Bafilipoi 1 - Nouveau Testament en Ngombe 1961

¹ Paulo na Timoteo, bakɔmɛli baMasiya Yesu, ai basɛnɔke basusu baMasiya Yesu baya badi a Pilipoi, na ai banjeli na basuku baDenga pongono.

² Yɛ monganji na bowi boNjambe Sangwa’su, na boKumu osu Yesu Masiya, bodae na nu.

Sepi ePaulo a Mojɔ moBaPilipoi

³ Mbi nasakoaka Njambe bihole bisusu bilɛkɛ mbi no.

⁴ Te nakinake bosepa a bingeeli bimbi bisusu a mojɔ monu basusu,

⁵ cina ebokɔmeja bonu a elomu eMwako Mopele, banga na busa boboso mɛnɛ oko a ehole ye.

⁶ Mbi najebaka na soti bo yona obanga elomu epele a tei enu âesukeja bopele a mojɔ mobusa boYesu Masiya.

⁷ Ebɔngi bo mbi nadae na bolɛ bomina a mojɔ monu basusu, cina bo nabaneaka no a tei emolema mombi, isa a mbɔci ji, isa a elomu ebobanea na bopingeja elomu eMwako Mopele, oko no baya bakatani na mbi a bosɔ monganji moNjambe.

⁸ Njambe yo mɛnɛ ajebaka na soti bo nadi na nu posa oko na ngɛnjɔ eMasiya Yesu.

⁹ Na mojɔ mongaka mbi modi bo epaeli enu ehɛe bou mɛnɛ, na bo elume na ejebeli na bocingea,

¹⁰ a bombetea ngando jia jinɔi na bopele, bo odaeni pɛpɛ nongo mojɔ, pɛpɛ nongo pita, a mojɔ mobusa boMasiya.

¹¹ Yɛ lituna linu lidae lituna limbuma jipele jibodongo jia jidi a tei eYesu Masiya, a bokumeja na bosepeja Njambe.

Paulo a Blɔkɔ a Mojɔ moMwako Mopele

¹² Baninga, napalaka bo ojebeni bo mijɔ minɛkɛ mbi mikɔmejaka elomu eMwako Mopele oko bokɔmeja.

¹³ Bajebaka ya a ngando ebasoda, na a bisika bisusu bitongo, bo nadi a blɔkɔ a mojɔ moMasiya.

¹⁴ Na baninga banɛnɛ bahɛi na ejimeli ai Kumu a mojɔ mombɔci jimbi, na badi na eci a botɔndɔ mwako moNjambe, pɛpɛ nongo bɔ.

¹⁵ Bakina batɔndɔkɔ mwako moMasiya oko na likaka na misoo, batongo ko batɔndɔkɔ na milema mipele.

¹⁶ Ibaba bakɔkɔ boa cina eepaeli. Bajebaka bo mbi nadi ya a bokakela Mwako Mopele.

¹⁷ Iba batongo ko batɔndɔkɔ mwako moMasiya na miano, te nongo na soti, oko na njingo bo bapukejae mbi ya a blɔkɔ.

¹⁸ Pɛ mojɔ! batɔndɔkɔ mwako moMasiya a njea ji jisusu, isa a mojɔ moegbo, isa a mojɔ mosoti; mbi nasepaka a mojɔ momina, na nitakina bosepa.

¹⁹ Najebaka bo suka emojɔ mu êda oko bohela bombi cina ebingeeli binu, na bokɔmeja boMwembo moYesu Masiya.

²⁰ Posa embi enɛnɛ na njingo embi jidi bo nitasamboa nongo; bou oko bo nakumejae Masiya na eci enɛnɛ a mokuku mombi, isa na mohelo mombi, isa na bogwa bombi.

²¹ Mojɔ bo, ai mbi, bomɔ bodi oko Masiya, na bogwa bodi ndese.

²² Endele ko, isa ebɔngi bo nayeyoe a mokuku mu a mojɔ moelomu embi, nadi na mokakwano a mojɔ mobohɔ bombi.

²³ Nadi a mɛlɛ manjea. Posa embi edi bo nayane bo nadae na Masiya; mojɔ mua monɔi na bopele oko mu.

²⁴ Endele ko, ebɔngi bo nayeyoe a mokuku mu a mojɔ monu.

²⁵ Adi mbi na ejimeli emina, najebaka bo nadi boda na nu, na nâyeyoa na nu basusu, a bodaleja no, na a bosepeja no a ejimeli.

²⁶ A mojɔ momina, sepi enu a tei eMasiya Yesu edi bohɛ a mojɔ mobodoa bombi koko ai no.

Moda moBato baMasiya

²⁷ Ino ko, toma dani na ekɔmɛli yena ebwani na Mwako Mopele moMasiya. Oko boa, nongo nakadoa a bo’nɛnɛ na nu, isa nakadika ya, nadi boka mwako monu, bo odini bambilimake na molema momɔci, a bo’na o moto omɔci a mojɔ moejimeli eMwako Mopele.

²⁸ T’obangeni oko soki jinu nongo mweka. Mojɔ mu modi embete ai bo a mojɔ mobokwa bobu, na a mojɔ moboheleja bonu bua bohulaka ai Njambe.

²⁹ Mojɔ bo libondo linu liditi ejimeli ai Masiya pɛ; lidi oko bo odingoeni a mojɔ monde.

³⁰ O’kakani e dɛye bo mbi nanaka bila; oko boa, bila enaka mbi, yena enɛ no na mbi boso, edi bila enu pongono.