baninga, okahuoajani moto na mojɔ mobe, mo baya badi na Mwembo odini bohuleja moto omina na milema mi yɛmbu. Nganjama ko bo otamekama wɛ mɛnɛ.

² Kamoanani mina, moto na moto akamoe muna momina’nde; oko boa odini bosuma Mibeko miMasiya.

³ Moto yona odi oko moto-ngasa pɛ, akalɛ bo adi moto monɛnɛ, usakoseaka yo mɛnɛ.

⁴ Moto na moto adi bokokeleja ekɔmɛli ende mɛnɛ. Oko boa âda na njea bo asakumejae na ngando jinde mɛnɛ, pɛ bosa’ngɛ na moto otongo.

⁵ Mojɔ bo moto na moto adi botomba muna monde mɛnɛ.

⁶ Moto akakoja moto otongo Ebaeli, moto omina abwani bomokɔ monganji na leka londe losusu.

⁷ T’osakoseeni oko; moto atasɛkɛ Njambe, mojɔ bo moto adi bojua oko jia jinaka yo.

⁸ Moto aka’na dona oko a mojɔ momokuku, adi boyaka mbuma jibopɔ a mokuku monde mɛnɛ. Moto ko aka’na dona a Mwembo, adi bojua ejueli a Mwembo, oko bomɔ bua bodi na bosusu.

⁹ Ebɔngiti bo bongwae bilomu bipele; mojɔ bo, bomiti ’ngwa, ehole ekahwana, iso bodi bojua.

¹⁰ Oko boa, boka’nɛ njea a bokɔ bopele, yɛni bokɔe bopele ai bato basusu, gbo oko ai baya badi a denga diejimeli.

Ekumu ePaulo Edi Oko a Mole-Mobokea

¹¹ Anjani mboa ji jinɛnɛnɛ jisɔnɔkɔ na mbi mokanda ai no na ebɔ embi mɛnɛ.

¹² Bato baya badi na bingi ai no a mojɔ mobolena ganda, badi oko na posa eembete emokuku, bo batadingoa a mojɔ momole-mobokea moMasiya.

¹³ Mojɔ bo, ibo bɛnɛ, bato baya bajimaka bolena, batasumaka Mibeko, na bapalaka bo balenejae no, bo basakumejae na mikuku minu.

¹⁴ Mbi ko naditi nongo na ekina ekumu etongo, oko yena emole-mobokea moKumu osu Yesu Masiya, mojɔ bo ngondo ebakeama a mole-mobokea ai mbi, na mbi nabakeama a mole-mobokea a ngondo, a mojɔ monde.

¹⁵ Bolena boganda, isa bodi isa boditi, bodi mojɔ mongasa; mojɔ momɔci mua mobwani modi oko moto moyene.

¹⁶ Bowi na wa, ai bato basusu baya badalaka a njea ye, na ai Yisalaele oNjambe.

¹⁷ E dɛye, yɛ bonɔngeja mbi koko, pɛpɛ nongo moto, mojɔ bo nadi na bihuli biYesu a mokuku mombi.

¹⁸ Baninga, yɛ monganji moKumu osu Yesu Masiya modae na miembo minu. Amen.