Baebele 11 - Nouveau Testament en Ngombe 1961

Ejimeli

¹ Ejimeli edi ndanga engando jilɛndɛkɛ so; enejaka so bo ngando jidi so pɛ bonɛ na miso jidi soti.

² Bato baehele basɔ tati epele oko a mojɔ moejimeli.

³ Edi oko a mojɔ moejimeli bo bocingeaka bo Njambe ayoa ngondo na ebaeli ende, na bo atomba leka lodi so pɛ bonɛ na miso a bokɔ leka lonɛkɛ so.

⁴ Na lisiko lipa Abela, na lisiko lipa Kama, lia liAbela lmɔ na bopele, oko a mojɔ moejimeli. Alonga na du o moto obodongo, mojɔ bo Njambe ajima masiko mande. Iyo agwa; abalaka ko na su e dɛye a njea eejimeli emina.

⁵ Anoka akindoa a mojɔ moejimeli, bo atanɛe nongo bogwa, na aiboloa koko, mojo bo Njambe amotomba. Adaka yo pɛ bopeta kindoa, adaka na esako bo asepejaka Njambe.

⁶ Isa ejimeli editi, moto t’ahɔnɔke bosepeja Njambe. Mojɔ bo moto yona odoaka a Njambe abwani bopeta jima bo Njambe adi, na bo asepejaka baya bamodukaka.

⁷ Noa asɔ eleho ai Njambe a mojɔ mo ngando jidaka yo pɛ bopeta nɛ na miso; ahokea, na ayoa masua oko a mojɔ moejimeli, bo ahelejae denga dinde. Oko boa adumba ngondo, na asangoa bodongo bua bocingi na ejimeli.

⁸ Abalayama asuma Njambe cina eejimeli, yana abeama yo bo akɛe a ekina esika, yana adaka yo pɛ bopeta Sangoa esika emina; na angɔ, pɛ ko bojeba esika ekɛkɛ yo.

⁹ Adaka mokɛndɛli a esika ebodikeja, oko a mojɔ moejimeli; edaka o esika ebato batongo, na yo apika bitondo a esika emina, bo adae ena na Isaka na Yakobo, basangoli na nde babodikeja bomɔci.

¹⁰ Mojɔ bo njingo ende edaka oko a ngando mɛnɛ yena edi na eyoeli-ecina eboyeyoa; yona okana ngando emina, na moyoeli ongando emina adi oko Njambe.

¹¹ Sala yo mɛnɛ, nongo adaka yo mobange, asɔ ngulu bo alwae demi cina eejimeli, mojɔ bo ajima bo yona omokinea sako atakpu toja sako.

¹² Oko boa momi omɔci, mokuku monde oko mogwake, abota bato banɛnɛ pɛ njɛngi, baya badi o njɔtɔ badiko, na mbumee jimbongu emadiba-mamukwa.

¹³ Ibo basusu bagwa na ejimeli, pɛ ko bosɔ ngando jibodikeja. Bajinɛ ko bohali, na basepa a mojɔ momina, cina bo bajima bo badi oko bakɛndɛli na midoa a ngondo.

¹⁴ Bato baya babalaka boa, banejaka na soti bo badukaka ngando oko boduka, ngando ebu bɛnɛ.

¹⁵ Akɔkɔ bo lɛ ngando ema bo kina, ka badaka na njea ebosɔnibɔ oho.

¹⁶ Posa ebu ko edi a ngando yena enɔi na bopele, oko oho Diko. A mojɔ momina, Njambe aditi na sɔni a boda Njambe obu, mojɔ bo yo asɛlingoa ngando a mojɔ mobu.

¹⁷ Abalayama, yana amekama yo, apa Isaka o lisiko cina eejimeli. Iyo, yona osɔ madikeja, ajima bo apɛ mwana’nde omɔci o lisiko.

¹⁸ Na sako edaka a mojɔ momwana omina bo, Bato bambota ewɛ badi bomana oko ai Isaka.

