Baebele 6 - Nouveau Testament en Ngombe 1961

¹ A mojɔ momina, bobwani bokina mijɔ miMasiya mia midi o mijɔ Mibana, bo bonɔe a mijɔ Mibosuku. Bobwaniti bosɔnibɔ koko a botanda eyoeli-ecina, oko bohekoja bomolema a bokina bilomu bingasangasa, na ejimeli ai Njambe,

² na bileho a mojɔ batisimo, bobakea bomɔmɔ, bongɔ bobagwake, na bosambeja bua bodi na bosusu.

³ Njambe akajima, so bodi bokɔ boa.

⁴ Mojɔ bo, isa bato basi bohu, na balɛli epeeli eDiko, na basi epeeli eMwembo Mosɛnɔke,

⁵ na balɛli ebaeli epele eNjambe, na ngulu engondo ebodoa,

⁶ bato bamina bakalaboa, njea editi bo bahekojae koko milema, mojɔ bo babakeaka koko Mwana ’Njambe a mole-mobokea na bolulea bobu bɛnɛ, na bamopɔmbejaka a boso bobato.

⁷ Mojɔ bo, mokpɔtɔ mokasɔ mbua baya bakwaka a esika emina bihole hisusu, na mokabota leka a mojɔ mobato baya balia gbie, bojongoa boNjambe bodi a mokpɔtɔ momina.

⁸ Isa ko mobotaka oko njubɛ na njani pɛ, motabɔngɔ nongo, moditi na bojongoa; mobwani oko na mosa.

⁹ Baninga, nongo abalaka so boa, njingo esu a mojɔ monu editi boa; edi a mojɔ mongando jipele jia jicingi na boheleja.

¹⁰ Mojɔ bo Njambe t’abungake mojɔ; atabosa elomu enu, na epaeli enejaka no a kombe ende yana akɔmɛkɛ no bato baNjambe, na obakɔmɛkɛni oko e dɛye.

¹¹ Posa esu edi bo moto na moto a tei enu adae na bingi a bobanea tɛndɛ ende esusu oko a suka mɛnɛ.

¹² PƐ bodani na bomɛli. Ikoanani ko na bato baya basangoaka njikano cina eejimeli na lingbangba.

¹³ Mojɔ bo, yana akina Njambe Abalayama sako, abɛlɛ bɛli a kombe ende mɛnɛ. Aihɔnɔ bobɛlɛ bɛli a kombe eokina otongo, mojɔ bo pɛpɛ nongo okina otongo odi boso bonde.

¹⁴ Abala bo, Soti mɛnɛ, mbi nâjongoa wɛ oko na bojongoa; Nâhɛjɛ mbota ewɛ oko bohɛjɛ.

¹⁵ Oko boa, Abalayama, ama yo da na lingbangba, ami ko sɔ oko bodikeja.

¹⁶ Bato babɛlɛkɛ bɛli a kombe emoto yona odi boso bobu, na isa badi na kitɛ, kitɛ emina edi bosia a mojɔ mobɛli.

¹⁷ Oko boa Njambe abɛlɛ bɛli pongono, mojɔ bo apala bo basangoli bandi-keja bacingee na soti bo bodikeja bonde botakputoa nongo.

¹⁸ A mojɔ momina, so baya bacii bo bobolame, bobwani bosapingeja na bopea boku njingo yena edi a boso bosu, cina emijɔ mi Mibae mia mitakputoa nongo, mojɔ bo Njambe atahɔnɔ bokosea na mijɔ mimina.

¹⁹ Iso bopeli njingo emina o longo emwembo, njingo esoti na embilimake yena ekweaka a dɔngɔ ditongo diehuako.

²⁰ Na Yesu yo mɛnɛ asui hoso bosu, na akwei a tei eesika emina a mojɔ mosu, mojɔ bo adi Nganga Monɛnɛ na bosusu, oko na bonganga boMalekisedeke.