Bikɔmɛli 9 - Nouveau Testament en Ngombe 1961

Saula Ajima

¹ Saula aikina bokanea bacingami baKumu bo abawoe. Iyo akɛ ai mosuku onganga

² na amonga mikanda a mojɔ mosinagoge jiDamaseke, bo akaboloja bato baNjea emina oho, adi bohula na bu a mbɔci a Yelusalema, isa bami isa bali.

³ Abatama yo na Damaseke, oko yana adalaka yo a njea, bohu bonɛnɛ bodonga bundumo oho Diko, na bongɛngɛ a esika edaka yo.

⁴ Iyo akwa ta kpɔtɔ, na aka kɔpi ekabale na nde bo, Saula, Saula, onɔngejaka mbi mojɔ moye?

⁵ Iyo asɔmbeja bo, Wɛ nda, Kumu? Kumu abala bo, Mbi nadi Yesu, nâ wɛ onɔngejaka oko mbi.

⁶ Angɔ ko. Kɛ oho a ngando, na odi boka oho mojɔ mobwani wɛ bokɔ.

⁷ Bami baya bamopakaka a njea badaka o bimimi; baka kɔpi, pɛ ko bonɛ nongo moto.

⁸ Saula angɔ a kpɔtɔ; adipoa yo miso ko, ainɛ nongo eka. Oko boa bamopea ebɔ na bamolɔndɔ boa a Damaseke.

⁹ Adaka masu masato pɛ bonɛ na miso, pɛ boyaka, pɛ bomwaka.

¹⁰ Okina mocingami adaka a Damaseke, kombe ende Anania. Kumu amobea a njɔti bo, Anania. Iyo ’ɛ bo, Kumu, mbi yona!

¹¹ Na Kumu abala na nde bo, Angɔ, kɛ oho a licilinga lia lidi na kombe Litangboake, oko a ndako eYuda, na duka moto ena yona odi na kombe Saula, moto oTalusia.

¹² Iyo angaka edɛye; na ani moto a njɔti, kombe ende Anania, akakwee na akabakee mɔmɔ ai yo bo asɛ koko njɛnɛ ende.

¹³ Anania asɔmbeja bo, Kumu, mbi nakaka bato banɛnɛ bakabale a mojɔ momoto omina, na a mojɔ mobobe bokɔkɔ yo ai bato bawɛ oho Yelusalema.

¹⁴ Na adoi ya na kpaci ebasuku banganga bo apee bato basusu baya bangaka a kombe ewɛ.

¹⁵ Kumu ko abala na nde bo, Kɛ. Mbi nahɔi moto omina bo ajebejae kombe embi ai bapakano, ai bakumu, na ai bana baYisalaele.

¹⁶ Na mbi nadi bomoneja bo adi bodingoa bou mɛnɛ a mojɔ mokombe embi.

¹⁷ Anania akɛ na akwea a ndako emina. Abakea mɔmɔ ai Saula, abala na nde bo, Mwangwa’mbi Saula, Kumu Yesu yona osanejabi ai wɛ yana adalakabi wɛ a njea, alomi mbi bo osɛ koko njɛnɛ ewɛ, na bo olume na Mwembo Mosɛnɔke.

¹⁸ Oko a ehole emina, leka o poso jiswi, lokwa a miso mande, na asɔ koko njɛnɛ ende. Angɔ na abatisama,

¹⁹ na yana ayaka yo dia asɔ ngulu. Saula ayeyoa makina masu na bacingami baya badaka a Damaseke.

²⁰ Na abanga botɔndɔ bokpa a smagoge bo Yesu adi Mwana ’Njambe.

²¹ Bato basusu baya bamoka bakamoa. Babala bo, Moto yo, te yona onɔngejaka bato oho Yelusalema, oko bato baya basembaka kombe emina? Na adoiti ya a bopea bato, bo akɛe na bu a mbɔci ai basuku banganga?

²² Saula ko aluma na ngulu, na agegeaneja BaYuda baya badaka a Damaseke, na aneja na soti bo Yesu adi Masiya.