¹⁹ Iyo ajima bo Njambe adi na ngulu a bongɔjɔ bato a bogwa mɛnɛ. Na amosɔ koko boa, mojɔ bo adaka o mogo.

²⁰ Isaka ajongoa Yakobo na Esau a mojɔ mongando jibodoa, oko cina eejimeli.

²¹ Yakobo, yana adaka yo oko a bogwa, ajongoa bana-bami baYosepa, omɔci omɔci, cina eejimeli, na asambimeja na pango ende bo ange Njambe.

²² Yosepa, yana abenga yo bogwa, abala a mojɔ moboyana boBa-Yisalaele oko cina eejimeli, na akina monɔkɔ a mojɔ monjemba ende.

²³ Baboti baMose bamobomba songe basato yana abotama yo, cina eejimeli, mojɔ bo banɛ bo adi mwana mopele, na baibanga mobeko mokumu.

²⁴ Mose, yana akandoa yo, alona bo bamobee mwana omwa’mwali oPalo.

²⁵ Na bocingama na bato baNjambe a bodingoa bobu, na bosepa na sepi yena etayeyoaka a mojɔ mongando jibe, yo apala gbo oko bocingama na bato baNjambe a bodingoa bobu.

²⁶ Na biloli a mojɔ moMasiya, na leka loyumu loEjipeto, yo ajima bo biloli a mojɔ moMasiya binɔi na yumu, mojɔ bo abakea miso mande a ndese.

²⁷ Adonga a Ejipeto cina eejimeli, pɛ bobanga nongo kɛlɛ ekumu, mojɔ bo adaka na molema mombilimake, o moto yona onjaka okina yona otaboloaka na miso.

²⁸ Asɛlingoa Kola eBonɔ, na amɛsɛ makia cina eejimeli, bo obwɛnji-obogwa anɔe basɔmi baYisalaele.

²⁹ Baleka Madiba Makpetu o ngondo mɛnɛ ekokake, cina eejimeli. BaEjipeto ko, ameka bo bokɔ boa, bagwa a madiba.

³⁰ Ama bo hombâ Yeliko masu sambo, mongba-momatai mongando momi sopea oko bosopea cina eejimeli.

³¹ Laba, mwali ondukeli, aigwa na bato balipanga, cina eejimeli, mojɔ bo asɔ kɛngi na bowi.

³² Mojɔ motongo môbala mbi nda? Ehole etakaka na mbi a botɔndɔ mijɔ miGidona, na Balaka, na Samasona, na Yepeta, na Dawidi, na Samwele, na batɔndɔi.

³³ Edaka oko a mojɔ moejimeli bo bagbokeja makumu, basambeja mijɔ na soti, basɔ madikeja, badipa minɔkɔ migbɔngɔ,

³⁴ badima ngulu emosa, bahela a mwɛngɔ moabɛnɛ, basɔ ngulu a tei eyogo, badaka bato bapipo a bila, na bacieja mandundu masoki jibu.

³⁵ Bali basɔ koko bato babu baya bahula a bogwa. Batongo batuama nji oko a bogwa, pɛ bojima bo bacinoame, bo bangɔe a bomɔ bua bonɔi na bopele.

³⁶ Eatongo koko badingoana matangola, na nji, ee na minyɔlɔ, na blɔkɔ pongono.

³⁷ Baba’la matai, baba’la na misumani, bagwa na abɛnɛ, balwa biobo bibata na kambɛli; badaka na bokwali, na esɔpi, na jɔɔlɔ enɛnɛ.

³⁸ Ngondo eibɔngɔ a mojɔ mobu; njea jibu jidaka oko a lisobe, na a meno, a mimbɔndɔ, na a bibubondo bingondo.

³⁹ Ibo basusu bangameja ejimeli ebu, pɛ ko bosɔ mua modikejama.

⁴⁰ Mojɔ bo Njambe asɛlingoa mokina mojɔ mua monɔi na bopele a mojɔ mosu, bo bobɔngɔ bobu bodae na su pongono.