Bagalata 4 - Nouveau Testament en Ngombe 1961

¹ Mojɔ mobalaka mbi modi bo, Isa sangoli adi yɛngɛ, nongo akada moswa ’ngando, adi o mobuli.

² Adi a mɔmɔ mabakoja na babanei oko a ehole ejimaka sangwa’nde.

³ Iso bodi koko boa. Amaka so da bɛngɛ, bomi daka oko a iibuli lingando jingondo ye.

⁴ Yana ko abwana ehole, Njambe aloma Mwana’nde yona obotama na mwali, yona obotama cina jiMibeko,

⁵ a bosikoa baya badaka cina jiMibeko, bo bosɛ bosɔmi bosu bobana.

⁶ Na adi no bana bande, Njambe aloma Mwembo moMwana’nde a tei emilema misu, na Mwembo mosembaka bo, Aba! Sesa!

⁷ Oko boa oditi koko mobuli, odi mwana mɛnɛ. Na adi wɛ mwana, odi sangoli, cina emonganji moNjambe.

⁸ Boso-boso, oijebakani nongo Njambe; odakani babuli baba-njambe baya baditi banjambe na soti.

⁹ E dɛye ko ojebakani Njambe,—gbo oko Njambe yona ojebaka no; oko boa osɔmbɔkɔni koko a ngando jingasangasa jia jipehti nongo ngulu, na opalakani bo odaeni koko a libuli lingando jimina mojɔ moye?

¹⁰ Bolɛ bonu bodi oko a masu, na songe, na bididi, na bianga.

¹¹ Mbi nadi na mokakwano isa elomu embi a tei enu enami oko bonama.

¹² Baninga, mbi nangaka no bo odaeni na mbi o adaka mbi na nu. Mbi naditi na nu nongo mojɔ.

¹³ Ojebakani bo natɔndɔ no Mwako Mopele ehole eboso oko na yogo a mokuku.

¹⁴ Na osɔni mbi o obwɛnji oNjambe, o Yesu Masiya yo mɛnɛ. Oilonani mbi; oisɛtojani mbi nongo adaka no na jeti a mojɔ momokuku mombi.

¹⁵ Monganji mua modaka na nu a ehole emina modi jɔ? Mojɔ bo, mbi natɔndɔkɔ no bo, Akɔkɔ no hɔnɔ, ka ohwani miso manu a hopa mbi.

¹⁶ E dɛye ko odini nambi soki, mojɔ bo natɔndɔkɔ no mua modi soti?

¹⁷ Ibo batongo badi na bingi enɛnɛ a mojɔ monu; editi ko bingi esoti. Bapalaka bo babɔtejae no na su, bo odaeni na bingi a mojɔ mobu.

¹⁸ Isa odini na bingi a mojɔ mongando jipele, obwanini boda na bingi emina bihole bisusu, te yana adi mbi na nu pɛ.

¹⁹ Bana bambi, mbi napekaka koko na bipeko bilibota a mojɔ monu, bo elimo eMasiya eboloe a tei enu.

²⁰ Posa embi edi bo nadae na nu e dɛye, bo nabale na nu na monɔkɔ motongo, cina bo nadi na mokakwano a mojɔ monu.

²¹ Tɔndɔni mbi mojɔ mu; ino baya bapalaka boda cina jiMibeko, otahokeani Mibeko?

²² Mojɔ bo mosɔnɔmɔ bo, Abalayama adaka na bana-bami babae. Abota okina na mobuli, na yona otongo na mwali osɔmi.

²³ Yona obotama na mobuli, abotama o abota-maka bana basusu; yona ko obotama na mwali osɔmi, abota cina esako eNjambe.

²⁴ Mojɔ momina modi oko mondɛ. Bali bamina badi o mikongo Mibae. Okina obu, Agala, yona obota bana a mojɔ molibuli, adi o Mono moSinai.

²⁵ Iyo Agala adi o Mono moSinai a Alabia. Cina emina edi oko Yelusalema; mojɔ bo ngando eYelusalema yena edi e dɛye, edi a libuli, na bana bande pongono.

²⁶ Yelusalema oho diko ko edi na bosɔmi, na yo adi ngwa’su.

²⁷ Mojɔ bo, mosɔnɔmɔ bo, Da na sepi, wɛ motete yona opeliti libota; Imba na sepi, wɛ yona oditi na bipeko bilibota; Mojɔ bo, bana bamwali yona odikai elengeli, Banɔi bana bamwali yona odi na momi.

²⁸ Baninga, iso bodi bana banjikano, o adaka Isaka.

²⁹ Yona obotama a ehole emina o moto omini, anɔngeja yona obotama o moto oMwembo, na edi koko boa e dɛye.

³⁰ Mosɔnɔ ko mobalaka bo? Mobalaka bo, Bengana mobuli-mwali na mwana’nde, mojɔ bo mwana omobuli atasangoa na mwana omwali yona odi sɔmi.

³¹ Oko boa baninga, so boditi bana bamobuli; bodi oko bana bamwali yona odi sɔmi.