Bagalata 2 - Nouveau Testament en Ngombe 1961

Mijɔ miEjimeli na Mijɔ miMibeko

¹ Yana anɔ koko bianga domi-na-binɛi, nasɔmbɔ koko na Balanaba a Yelusalema. Nabea Tito pongono bo apakae mbi.

² Mbi nakɛ mojɔ bo Njambe aboloja mokina mojɔ ai mbi, na nabalakea Mwako Mopele motɔndɔkɔ mbi a tei ebapakano. Nakɔ boa oko na basuku bakpaci pɛ, te na bato batongo, bo najebe isa njea ema mbi susa na yena esusaka mbi e dɛye ebɔngi.

³ Tito, yona odaka na mbi, adaka MoEla; ibo ko baibekea bo bamolene ganda.

⁴ Bakina baninga babokosea ko bakwea kɛngi a tei esu na poloso, bo bakoke-lejae bosɔmi bosu bua bodi na su a tei eMasiya Yesu, a bohuleja so a libuli.

⁵ Iso ko boibabokea, pɛpɛ nongo mweka, bo Mwako Mopele moSoti moyeyoe na nu.

⁶ Na baya badaka na kpaci (Gala ebu editi eka a miso mambi; Njambe anjaka bato basusu amɛci,) baibakea nongo mokina mojɔ a mwako mombi.

⁷ Endele ko, yana acinea ’bo bo mbi nasɔ Mwako Mopele a mojɔ mobapakano, o ama sɔ Pɛtɛlo a mojɔ mobato baejimeli eBaYuda,

⁸ (Mojɔ bo, yona ohɔ Pɛtɛlo bo adae obwɛnji ai bato baejimeli eBaYuda, ahɔ koko mbi bo nadae obwɛnji ai bapakano,)

⁹ na yana anɛ bo monganji moNjambe mosɔ mbi, Yakobo na Pɛtɛlo na Yoane, baya badaka makwe maDenga, bapa so na Balanaba ebɔ ebami ebocinama, bo so bokɛe oko ai bapakano, na bo bɛnɛ ai BaYuda.

¹⁰ Balɛjɛ so oko mojɔ momɔci, bo botabosa bato babokwali, na mbi nadaka na bingi a mojɔ momina.

¹¹ Yana ko adoa Pɛtɛlo a Antiokia, mbi nalemoa na nde na bopipo mɛnɛ; mojɔ bo adaka na lindo.

¹² Yakobo aloma bakina bato oho, na yana adaka bo pɛ bopeta mea, Pɛtɛlo ayakaka na bapakano. Yana ko amea bato bamina, asahɛngɛ, na abɔtɔnɔ na bapakano, mojɔ bo abangaka BaYuda.

¹³ Bakina BaYuda batongo bakɔ na poloso boa, na Balanaba yo mɛnɛ ajima ekɔmɛli ebu.

¹⁴ Mbi ko, yana anɛ mbi bo batasusaka njea esoti eMwako Mopele, nabala na Pɛtɛlo yana adaka bo basusu baboli; nabala bo, Isa wɛ MoYuda okɔkɔ o akɔkɔ bapakano, te nongo ekɔmɛli eBaYuda, omekaka na bopipo a bohekoja bapakano a ekɔmɛli eBaYuda mojɔ moye?

¹⁵ Nongo adi so BaYuda a mojɔ mobobotama bosu, te bapakano babe,

¹⁶ bojebaka bo moto adi bolonga oko a mojɔ moejimeli ai Yesu Masiya pɛ, te nongo a mojɔ mobilomu biMibeko; mojɔ bo so bɛnɛ bojimea Masiya Yesu bo bolonge a mojɔ moejimeli ai Masiya, te nongo a bilomu biMibeko; cina bo pɛpɛ nongo moto odi bolonga a mojɔ mobilomu biMibeko.

¹⁷ Endele ko, isa bonɛ bo so pongono bodi bato babe yana adukaka so lilonga atei eMasiya, bobe bomina bocingi na Masiya? pɛpɛ nongo mweka!

¹⁸ Naka-ngɔjɔ ngando jidumba mbi, najimaka bo nadi moto mobe.

¹⁹ Mojɔ bo mbi nagwa a Mibeko oko cina eMibeko, bo nahele ai Njambe.

²⁰ Mbi nagwa na Masiya a mole-mo-bokea; endele ko nadi mɔ, te mbi mɛnɛ ko, oko Masiya yona odi mɔ a tei embi. Bomɔ bua bodi na mbi a mokuku e dɛye bodi bomɔ boejimeli, ejimeli ai Mwana oNjambe yona opala mbi na osapa a mojɔ mombi.

²¹ Mbi nitalona monganji moNjambe, cina bo, isa lilonga licingi na Mibeko, bogwa boMasiya boditi nongo na cina.