Bagalata 1 - Nouveau Testament en Ngombe 1961

¹ Njɛbɛ esu Paulo obwɛnji na baninga basusu baya badi na mbi, a Menga maGalatia.

² (Mbi naditi obwɛnji obato; naditi na kpaci emoto, oko kpaci eYesu Masiya, na eNjambe Sango yona omongɔjɔ a bogwa.)

³ Yɛ monganji na bowi boNjambe Sango, na boKumu osu Yesu Masiya bodae ai no.

⁴ Iyo asapa a mojɔ mojibe jisu bo asikoe so a ngondo ye ebe, o akana Njambe Sangwa’su.

⁵ Yɛ ekumu edae ai yo oko na bosusu. Amen.

⁶ Mbi nakamoaka bo oiyeyoani nongo a bobulɛ yona obea no a monganji moMasiya, na ohekoani a mokina mwako motongo

⁷ Mokina Mwako Mopele motongo moditi; bakina bato ko banɔngejaka no, na bapalaka botatana Mwako Mopele moMasiya.

⁸ Moto akatɔndɔ no mokina mwako motongo mua moditi Mwako Mopele motɔndɔ so no, isa mbi mɛnɛ, isa okina obwɛnji oDiko, yɛ moto omina asingame.

⁹ Mbi natɔndɔ no eyou, na natɔndɔkɔ no koko e dɛye, bo moto akatɔndɔ no mokina mwako motongo mua moditi Mwako Mopele mosɔ no, yɛ asingame.

¹⁰ Edukaka mbi e dɛye nde? —gala epele a miso mabato, isa a miso maNjambe? Mbi napalaka bo nasepejae bato soti? Akɔki mbi pala bosepeja bato pɛ, ka naditi nongo mokɔmɛli oMasiya.

Ejimeli ePaulo na Elomu Ende

¹¹ Baninga, mbi natɔndɔkɔ no bo Mwako Mopele motɔndɔkɔ mbi moditi mojɔ momoto.

¹² Naimosɔ ai moto, na moto aikojani Mwako Mopele; edi oko Yesu Masiya yona omoboloja ai mbi.

¹³ Ino ojebakani moda mombi moyou yana adaka mbi na ejimeli eBaYuda; ojebakani bo nadingoja na nabeja Denga diNjambe.

¹⁴ Nanɔ kola jilikota limbi jinɛnɛ na ejebeli engando jiBaYuda, na nadaka na bingi enɛnɛ mɛnɛ a mojɔ mongando jibatata.

¹⁵ Njambe ko, yona ohɛngɛ mhi oko a bobotama bombi, abea mbi na monganji monde,

¹⁶ na ajima bo abolojae Mwana’nde ai mbi, bo natɔndɔe Mwako monde ai bapakano. A ehole emina, naibala nongo na moto a mojɔ momina.

¹⁷ Naikɛ nongo a Yelusalema a bo’nɛnɛ na bato baya badaka babwɛnji boso bombi. Nakɛ oko a Alabia, na nahula ngɔngɔ a Damaseke.

¹⁸ Yana anɔ bianga bisato, nakɛ a Yelusalema a bo’nɛnɛ na Pɛtɛlo, na nayeyoa na nde masu domi-na-matano.

¹⁹ Nainɛ babwɛnji batongo; nanɛ oko Yakobo pɛ, mwanange ’Kumu.

²⁰ Mijɔ misɔneaka mbi no midi soti mɛnɛ—oko Njambe!

²¹ Nakɛ ngɔngɔ a makota maSilia na Kilikia.

²² A ehole emina, baipaka nɛ boso bombi a Menga maMasiya oho Yuda.

²³ Bama ka oko boka pɛ bo, Yona onɔngeja so boso, atɔndɔkɔ e dɛye mwako moejimeli emeka yo bobeja.

²⁴ Na basakoa Njambe a mojɔ mombi.