Bagalata 3 - Nouveau Testament en Ngombe 1961

Mibeko na Ejimeli

¹ Ino BaGalatia, ino bindanga. Oseli no nda? ino baya banɛ na miso manu Yesu Masiya a mole-mobokea, bohu mɛnɛ.

² Mbi napalaka bohɔjɔ no mojɔ momɔci pɛ. Osɔni Mwembo cina ebilomu biMibeko, isa cina eejimeli a Mwako Mopele?

³ Adi no bindanga soti? Abanga no na Mwembo, opalakani bosukeja oko na ngando jimini?

⁴ Minɔngɔ minɛ no midaka oko ngasa? Isa midaka ngasa soti?

⁵ Iyona opaka no Mwembo na okɔkɔ mindumba a tei enu, akɔkɔ boa cina ebilomu biMibeko, isa a mojɔ moejimeli eMwako Mopele?

⁶ Abalayama ajima Njambe, na ejimeli emina elangama ai yo o bodongo.

⁷ Oko boa toma jebani bo baya badi na ejimeli, badi bana baAbalayama.

⁸ Mosɔnɔ moneja eyou bo Njambe adi bolongeja bapakano a mojɔ moejimeli, na mojebeja Abalayama Mwako Mopele na ebaeli ye, Makota masusu mangondo mâjongoama oko na wɛ.

⁹ Oko boa, baya badi bato baejimeli bajongoamaka na Abalayama, moto oejimeli.

¹⁰ Bato basusu baya bajimaka oko bilomu biMibeko badi cina jinakeja. Mojɔ bo mosɔnɔmɔ bo, Moto amiti suma ngando jisusu jia jisɔnɔmɔ a mokanda moMibeko adi cina jinakeja.

¹¹ Pɛpɛ nongo moto odi bolonga a boso boNjambe cina eMibeko; mojɔ momina modi bohu mɛnɛ. Mojɔ bo yona odi na bodongo a cina eejimeli, yo âhela.

¹² Mibeko ko micingiti na ejimeli, mojɔ bo yona okɔkɔ ngando jimina adi boda a tei engando jimina.

¹³ Masiya asikoa so a esinga eMibeko, mojɔ bo yo mɛnɛ adaka esinga a mojɔ mosu. Mojɔ bo mosɔnɔmɔ bo, Moto na moto yona ogwaka a mole alakejami.

¹⁴ Modaka boa bo bojongoa boAbalayama bodae ai bapakano oko na Masiya Yesu, na bo so bosɛ Mwembo mua modikejama oko a cina eejimeli.

Cina eMibeko miMose

¹⁵ Baninga, yɛ nabale na mondɛ mobato. Moto akadikaneja leka na mokanda, nongo mokada mokanda momoto pɛ, na bato bakajima mokanda momina, okina otongo atahakoa mokanda momina, ata-bakea mokina mojɔ motongo a mokanda momina.

¹⁶ Oko boa, njikano jidaka ai Abalayama na ai mbota ende. Aibala bo, Ai mbota jiwɛ, o mbota jinɛnɛ; oko, Ai Mbota ewɛ, mbota ewɛ emɔci, oko Masiya.

¹⁷ Cina emojɔ mobalaka mbi edi oko ye; Njambe abakea mokongo. Mibeko ko mia midoa ngɔngɔ, yana anɔ bianga mikama minɛi na domi-isato, miikputoja mokongo momina, miidongeja nongo njikano.

¹⁸ Mojɔ bo, isa lisango lidi a njea eMibeko, liditi a njea enjikano. Njambe ko alidikaneja ai Abalayama oko na njikano.

¹⁹ Oko boa, mojɔ moMibeko modi bo? Mibeko Mibakeama a mojɔ mojibe, oko a ehole ebodoa bomwana omina, mwana onjikano; na babwɛnji-aDiko bapeja Mibeko a mɔmɔ mamosiili.

²⁰ Mosiili aditi a mojɔ momoto omɔci pɛ; Njambe ko adi omɔci.

²¹ Ekada boa, Mibeko mikɛsɛni na njikano jiNjambe? pɛpɛ nongo mweka! Mojɔ bo, Njambe, akɔkɔ yo pa Mibeko mia Mibwani bopa bomɔ, ka bodongo bocingi oko na Mibeko.

²² Misɔnɔ ko minejaka bo bato basusu badi cina ebobe, bo baya bajimaka basɛ njikano, oko na ejimeli ai Yesu Masiya.

²³ Boso-boso, yana adaka ejimeli emina pɛ bopeta doa, Mibeko mihika so a bobanea so, oko a ehole ehoboloa boejimeli ngɔngɔ.

²⁴ Oko boa, Mibeko midaka o moto yona opea so ebɔ a boneja so njea ai Masiya, bo bolonge a mojɔ moejimeli.

²⁵ Adi so ko na ejimɛli e dɛye, boditi koko a mɔmɔ mamolɔndi.

²⁶ Mojɔ bo odini no basusu bana baNjambe a mojɔ moejimeli ai Yesu Masiya.

²⁷ Ino basusu baya babatisama ai Masiya, balwa Masiya oko bolwa.

²⁸ A tei ende, moto aditi MoYuda isa MoEla, isa mobuli isa sɔmi, isa momi isa mwali, mojɔ bo odini no basusu moto omɔci a tei eMasiya Yesu.

²⁹ Isa odini bato baMasiya, odini bana baAbalayama, na basangoli banjikano.