Baebele 4 - Nouveau Testament en Ngombe 1961

Liheme Libato baMasiya

¹ Oko boa, adi so na sako ebokwea a liheme linde, yɛni so bodae na bɔ bo okina onu asaka kputoa.

² Mojɔ bo iso boki koko Mwako Mopele, o ama bo ka. Bwɛnji ko boka bo bonama oko bonama, ema bo baya baka bwɛnji baibosɔ na ejimeli.

³ Iso ko baya bajimi bokweaka a liheme, o ahala yo bo, Nabɛlɛ bɛli a kɛlɛ embi bo, Ibo batakwea nongo e liheme limbi. Bilomu binde ko bisia oko a bobanga bongondo.

⁴ Mojɔ bo abala a ekina esika a mojɔ mobusa bosambo bo, Njambe ahema a bilomu binde bisusu a busa bosambo.

⁵ Abala koko a esika ye bo, Ibo batakwea nongo a liheme limbi.

⁶ Oko boa, isa baya baka Mwako Mopele baibɔngɔ bo bakwee cina elipanga, sako ebokwea edikai a mojɔ mobakina batongo, bo bakwee.

⁷ Njambe ajima koko bokina busa a mojɔ momina, oko busa bu, o abala yo na Dawidi ngɔngɔ mɛnɛ ekenge emi so bala bo, Oka’kani monɔkɔ monde busa bu, T’opingejaeni oko milema minu.

⁸ Mojɔ bo, Yoswa, akɔkɔ yo pa bato liheme, ka Njambe aibala ngɔngɔ a mojɔ mobusa botongo.

⁹ Oko boa, liheme liSabata lidikai a mojɔ mobato baNjambe.

¹⁰ Mojɔ bo, moto akakwea a liheme liNjambe, ahemaka a hilomu hinde, o ahema Njambe a bilomu binde.

¹¹ A mojɔ momina, bobwani boda na bingi a bokwea a liheme limina, bo pɛpɛ nongo moto odi bokwa na ekɔmɛli emina elipanga.

¹² Mojɔ bo, Ebaeli eNjambe edi mɔ, edi na ndangasa, na enɔi ambombo na bopɔlu. Ekwɛlɛkɛ moto a bobɔteja molema na mwembo, na mongi na libɔngɔ; na esambejaka malɛ na mikano mimolema.

¹³ Pɛpɛ nongo moto odi bosabomba ai yo, na mijɔ misusu midi bohu na mbundu mɛnɛ a miso mande yona osambejaka so.

Yesu Nganga Monɛnɛ Yona Onɔi

¹⁴ Adi so ko na Nganga Monɛnɛ yona onɔi oho Diko, oko Yesu Mwana ’Njambe, kwani bopee boku ejimeli esu.

¹⁵ Mojɔ bo, iso boditi na Nganga Monɛnɛ yona opeliti wa ai so yana adi so na bwɛmbu, oko Nganga Monɛnɛ yona onɔ njea jisusu jibomeka o akɔkɔ so, pɛ ko bokɔ nongo bobe.

¹⁶ A mojɔ momina, so bobwani bobatama na mongbɛlɛngɔ momonganji, pɛpɛ nongo mokakwano, bo bosɛ wa, na bo bobolojae monganji a bokɔmeja so a ehole etaka.