²³ Yana anɔ masu manɛnɛ, BaYuda badumba ndungu bo bamowoe.

²⁴ Saula ko aka mwako mondungu ebu. Ibo bamoseaka na bulu na moi a midipe mimongba mongando bo bamowoe.

²⁵ Bacingami ko babea Saula bokina busa na bulu, bamonɔjɔ a mongba, na bamosoloja a tei eekɔlɔ.

Saula a Yelusalema

²⁶ Yana amea yo a Yelusalema, Saula akenga bocingama na bato baDenga. Ibo ko bamobanga oko bobanga. Baijima nongo bo adi mocingami.

²⁷ Balanaba ko amosɔ, na akɛ na nde ai babwɛnji. Iyo abajebaja mojɔ moSaula, bo ama nɛ Kumu a njea, na bo Kumu ama bala na nde. Abajebeja koko bo Saula ama tɔndɔ Mwako Mopele na eci a kombe eYesu a Damaseke.

²⁸ Oko boa Saula akwea a tei ebu, na akɛkɛ adale na bu a Yelusalema.

²⁹ Atondo koko Mwako Mopele na eci enɛnɛ a kombe eKumu. Abalaka koko na BaYuda baya badaka na kɔpi eBaEla, na abomaka na bu kitɛ. Ibo ko badaka oko na posa bo bamowoe.

³⁰ Yana aka bacingami mojɔ momina, bamoloma a Talusia, na bamosukeja a njea a Kaisalia.

Mɔngɔ moPɛtɛlo

³¹ Denga didaka na bowi a ehole emina, a ngondo eYuda, na Galile, na Samalia, na limbilima. Denga didaka na lisuma ai Kumu, na dinɛngɛ a mojɔ mongulu eMwembo Mosɛnɔke.

³² Pɛtɛlo adala a bisika bisusu a bonja bato baDenga. Oko boa akɛ ai bato baDenga baya badaka a Luda.

³³ Atana okina moto oho, kombe ende Enea. Iyo amaka sama na yogo bianga bomwambe, na adaka mondɔke.

³⁴ Pɛtɛlo abala na nde bo, Enea; Yesu Masiya ahelejaka wɛ a yogo. Angɔ; kolea esambe ewɛ! Iyo angɔ bokpa mɛnɛ.

³⁵ Bato basusu baLuda na Salona bamonɛ, na bahekoa ai Kumu.

³⁶ Okina mocingami adaka a Yopa, kombe ende Tabita. (Cina ekombe emina edi Dɔkasi.) Mwali omina adaka na bingi enɛnɛ a mojɔ mobilomu bipele, na akɔkɔ bato monganji bou mɛnɛ.

³⁷ Iyo akɔnɔ yogo a masu mamina, na agwa. Bamososa, na bamosambea a ekenge endako a mboba ediko.

³⁸ Yana aka bacingami bo Pɛtɛlo adi oho Luda (mojɔ bo Luda edi na Yopa hulelu) haloma bami babae a ndɔsɔ ende, na bamongɔɔnɔ bo adoe bokpa.

³⁹ Oko boa Pɛtɛlo angɔ na akɛ na bu. Yana amea yo, bakɛ na nde a ekenge endako a mboba ediko. Bali-babogwa basusu badaka ena na bamoyeaka. Ibo baneja Pɛtɛlo kasaka na lɔpu jima kɔ Dɔkasi, yana adaka yo a tei ebu.

⁴⁰ Pɛtɛlo ko abameja basusu sokolu. Atita na magbunda, na anga Njambe. Ahekoa a dɔngɔ dinjemba na abala bo, Tabita, angɔ! Iyo adipoa miso, na yana anɛ yo Pɛtɛlo, angɔ na ada na mobondo.

⁴¹ Pɛtɛlo amopea ebɔ na amongɔjɔ. Abea bato baDenga na balibabogwa, na abaneja bo adi mɔ.

⁴² Bato basusu baYopa baka mojɔ momina, na bakina babu banɛnɛ bajimea Kumu.

⁴³ Pɛtɛlo ayeyoa mweka a Yopa, a ndako eSimona, moto yona obɔngejaka biobo bitito.